ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୨୧/୧୨) : ଠିକ୍ ଫସଲ ଅମଳ ସମୟରେ ଦାଉ ସାଜିଛି ଲଘୁଚାପ ବର୍ଷା । ଗୁରୁବାର ଠାରୁ ଦିନ ତମାମ ଆରମ୍ଭ ହୋଇଛି ଲଘୁଚାପ ବର୍ଷା ।
ଖଳାରେ ଅମଳ ହୋଇ ପଡିଥିବା ଫସଲ ଭିଜିବା ପରେ ଚାଷୀଙ୍କ ଚିନ୍ତା ବଢ଼ିଛି । ଜିଲ୍ଲାରେ ୯୦ ପ୍ରତିଶତ ଚାଷୀ ବର୍ତ୍ତମାନ ଏହି ସମସ୍ୟାରେ ପଡ଼ିଛନ୍ତି । ଗୋଟିଏ ପଟେ କପା ଓ ଧାନ ମଣ୍ଡି ନାମକୁ ମାତ୍ର ଆରମ୍ଭ ହୋଇଥିବା ବେଳେ ଚାଷୀ ମୁଠାଏ ମଧ୍ୟ ଧାନ ବିକ୍ରି କରିନାହାନ୍ତି । ମିଲର ଓ ଯୋଗାଣ ବିଭାଗ ମଧ୍ୟରେ ଚାଲିଥିବା ବିବାଦରୁ ଧାନ ସଂଗ୍ରହ ଠପ୍ ହୋଇଯାଇଛି । ମିଲର ନିଜର ଦାବି ପୂରଣ ପାଇଁ ଅଡି ଵସିଥିବା ବେଳେ ଯୋଗାଣ ବିଭାଗ ଧାନ କିଣିବାରେ ବିଫଳ ହୋଇଛି । ଲଗାଣ ବର୍ଷା ଯୋଗୁଁ ହଜାର ହଜାର ଚାଷୀଙ୍କର ଧାନ ଖଳାରେ ପଡ଼ି ଓଦା ହେଉଥିବା ବେଳେ, ଚାଷୀମାନେ ଦିନରାତି ଏକ କରି ଫସଲକୁ ଜଗି ରହିଛନ୍ତି ।
ଏଭଳି ଦୃଶ୍ୟ ଦେଖିବାକୁ ମିଳିଛି ରାୟଗଡ଼ା ଜିଲ୍ଲା ଗୁଣପୁର ବ୍ଲକ ଅନ୍ତର୍ଗତ ବଡ଼ କୁଜେନ୍ଦ୍ରୀ ଗ୍ରାମରେ । ଚୈ।ଧୁରି ତାଵିଟି ନାଇଡୁ , ସି ଏଚ ଶ୍ରୀକୁମାର , କିଲାଣି ଉଦୟ କୁମାର , ରମାମଣି ପ୍ରଭୃତି ଅନେକ ଚାଷୀଙ୍କ ଅମଳ ଧାନ ଖଳାରେ ଓଦା ହେଉଥିବା ଦେଖିବାକୁ ମିଳିଛି । ଧାନକୁ ପାଲ ଘୋଡାଇ ଥିଲେ ମଧ୍ୟ ତଳପଟୁ ପାଣି ପଶି ଧାନ ଓଦା ହୋଇଯାଇଥିଵା ସୂଚନା ମିଳିଛି । ଫଳରେ ବର୍ଷର ଅମଳ ଧାନ ନଷ୍ଟ ହେଉଥିବା ଦେଖି ଚାଷୀ ମୁଣ୍ଡରେ ହାତଦେଇ ବସିଛନ୍ତି । ଏ ସମ୍ପର୍କରେ ଜିଲ୍ଲା ମୂଖ୍ୟ କୃଷି ଅଧିକାରୀ ବିଷ୍ଣୁ ପ୍ରସାଦ କର କହିଛନ୍ତି , ବର୍ଷା ପୂର୍ବରୁ ଚାଷୀଙ୍କୁ ସଚେତନ କରାଯାଇଥିଲା । ଶନିବାର ବର୍ଷା ଛାଡ଼ିବା ପରେ ବିଭାଗୀୟ କର୍ମଚାରୀଙ୍କ ଜରିଆରେ କ୍ଷୟକ୍ଷତି ଆକଳନ କରାଯିବ, ତା’ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ ।
