ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ନୂଆପଡା, (୨୪/୦୧) : ନୂଆପଡା ଜିଲ୍ଲା ସିନାପାଲି ଥାନା ନିଲଜୀ ଡଙ୍ଗରିଗୁଡା ଛକ ଫୋରୱେ ରାସ୍ତାଠାରେ ଏକ ସ୍କୁଟିକୁ ପିଟି ଟ୍ରକ୍ ଫେରାର୍ ହୋଇଥିବା ବେଳେ ସ୍କୁଟି ଚାଳକଙ୍କ ମୃତ୍ୟୁ ହୋଇଥିବା ଜଣାପଡିଛି ।
ମୃତ ବ୍ୟକ୍ତି ଜଣକ ବୋଡେନ ଥାନା ବୁଢିପଦର ଗ୍ରାମର ବଳରାମ ସା (୨୭) ବୋଲି ଜଣାପଡ଼ିଛି । ଘଟଣାରୁ ପ୍ରକାଶ ଯେ, ସିନାପାଲି ପଟରୁ ସ୍କୁଟିରେ ବଳରାମ ନିଜ ଗାଁକୁ ଫେରୁଥିବା ବେଳେ ସେହିପଟୁ ଏକ ଅଜଣା ଟ୍ରକ୍ ଆସି ସ୍କୁଟିକୁ ପଛପଟୁ ପିଟି ଦେଇ ଫେରାର୍ ମାରିଥିଲା । ସ୍ଥାନୀୟ ଲୋକେ ଟ୍ରକ୍କୁ ପିଛା କରିଥିବା ବେଳେ ଟ୍ରକ୍ ଦ୍ରୁତଗତିରେ ଫେରାର୍ ମାରିଥିଲା । ସୂଚନା ଅନୁସାର ବଳରାମ ଗୁରୁବାର କୌଣସି କାମରେ ସିନାପାଲି ଆସିଥିଲେ ଓ ସିନାପାଲିରୁ ନିଜ ଘରକୁ ଫେରୁଥିବା ବେଳେ ଏହି ଘଟଣାଟି ଘଟିଥିଲା । ତେବେ ଘଟଣାସ୍ଥଳରେ ସିନାପାଲି ପୋଲିସ ପହଞ୍ଚି ଚିକିତ୍ସା ପାଇଁ ବଳରାମଙ୍କୁ ଆମ୍ୱୁଲାନ୍ସ ଯୋଗେ ସିନାପାଲି ସରକାରୀ ହସ୍ପିଟାଲ ନେଇଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଏନେଇ ଘଟଣା ସ୍ଥଳରେ ସିନାପାଲି ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରି ସ୍କୁଟିକୁ ଜବତ କରିଛି । ଘଟଣାସ୍ଥଳରେ ପରିବାର ଓ ସ୍ଥାନୀୟ ଲୋକଙ୍କ ଭିଡ ଜମିଥିଲା । ଶବକୁ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇ ପରିବାର ପକ୍ଷରୁ କ୍ଷତିପୂରଣ ପାଇଁ ସରକାରଙ୍କୁ ନିବେଦନ କରାଯାଇଛି ବୋଲି ସୂଚନା ମିଳିଛି ।
