ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ପୁରୀ, (୧୩/୦୨) : ବାହାଘର ପରେ ଲୁଟେରାଙ୍କ ଟାର୍ଗେଟରେ ବ୍ରତଘର ମଣ୍ଡପ । ସୁନା ଅଳଙ୍କାର ସହ ଟଙ୍କା ଖାମ୍ ଧରି ଚମ୍ପଟ ମାରିଲା ଚୋର । କ୍ୟାମେରାରେ କଏଦ ହେଲା ଚୋରିର ଦୃଶ୍ୟ ।
ଏଭଳି ଏକ ଘଟଣା ପୁରୀରୁ ଆସିଛି । ସୂଚନା ଅନୁସାରେ ପୁରୀ ମୋଚିସାହି ଛକର ଆଇନଜୀବୀ ସ୍ମୃତିରଞ୍ଜନ ପତିଙ୍କ ପୁଅ ବ୍ରତଘର ଚାଲିଥିଲା । ସମସ୍ତେ ମଜା ମସ୍ତି ସହ ଫଟୋ ଉଠାଇବାରେ ବ୍ୟସ୍ତ ଥିଲେ । ଏହାର ସୁଯୋଗ ନେଇ ସୁନା ଅଳଙ୍କାର ଓ ଟଙ୍କା ଖାମ୍ ଧରି ପଳାଇଛି ଚୋର। ଫଟୋ ଉଠାଉଥିବା କ୍ୟାମେରାରେ ଚୋରର ଭିଜୁଆଲ ରେକର୍ଡ ହୋଇଛି । ପ୍ରାୟ ୨ଲକ୍ଷ ଟଙ୍କା ସହ ୫ଭରି ସୁନା ଲୁଟ୍ ହୋଇଥିବା ଅଭିଯୋଗ ହୋଇଛି । ଏନେଇ ଟାଉନ ଥାନାରେ ଏତଲା ଦେଇଛନ୍ତି ସ୍ମୃତିରଞ୍ଜନ । ଭିଡିଓ ଫୁଟେଜକୁ ଆଧାର କରି ତଦନ୍ତ କରୁଛି ପୋଲିସ ।
ସୂଚନା ଯୋଗ୍ୟ ଯେ ଫେବୃୟାରୀ ୩ରେ ରାଜଧାନୀ ଭୁବନେଶ୍ବରରେ ଏକ ଷ୍ଟାର ହୋଟେଲରେ ଡାକ୍ତର ଦମ୍ପତିଙ୍କ ବାହାଘର ବେଳେ ଏଭଳି ଏକ ଚୋରି ଘଟଣା ସାମ୍ନାକୁ ଆସିଥିଲା । ୨ ଜଣ ଧୂର୍ତ୍ତ ଯୁବକ ଅତିଥି ବେଶରେ ଆସି କଳାକନା ବୁଲାଇଥିଲେ । ଡାକ୍ତର ଦମ୍ପତିଙ୍କୁ ଉପହାରରେ ମିଳିଥିବା ନଗଦ ଅଢେଇ ଲକ୍ଷ ଟଙ୍କା ଓ ସୁନା ଗହଣା ଲୁଟ୍ କରିଥିଲେ । ସିସିଟିଭିରେ ଦୁଇ ଧୂର୍ତ୍ତଙ୍କର ଭିଜୁଆଲ କଏଦ୍ ହୋଇଥିଲା। ମାତ୍ର ୧୫ ମିନିଟ୍ ଭିତରେ ଦୁଇ ଚୋର ଘଟଣାସ୍ଥଳରୁ ଟଙ୍କା ଓ ଗହଣା ଭର୍ତ୍ତି ବ୍ୟାଗ୍ ଉଠାଇ କାରରେ ଛୁ’ ମାରିଥିବା ଦେଖିବାକୁ ମିଳିଥିଲା ।
