ମୟୁରଭଞ୍ଜ, (୧୦/୦୫) : ଆପ୍ର. : ଶିମିଳିପାଳରୁ ପୁଣି ୩ ଶିକାରୀଙ୍କୁ ଧରାଇ ଦେଲା ଏ ଆଇ କ୍ୟାମେରା । ଶିମିଳିପାଳ କର୍ତ୍ତୃପକ୍ଷ ୩ ଜଣ ଶିକାରୀଙ୍କୁ ଧରିବାରେ ସଫଳ ହୋଇଛି ।
ସୂଚନା ମୁତାବକ ସେମାନଙ୍କ ଠାରୁ ୩ ଟି ଦେଶୀ ବନ୍ଧୁକ ଓ ୧୭ ଟି ଗୁଳି ଜବତ୍ କରାଯାଇଛି । ସେଥି ମଧ୍ୟରୁ ୫ଟି ଜୀବନ୍ତ ଗୁଳି ରହିଛି । ଶିମିଳିପାଳ ଜଙ୍ଗଲ ମଧ୍ୟକୁ ଶିକାର ଉଦ୍ଦେଶ୍ୟରେ ତିନି ଜଣ ଶିକାରୀ ପ୍ରବେଶ କରିଥିଲେ । ହେଲେ ସେମାନଙ୍କ ଫୋଟ ଏଆଇ କ୍ୟାମେରାରେ ଉଠି ଯାଇଥିଲା । ଏ ଆଇ କ୍ୟାମେରା ତୁରନ୍ତ କର୍ତ୍ତୃପକ୍ଷଙ୍କୁ ଶିକାରୀ ବାବଦରେ ଅବଗତ କରାଇଥିଲା । ଯାହାଫଳରେ ଶିମିଳିପାଳ କର୍ତ୍ତୃପକ୍ଷ ସେହି ସ୍ଥାନରୁ ଶିକାରୀ ମାନଙ୍କୁ ଗିରଫ କରିବାକୁ ସକ୍ଷମ ହୋଇଥିଲା ।
ସୂଚନା ଅନୁସାରେ ଅଭିଯୁକ୍ତ ମାନେ ସମସ୍ତେ ବାଙ୍ଗିରୀପୋଷୀ ଅଞ୍ଚଳର ବୋଲି ଶିମିଳିପାଳ ଦକ୍ଷିଣ ଉପନିର୍ଦ୍ଦେଶକ ଡ ସମ୍ରାଟ ଗୌଡ଼ା କହିଛନ୍ତି । ଅଭିଯୁକ୍ତ ମାନେ ହେଲେ ଲଚୁ ମୁର୍ମୁ, ମଧୁସୂଦନ ମୁର୍ମୁ ଓ ଘାସିରାମ ଟୁଡୁ । ସମସ୍ତ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଥିବା ଜଣା ପଡିଛି ।
