ଶିକ୍ଷାରୁ ବଞ୍ଚିତ କୁନି କୁନି ଶିଶୁ..ଗ୍ରାମର ମହିଳାମାନେ ପୁଣି ବିଡ଼ିଓଙ୍କ ଦ୍ବାରସ୍ଥ..
ରିପୋର୍ଟ: ଭଗବାନ ମହାନ୍ତି //
ମୁରିବାହାଲ ତା ୦୯/୧୨/୨୪): ମୁରିବାହାଲ ବ୍ଲକ ଲଖନା ପଞ୍ଚାୟତ ବ୍ରାହ୍ମଣୀ ଗ୍ରାମରେ ୧୪ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମାଣ ଚାଲିଥିବା ଦୁଇଟି ଅଙ୍ଗନୱାଡ଼ି କେନ୍ଦ୍ର ଦୀର୍ଘ ଦୁଇ ବର୍ଷ ପରେ ବି ଅସମ୍ପୂର୍ଣ୍ଣ ଅବସ୍ଥାରେ ପଡିରହିଥିବାକୁ ନେଇ ଗ୍ରାମରେ ତୀବ୍ର ଅସନ୍ତୋଷ ପ୍ରକାଶ ପାଇଛି।ସୋମବାର ଗ୍ରାମର ମହିଳାମାନେ ପୁଣି ଥରେ ବ୍ଲକ ବିଡ଼ିଓଙ୍କ ଦ୍ବାରସ୍ଥ ହୋଇଛନ୍ତି।
ଏହାପୂର୍ବରୁ ଗତ ୨୫/୦୯/୨୦୨୪ ଦିନ ଅନୁଷ୍ଠିତ ବ୍ଲକସ୍ତରୀୟ ମନରେଗାର ସାମାଜିକ ସମୀକ୍ଷା ଜନଶୁଣାଣୀ ଶିବିରରେ ଗ୍ରାମବାସୀଙ୍କ ପକ୍ଷରୁ ଅଭିଯୋଗକୁ ନେଇ କଣ୍ଟାବାଞ୍ଜି ବିଧାୟକ ଲକ୍ଷ୍ମଣ ବାଗ ତୀବ୍ର ପ୍ରତିକ୍ରିୟା ପ୍ରକାଶ କରି ଏହି ଅସମ୍ପୂର୍ଣ୍ଣ କାମ ଶୀଘ୍ର ଶେଷ କରିବାକୁ ନିର୍ଦ୍ଦେଶ ଥିଲେ। ବ୍ରାହ୍ମଣୀର ଦୁଇ ଅଙ୍ଗନୱାଡ଼ି କେନ୍ଦ୍ର ଦୀର୍ଘ ୨ବର୍ଷ ହେବ ଅସମ୍ପୂର୍ଣ୍ଣ ଥିବାକୁ ନେଇ ଦାୟିତ୍ୱରେ ଥିବା ଜିଆରଏସ,ପିଇଓ ଓ ଜେଇଙ୍କ ଉପରେ ଅସନ୍ତୋଷ ବ୍ୟକ୍ତ କରିଥିଲେ।ବିଧାୟକଙ୍କ ନିର୍ଦ୍ଦେଶ ପରେ ସମ୍ପୃକ୍ତ ଠିକାଦାର କାମ ସମ୍ପୁର୍ଣ୍ଣ କରିଦେବି ବୋଲି ପ୍ରତିଶ୍ରୁତି ଦେଇଥିଲେ ମଧ୍ୟ ୨ମାସ ପରେ ବି କାମ ଆରମ୍ଭ ନ ହେବାରୁ ଗ୍ରାମବାସୀ ପୁଣି ବିଡିଓଙ୍କ ଦ୍ବାରସ୍ଥ ହୋଇଛନ୍ତି।ବ୍ରାହ୍ମଣୀ ଗ୍ରାମର ଉଭୟ (କ) ଓ (ଖ) ଅଙ୍ଗନୱାଡ଼ି କେନ୍ଦ୍ର ପାଇଁ ଗତ ୨୦୨୧-୨୨ଆର୍ଥିକ ବର୍ଷରେ ସମାନ ଭାବରେ ମନରେଗାରୁ ୫ଲକ୍ଷ ଓ ମହିଳା ଓ ଶିଶୁ ବିକାଶ ବିଭାଗରୁ ୨ଲକ୍ଷ ଏପରି ମୋଟ ୭ଲକ୍ଷ ସହ ଦୁଇ କେନ୍ଦ୍ର ପାଇଁ ସର୍ବମୋଟ ୧୪ଲକ୍ଷ ଟଙ୍କା ଅନୁଦାନ ଆସିଥିଲା।
ଦୀର୍ଘ ୨ବର୍ଷ ହେବ ଦୁଇ କେନ୍ଦ୍ରର କୋଠା କାମର କେବଳ ଛାତ ପଡ଼ିଛି।ଶ୍ରମିକଙ୍କୁ ମଜୁରୀ ଅର୍ଥ ମିଳିନାହିଁ, ଝରକା,କବାଟ ଲାଗି ନାହିଁ,କାନ୍ଥ ପ୍ଲାଷ୍ଟର ହୋଇନି ଓ କାମ ମଧ୍ୟ ଅସମ୍ପୂର୍ଣ୍ଣ ଭାବେ ପଡ଼ିରହିଛି ବୋଲି ମହିଳାମାନେ ଲିଖିତ ଅଭିଯୋଗ କରିଛନ୍ତି।ଫଳରେ ଗ୍ରାମର ଉଭୟ କେନ୍ଦ୍ରରେ ପ୍ରାକ୍ ପ୍ରାଥମିକ ଶିକ୍ଷା ଗ୍ରହଣରୁ ଶତାଧିକ କୁନି କୁନି ଶିଶୁ ବଞ୍ଚିତ ହେଉଛନ୍ତି।ସେମାନେ ସ୍କୁଲର ବାରଣ୍ଡାରେ ବସି କେବେ ନୂଆଁ କୋଠାକୁ ଯିବେ ଦିନ ଗଣୁଛନ୍ତି। ୧୪ଲକ୍ଷ ଟଙ୍କାର ଉଭୟ ଅଙ୍ଗନୱାଡି କେନ୍ଦ୍ରକୁ ବ୍ଲକ କଟାଡୁଙ୍ଗୁରୀ ଗ୍ରାମର ନନ୍ଦ ବାଗ ନାମକ ଜଣେ ଠିକାଦାର କରୁଥିବା ବେଳେ ଏହାକୁ ୨ବର୍ଷ ହେବ ଅସମ୍ପୂର୍ଣ୍ଣ ଭାବେ ପକାଇରଖିଥିବା ମହିଳାମାନେ ଲିଖିତ ରୂପେ ଗୁରୁତର ଅଭିଯୋଗ କରିଛନ୍ତି। ଗ୍ରାମବାସୀଙ୍କ ଲିଖିତ ଅଭିଯୋଗ ସମ୍ପର୍କରେ ବିଡ଼ିଓ ବାସନ୍ତୀ ସେଠୀଙ୍କୁ ପଚାରିବାରୁ ଅସମ୍ପୂର୍ଣ୍ଣ କୋଠା କାମ ଶୀଘ୍ର ସମ୍ପୁର୍ଣ୍ଣ ପାଇଁ ପଦକ୍ଷେପ ନିଆଯିବ ବୋଲି ପ୍ରକାଶ କରିଥିଲେ।ଗ୍ରାମର ଭୀମସେନ ଭୋଇଙ୍କ ନେତୃତ୍ବରେ ଗ୍ରାମର ବାସନ୍ତୀ ରଣା, ସସ୍ମିତା ଭୋଇ, ସନ୍ତୋସିନି ପଧାନ, ବବିତା ଭୋଇ, ଭୂମିଶୁତା ପଧାନ ଓ ଦୁଲଣା ଭୋଇଙ୍କ ସହ ବହୁ ସଂଖ୍ୟକ ମହିଳା ବିଡ଼ିଓଙ୍କ ଦ୍ବାରସ୍ଥ ହୋଇ ଲିଖିତ ଅଭିଯୋଗ କରିଛନ୍ତି।
