ରିପୋର୍ଟ : ରବି ଶଙ୍କର ମହାପାତ୍ର
କୋଟପାଡ଼, (୩/୬) : ସୂଚନା ଅଧିକାର ଆଇନ୍ ଅନୁସାରେ ଆବେଦନ କରି ନିରାଶ ହେବା ସଂପର୍କରେ ଗତ କିଛି ଦିନ ତଳେ ଏକ ଖବର ପ୍ରସାରଣ ହୋଇଥିଲା ।
କୋଟପାଡ଼ ବ୍ଲକ୍ ଭନସୁଲୀ ପଞ୍ଚାୟତର ଲୋକ ସୂଚନା ଅଧିକାରୀ ତଥା ପଞ୍ଚାୟତ ନିର୍ବାହୀ ଅଧିକାରୀଙ୍କ ନିକଟରେ ହରିଶ କୁମାର ପଟ୍ଟନାୟକ ନାମକ ଜଣେ ସମାଜସେବୀ ଉନ୍ନୟନ ମୂଳକ କାର୍ଯ୍ୟ ସମ୍ପର୍କିତ ତଥ୍ଯ ପାଇଁ ଗତ ୨୦୨୩ ମସିହା ନଭେମ୍ବର ୮ ତାରିଖ ଦିନ ଆବେଦନ କରିଥିଲେ । କିନ୍ତୁ ଭନସୂଲୀ ପଞ୍ଚାୟତ P.E.O. କୌଣସି ଉତ୍ତର ଦେଇ ନ ଥିଲେ । ଏ ନେଇ କିଛି ଦିନ ତଳେ ଏକ ଖବର ପ୍ରସାରଣ ହୋଇଥିଲା । ଖବର ପ୍ରସାରଣ ପରେ ଲୋକ ସୂଚନା ଅଧିକାରୀ ୨୦୨୪ ମସିହା ମଇ ୩୦ ତାରିଖ ଦିନ ସୂଚନା ବାବଦକୁ ୧୦୦୦ ଟଙ୍କା ପଇଠ କରିବା ପାଇଁ ଗୋଟିଏ ଚିଠି ଲେଖିଛନ୍ତି, ଯେଉଁ ଚିଠିକୁ ପିଛିଲା ତାରିଖ ପକାଇ (ତା ୫.୧୨. ୨୦୨୩) ଦସ୍ତଖତ କରାଯାଇଛି । ସୂଚନା ଅଧିକାର ଆଇନ୍ ଅନୁସାରେ ୧ ମାସ ମଧ୍ୟରେ ସୂଚନା ଦେବାରେ ବିଫଳ ହେଲେ ବିନା ମୂଲ୍ୟରେ ସୂଚନା ଦେବାର ନିୟମ ଅଛି ।
ଏହି ନିୟମକୁ ଅଣଦେଖା କରି ୧୦୦୦ ଟଙ୍କା ଦାବି କରିବା ତଥା ଟଙ୍କା ପଇଠ କରିବା ସମୟ ସୀମା ଚିଠିରେ ଉଲ୍ଲେଖ ନ କରିବା,କେତେ ପୃଷ୍ଠାର ସୂଚନା ପ୍ରଦାନ କରିବାକୁ ଯାଉଛନ୍ତି ତାହା ମଧ୍ୟ ଉଲ୍ଲେଖ ନ କରିବା, ସର୍ବୋପରି ଉନସୂଲୀ ପଞ୍ଚାୟତରେ ଡାକଘର ଥିବା ସତ୍ତ୍ଵେ କୋଟପାଡ଼ ଡାକଘରୁ ଚିଠି ପଠାଇବା ବିଷୟ ଲୋକ ସୂଚନା ଅଧିକାରୀ ଆଇନକୁ ହେୟ ଜ୍ଞାନ କରୁଥିବା ପ୍ରମାଣିତ କରୁଛି । ପଠା ଯାଇଥିବା ଚିଠିର ଦୂର୍ବଳ ଇଂରାଜୀ ତଥା କୋଟପାଡ଼ ଡାକଘରୁ ଚିଠି ପ୍ରେରଣ ରୁ ଜଣାପଡ଼ୁଛି ଯେ ଲୋକ ସୂଚନା ଅଧିକାରୀ ଅନ୍ୟ କାହାର ପରାମର୍ଶ କ୍ରମେ କାମ କରୁଛନ୍ତି । ତେବେ ସୂଚନା ଅଧିକାର କର୍ମୀଙ୍କୁ ସୂଚନା ପାଇଁ ଆଉ କେତେ ଦିନ ଅପେକ୍ଷା କରିବାକୁ ପଡୁଛି ତାହା ଦେଖିବାକୁ ବାକି ରହିଲା ।
