ବାରିପଦା, (୦୫/୦୬) : ଆପ୍ର. : ଗୋ ଚାଲାଣ ମାମଲାରେ ମୟୁରଭଞ୍ଜ ପୋଲିସକୁ ବଡ଼ ସଫଳତା ମିଳିଛି । ଗୁରୁବାର ଚାଲାଣ ପାଇଁ ରଖାଯାଇଥିବା ପ୍ରାୟ ୨୮୦ରୁ ଉର୍ଦ୍ଧ୍ୱ ବାଛୁରୀଙ୍କୁ ଉଦ୍ଧାର କରିଛି ପୋଲିସ ।
ମୟୁରଭଞ୍ଜ ଜିଲ୍ଲା ବୈଶିଙ୍ଗା ଥାନା ଅନ୍ତର୍ଗତ ଦାହିବାଡ଼ି ଏବଂ ଗୋବିନ୍ଦରାୟପୁର ଗ୍ରାମରୁ ପୃଥକ ପୃଥକ ଚଢ଼ଉ କରି ବାଛୁରୀଙ୍କୁ ଉଦ୍ଧାର କରାଯାଇଛି । ମୟୁରଭଞ୍ଜ ଜିଲ୍ଲା ସୀମାବର୍ତ୍ତୀ ବୈଶିଙ୍ଗା ଥାନା ଅଧୀନ ଗୋବିନ୍ଦରାୟପୁର ଓ ଦାହିବାଡ଼ି ଗ୍ରାମରେ ବାଛୁରୀଙ୍କୁ ବେଆଇନ ଚାଲାଣ ପାଇଁ ରଖାଯାଇଥିବା ନେଇ ପୋଲିସକୁ ସୂଚନା ମିଳିଥିଲା । ଏସପି ବରୁଣ ଗୁଣ୍ଟୁପାଲିଙ୍କ ନିର୍ଦ୍ଦେଶରେ ଅତିରିକ୍ତ ଏସପି ଦୀପକ କୁମାର ଗୋଛାୟତଙ୍କ ନେତୃତ୍ୱରେ ଏକ ଟିମ୍ ପ୍ରସ୍ତୁତ କରାଯାଇଥିଲା ।
ବୁଧବାର ଭୋର ୪ଟା ସମୟରେ ପୋଲିସ ଟିମ୍ ଗୋବିନ୍ଦରାୟପୁର ଓ ଦାହିବାଡ଼ି ଗ୍ରାମରେ ଏକକାଳୀନ ଚଢ଼ଉ କରିଥିଲା । ପୋଲିସ ୨୮୦ରୁ ଅଧିକ ବାଛୁରୀଙ୍କୁ ଉଦ୍ଧାର କରିଛି । ଉଦ୍ଧାର ଗୋରୁଙ୍କ ଗୋଶାଳାକୁ ସ୍ଥାନାନ୍ତର କରାଯାଇଛି । ସେମାନଙ୍କ ମଧ୍ୟରେ କେତେକଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ଥିବାରୁ ଚିକିତ୍ସା କରାଯାଇଛି ।
ଏହି ପୋଲିସ ଟିମରେ ବୈଶିଙ୍ଗା ଥାନା ଅଧିକାରୀ ବାରିଣୀ ଦାସ, ବଡ଼ସାହି ଥାନା ଅଧିକାରିଣୀ ସ୍ଵର୍ଣ୍ଣଲତା ମିଞ୍ଜ, ରାସଗୋବିନ୍ଦପୁର ଥାନା ଅଧିକାରୀ ପଦ୍ମଲୋଚନ ପାଣିଗ୍ରାହୀ ଓ ମୁରୁଡ଼ା ଥାନା ଅଧିକାରୀ ସୁମିତ ସୋରେନ ପ୍ରମୁଖ ସାମିଲ ଥିଲେ ।
