ରିପୋର୍ଟ : ରବିଶଙ୍କର ମହାପାତ୍ର
କୋରାପୁଟ, (୯/୨) : ଅବିଭକ୍ତ କୋରାପୁଟ ଜିଲ୍ଲା ବୋରିଗୁମ୍ମା ଠାରୁ ୧୫ କିଲୋମିଟର ଦୂରରେ ଅବସ୍ଥିତ ବି.ସିଂହପୁର ଗ୍ରାମ ନିକଟବର୍ତ୍ତୀ ଏକ ପାହାଡ ତଳେ ଅବସ୍ଥିତ ମାଁ ଶାଙ୍କୁଳାଇଙ୍କ ମନ୍ଦିର ପରିସରରେ ଆଜି ଉପାନ୍ତ ପ୍ରସିଦ୍ଧ ମଣ୍ଡେଇ ଯାତ୍ରା ଅନୁଷ୍ଠିତ ହୋଇଯାଇଛି ।
ଅବିଭକ୍ତ କୋରାପୁଟ ଜିଲ୍ଲା ର ୫ଟି ସ୍ଥାନରେ କ୍ରମାନ୍ୱୟରେ ଅନୁଷ୍ଠିତ ହେବାକୁ ଯାଉଥିବା ଯାତ୍ରାର ଅୟମାରମ୍ଭ ପ୍ରତିବର୍ଷ ଏହି ସ୍ଥାନରୁ ହିଁ ହୋଇଥାଏ । ଏଠାରୁ ଆଜ୍ଞାମାଳ ଗଲା ପରେ ବୋରିଗୁମ୍ମା, ନବରଙ୍ଗପୁର ଜିଲ୍ଲା ର କୋଷାଗୁମୁଡ଼ା, ଧଣ୍ଡରା ଓ ପରିଶେଷରେ ଧୋଡ୍ରା ଠାରେ କ୍ରମାନ୍ୱୟରେ ଯାତ୍ରା ଅନୁଷ୍ଠିତ ହୋଇଥାଏ ।
କିମ୍ବଦନ୍ତୀ ଅନୁସାରେ ଜଣେ ଜୈନ ସନ୍ୟାସୀ ବି.ସିଂହପୁର ନିକଟସ୍ଥ ପାହାଡ ଶୀଖରରେ ଥିବା ଏକ ଗୁମ୍ଫା ମଧ୍ୟରେ ମାଆଙ୍କୁ ରୀତିମତ ପୂଜାପାଠ କରି ଆସୁଥିଲେ । ଦିନେ ପୂଜା ସାରି ଫେରିବା ବେଳକୁ ଅଧା ରାସ୍ତାରେ ପାଣି ପାତ୍ର ଗୁମ୍ଫାରେ ଭୁଲି ଆସିଥିବା ମନେ ପକାଇ ସନ୍ୟାସୀ ଜଣକ ଗୁମ୍ଫାକୁ ଫେରିବାରୁ ଦେବୀ ରାଗି ଯାଇ ପାତ୍ର ଟିକୁ ଫୋପାଡ଼ି ଦେଇଥିଲେ, ଯାହାକି ପ୍ରାୟ ୨ କିଲୋମିଟର ଦୂର ରେ ପଡିଥିଲା । ସେହି ଗୁମ୍ଫା ର କବାଟ ବନ୍ଦ ହୋଇଗଲା ଓ ଆଜିଯାଏଁ କେହି ଖୋଲିପାରି ନାହାଁନ୍ତି ।
ସେହି ପାତ୍ର ପଡିଥିବା ଅଞ୍ଚଳରେ ପ୍ରତିବର୍ଷ ମଣ୍ଡେଇ ଯାତ୍ରା ଅନୁଷ୍ଠିତ ହୋଇଆସୁଛି । ଏଠାରୁ ଆଜ୍ଞାମାଳ ପାଇବା ପରେ ଆସନ୍ତା ୧୧ ତାରିଖ ଶୁକ୍ରବାର ଦିନ ବୋରିଗୁମ୍ମାରେ ଅନୁଷ୍ଠିତ ହେବ ବୋଲି ମନ୍ଦିର ପୂଜକ ପ୍ରକାଶ କରିଛନ୍ତି ।