ସୁନ୍ଦରଗଡ଼, (୧୮/୦୩) : ଆ.ପ୍ର. : ସାବତ ପୁଅକୁ ପୋଡ଼ି ହତ୍ୟା ଉଦ୍ୟମ । ପୁଅ ଶୋଇଥିବା ବେଳେ ବାହାର ପଟୁ କବାଟ ବନ୍ଦ କରି ନିଆଁ ଲଗେଇ ଦେଲେ ବାପା ଓ ସାବତ ମାଆ ।
ସୁନ୍ଦରଗଡ଼ ଜିଲ୍ଲା ଲହୁଣୀପଡ଼ା ଥାନା ତାଳ ବହାଳୀ ଗାଁ’ରେ ଘଟିଛି ଅଭାବନୀୟ ଘଟଣା । ଗତ ୧୫ ତାରିଖ ବିଳମ୍ବିତ ରାତିରେ ପୁଅ ଦଶରଥ ଭୂମିଜ ଘରେ ଶୋଇଥିବା ବେଳେ ବାପା ସମରା ଭୂମିଜ ଓ ସାବତ ମାଆ ରମାଦେଇ ଭୁମିଜ ବାହାର ପଟୁ କବାଟ ବନ୍ଦ କରି ଘରକୁ ନିଆଁ ଲଗାଇ ଦେଇଥିଲେ । ଘରଟି ଜଳିବାରୁ ଦଶରଥ ବାହାରକୁ ବାହାରିବାକୁ ଚେଷ୍ଟା କରି ମଧ୍ୟ ବାହାରି ପାରିନଥିଲେ। ଝରକା ପଟେ ବାପା ଓ ସାବତ ମାଆ ସବୁ ଦେଖୁଥିଲେ କିନ୍ତୁ କବାଟ ଖୋଲି ନଥିଲେ ।
ଦଶରଥର କକା ଅନ୍ୟ ସାଇ ପଡ଼ିଶା ପହଞ୍ଚି କବାଟ ଖୋଲି ଦଶରଥଙ୍କୁ ବାହାର କରିବା ବେଳକୁ ତାଙ୍କ ଶରୀରର ପ୍ରାୟ ୪୦ ଭାଗ ଜଳି ଯାଇଥିଲା । ଗୁରୁତର ଅବସ୍ଥାରେ ପ୍ରଥମେ ତାଙ୍କୁ ସ୍ଥାନୀୟ ମେଡ଼ିକାଲ ପରେ RGH ରେ ଭର୍ତ୍ତି କରଯାଇଛି। ବାପା ଓ ସାବତ ମାଙ୍କ ନାଁରେ ଲିଖିତ ଅଭିଯୋଗ ପରେ ଲହୁଣୀପଡ଼ା ପୋଲିସ ଉଭୟଙ୍କୁ ଅଟକ ରଖି ଅଧିକ ତଦନ୍ତ ଜାରି ରହିଛି । ତେବେ କେଉଁ କାରଣ ପାଇଁ ଏଭଳି କାଣ୍ଡ କରିବା ପାଇଁ ବାପା ମାଆ ଅଣ୍ଟା ଭିଡିଥିଲେ ତାହା ବର୍ତ୍ତମାନ ସୁଦ୍ଧା ଜଣାପଡ଼ି ନାହିଁ ।
