ରିପୋର୍ଟ : ଧୃବରାଜ ମିଶ୍ର
ସୁବର୍ଣ୍ଣପୁର, (୦୧/୦୩) : ଆଜି ପୂର୍ବାହ୍ନରେ ସୁବର୍ଣ୍ଣପୁର ଜିଲ୍ଲାରେ ରାଜସ୍ଵ ଓ ବିପର୍ଯ୍ୟୟ ପରିଚାଳନା ବିଭାଗ ମନ୍ତ୍ରୀ ସୁରେଶ ପୂଜାରୀ ଜିଲ୍ଲାର ରାଜସ୍ଵ କାର୍ଯ୍ୟନ୍ୱୟନର ସ୍ଥିତି ଓ ଅଗ୍ରଗତିର ସମୀକ୍ଷା କରିଛନ୍ତି ।
ଜିଲ୍ଲାପାଳ ସୁବର୍ଣ୍ଣପୁରଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷ ରେ ଅନୁଷ୍ଠିତ ଏହି ସମୀକ୍ଷା ବୈଠକ ପ୍ରାରମ୍ଭରେ ଜିଲ୍ଲାପାଳ ଶ୍ରୀମତୀ ଅନ୍ୟା ଦାସ ସମସ୍ତଙ୍କୁ ସ୍ୱାଗତ କରିଥିଲେ। ମାନ୍ୟବର ମନ୍ତ୍ରୀ ସମୀକ୍ଷା ବୈଠକରେ ଜିଲ୍ଲାର ସମସ୍ତ ପ୍ରାଥମିକ ଓ ଉଚ୍ଚ ପ୍ରାଥମିକ ସ୍କୁଲ ଗୁଡିକ ନାମରେ ଜମି ପଟ୍ଟା କରାଇବା ଉପରେ ତହସିଲଦାରଙ୍କୁ ପଚାରି ବୁଝିଥଲେ ଏବଂ ଆବଶ୍ୟକ ପଟ୍ଟା ପ୍ରଦାନ କରିବାକୁ ପଦକ୍ଷେପ ନେବା ସହିତ ଆସନ୍ତା ଦୁଇ ମାସ ମଧ୍ୟରେ ସମସ୍ତ ତହସିଲଦାର ଶତ ପ୍ରତିଶତ ପଟ୍ଟା ପ୍ରଦାନକୁ ସୁନିଶ୍ଚିତ କରିବାକୁ ନିର୍ଦେଶ ଦେଇଥିଲେ । ପୁନଶ୍ଚ କୌଣସି ସ୍କୁଲ କିମ୍ବା କଲେଜ ପାଖରେ ସରକାରୀ ଜମି ରହିଥିଲେ ସେହି ଜମିକୁ ସ୍କୁଲ ନିମନ୍ତେ ଖେଳପଡିଆ କିମ୍ବା ଅନ୍ୟାନ୍ୟ ବ୍ୟବହାର ପାଇଁ ପ୍ରଦାନ କରିବାକୁ ତହସିଲଦାର ପ୍ରମୁଖ ଆବଶ୍ୟକ ପଦକ୍ଷେପ ନେବାକୁ କହିଥିଲେ।
ଜନସାଧାରଣଙ୍କୁ ଧାର୍ଯ୍ୟ ସୀମା ମଧ୍ୟରେ ରାଜସ୍ବ ସଂକ୍ରାନ୍ତୀୟ କାର୍ଯ୍ୟର ସେବା ଯୋଗାଇବାକୁ ନିର୍ଦେଶ ଦେଇ ତହସିଲ ଅଫିସରେ ଯେପରି କୌଣସି ଲୋକ ହଇରାଣ ହରକତ ନହୁଅନ୍ତି ସେଥି ନିମନ୍ତେ ସମସ୍ତ ରାଜସ୍ବ ଅଧିକାରୀ ବିଶେଷ ଯତ୍ନବାନ ହେବାକୁ ପରାମର୍ଶ ଦେଇଛନ୍ତି । ତହସିଲଦାର ଓ ଅନ୍ୟାନ୍ୟ ରାଜସ୍ବ କର୍ମଚାରୀ ସ୍ୱତଃ ନିଜ ପକ୍ଷରୁ ବିଭିନ୍ନ ଗ୍ରାମ ଗସ୍ତ ପୂର୍ବକ ଜନସାଧାରଣଙ୍କ ରାଜସ୍ବ ସମସ୍ୟାର ସମାଧାନ ସହିତ ଭୂମିହୀନ ଯୋଗ୍ୟ ହିତାଧିକାରୀ ଚି଼ହ୍ନଟ କରି ବସୁନ୍ଧରା ଯୋଜନା ପାଇଁ ଜମି ଯୋଗାଇବା ନିମନ୍ତେ ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି । ବିଭିନ୍ନ ରାଜସ୍ବ ଯୋଜନା ତଥା ରାଜସ୍ବ କାର୍ଯ୍ୟର ସଫଳତାକୁ ନିଶ୍ଚିତ ଓ ବ୍ୟବସ୍ଥିତ କରିବା ନିମନ୍ତେ ସମସ୍ତ ତହସିଲଦାର ନିଜ ନିଜ ତହସିଲ ଏରିଆରେ ରହିଥିବା ବିଭିନ୍ନ କିସମର ଜମି, ବିଭିନ୍ନ ଯୋଜନା ନିମନ୍ତେ ହିତାଧିକାରୀ ପ୍ରଭୁତିର ଆବଶ୍ୟକ ପୂର୍ଣ୍ଣାଙ୍ଗ ଡାଟା ବେସ ପ୍ରସ୍ତୁତ କରିବାକୁ ନିର୍ଦେଶ ଦେଇଛନ୍ତି ।
ପୁନଶ୍ଚ ଯେଉଁ ଲାଭର୍ଥୀ ସରକାରୀ ଜମିରେ ପ୍ରଧାନମନ୍ତ୍ରୀ ଆବାସ ଗୃହ ନିର୍ମାଣ କରି ରହୁଛନ୍ତି ସେମାନଙ୍କ ଜମି ପଟ୍ଟାକୁ ନିଶ୍ଚିତ କରିବାକୁ ମାନ୍ୟବର ମନ୍ତ୍ରୀ ପରାମର୍ଶ ଦେଇଛନ୍ତି। ବିଭାଗକୁ ଲୋକାଭିମୁଖୀ କରିବାକୁ ଜିଲ୍ଲାରେ କାର୍ଯ୍ୟରତ ସମସ୍ତ ରାଜସ୍ବ ଅଧିକାରୀ ଯତ୍ନବାନ ହୋଇ ସାଧାରଣ ଲୋକଙ୍କୁ ଗୁରୁତ୍ୱ ଦେବା ସହ ଲୋକାଭିମୁଖୀ ଯୋଜନା ଗୁଡିକ ପ୍ରଣୟନ ନିମନ୍ତେ ଦାୟିତ୍ୱବାନ ହେବାକୁ କହିଥିଲେ। ଜିଲ୍ଲାର ଅଧିକ ରାଜସ୍ବ ଗ୍ରାମ ହେଲେ ସାଧାରଣ ଲୋକ ଗରିବୀ କଲ୍ୟାଣ ଯୋଜନାର ଅଧିକ ମାତ୍ରାରେ ଲାଭ ପାଇପାରିବେ ଏଣୁ ଵିଧି ମୁତାବକ ମାର୍ଚ୍ଚ ୩୧ ସୁଦ୍ଧା ଜିଲ୍ଲାରେ ନୂତନ ରାଜସ୍ବ ଗ୍ରାମ ଗଠନ ପ୍ରସ୍ତାବ ସରକାରଙ୍କ ସମ୍ପୃକ୍ତ ବିଭାଗକୁ ପଠାଇବାକୁ ପରାମର୍ଶ ପ୍ରଦାନ କରିଛନ୍ତି । ସୁବର୍ଣ୍ଣପୁର ଜିଲ୍ଲା ଶିଳ୍ପ ବିହୀନଜିଲ୍ଲା ହୋଇଥିବା ବେଳେ ଜିଲ୍ଲାର ବିକାଶ ତଥା ସ୍ୱରୋଜଗାର ବୃଦ୍ଧି ନିମନ୍ତେ ଛୋଟ ଛୋଟ ଶିଳ୍ପ ପ୍ରତିଷ୍ଠା ଉପରେ ଗୁରୁତ୍ୱାରୋପ କରିଥିଲେ। ଜିଲ୍ଲାର ଯୁବକ ଯୁବତୀଙ୍କୁ ରୋଜଗାର କ୍ଷମ କରିବାକୁ ଆବଶ୍ୟକ ଏମଏସଏମଇ ତାଲିମ ପ୍ରଦାନ ଉପରେ ମଧ୍ୟ ସେ କହିଥିଲେ ।
ମ୍ୟୁଟେସନ କେସ ଗୁଡିକ ଯଥାଶୀଘ୍ର ସହମ୍ମତି ଭିତ୍ତିରେ ସମାଧାନ କରିବାକୁ କହିବା ସହ ସରକାରୀ ଜମି ଜବରଦଖଲ ହଟାଇବା ସହିତ ତାର ସୁରକ୍ଷା ପ୍ରତି ଆବଶ୍ୟକ ପଦକ୍ଷେପ ନେବାକୁ ନିର୍ଦେଶ ଦେଇଛନ୍ତି। ସେହିପରି ଜାତି ପ୍ରମାଣପତ୍ର ତଥା ଅନ୍ୟାନ୍ୟ ପ୍ରମାଣପତ୍ର କୁ ସମୟ ଅବଧିରେ ପ୍ରଦାନ କରିବା ବିଷୟରେ ଆଲୋଚନା ହୋଇଥିଲା। ଅସାଧୁ ଉପାୟରେ ଆଦିବାସୀ ଜମି ହଡପ କରୁଥିବା ଲୋକଙ୍କ ପ୍ରତି ବିଶେଷ ସତର୍କ ରହିବାକୁ ରାଜସ୍ବ ଅଧିକାରୀଙ୍କୁ ପରାମର୍ଶ ଦେଇଛନ୍ତି। ପୁନଶ୍ଚ ସରକାରୀ କାର୍ଯ୍ୟ ନିମନ୍ତେ ଆବଶ୍ୟକ ଜମି, ମଣ୍ଡି ସ୍ଥାପନ ପାଇଁ ଆବଶ୍ୟକ ଜମି, ଜଳସେଚନ ନିମନ୍ତେ ଆବଶ୍ୟକ ଜମି ପ୍ରଭୁତି ନିମନ୍ତେ ରହିଥିବା ସମସ୍ୟା ର ସମାଧାନ ପାଇଁ ପଦକ୍ଷେପ ସହ ପଟ୍ଟା ପ୍ରଦାନ ପାଇଁ ପଦକ୍ଷେପ ନେବାକୁ ଉଲ୍ଲେଖ କରିଥିଲେ।
ଅନୁଷ୍ଠିତ ଏହି ସମୀକ୍ଷା ବୈଠକରେ ବଲାଙ୍ଗିର ସାଂସଦ ସଙ୍ଗୀତା କୁମାରୀ ସିଂଦେଓ, ବୀରମହାରାଜପୁର ବିଧାୟକ ଇଂ. ରଘୁନାଥ ଜଗଦଲା, ଜିଲ୍ଲାପାଳ ଅନ୍ୟା ଦାସ, ମାନ୍ୟବର ମନ୍ତ୍ରୀ ରାଜସ୍ବ ଓ ବିପର୍ଯୟ ଙ୍କ ବ୍ୟକ୍ତିଗତ ସଚିବ ପ୍ରଦୀପ ସାହୁ, ଅତିରିକ୍ତ ଜିଲ୍ଲାପାଳ ରାଜେନ୍ଦ୍ର ମାଝୀ , ଅତିରିକ୍ତ ଜିଲ୍ଲାପାଳ ଅଞ୍ଜଳିନା ପ୍ରଧାନ, ସୋନପୁର ଉପଜିଲ୍ଲାପାଳ ଡ. ସୌମ୍ୟାରୁପା ରଥ, ବୀରମହାରାଜପୁର ଉପଜିଲ୍ଲାପାଳ ଲଲାଟେନ୍ଦୁ ସି , ଆସିଷ୍ଟାଣ୍ଟ କଲେକ୍ଟର (ରାଜସ୍ବ) ସତ୍ୟବ୍ରତ ସାହୁ, ଜିଲ୍ଲାର ବିଭିନ୍ନ ବିଭାଗର ଅଧିକାରୀ , ସମସ୍ତ ତହସିଲଦାର, ଅତିରିକ୍ତ ତହସିଲଦାର,ରାଜସ୍ବ ସୁପରଭାଇଜର ପ୍ରମୁଖ ଉପସ୍ଥିତ ରହିଥିଲେ ।
ମାନ୍ୟବର ମନ୍ତ୍ରୀ ରାଜସ୍ବ ବିଭାଗ କାର୍ଯ୍ୟର ପ୍ରଶଂସା କରି ଆଗକୁ ଆହୁରି ଭଲ କରିବାକୁ କହି ସୋନପୁର କୁ ସୁବର୍ଣ୍ଣପୁରରେ ପରିଣତ କରିବାକୁ ଉପସ୍ଥିତ ସମସ୍ତ ନେତୃ ସ୍ଥାନୀୟ ବ୍ୟକ୍ତି ତଥା ବରିଷ୍ଠ ଅଧିକାରୀ, ରାଜସ୍ବ ଅଧିକାରୀ ପ୍ରମୁଖ ଦାୟିତ୍ୱ ସମ୍ପନ୍ନ ପୂର୍ବକ ଆନ୍ତରିକତାର ସହ କାର୍ଯ୍ୟ କରିବାକୁ ଆହ୍ୱାନ କରିଛନ୍ତି l
