ରିପୋର୍ଟ: ବିମଳେନ୍ଦୁ ସାହୁ //
ଲୋଇସିଂହା,(୦୧/୦୮) : ମହିଳା ଓ ଶିଶୁ ବିକାଶ କଲ୍ୟାଣ ବିଭାଗ ତଥା ମିଶନ ଶକ୍ତି ମନ୍ତ୍ରୀ ଶ୍ରୀମତୀ ଟୁକୁନି ସାହୁ ରବିବାର ଲୋଇସିଂହା ବ୍ଲକ ଗସ୍ତରେ ଆସି ବିଭିନ୍ନ ଅଙ୍ଗନବାଡି କେନ୍ଦ୍ର ପରିଦର୍ଶନ କରିଛନ୍ତି ।
ମନ୍ତ୍ରୀ ଶ୍ରୀମତୀ ଟୁକୁନି ସାହୁ ସ୍ଥାନୀୟ ସମନ୍ବିତ ଶିଶୁ କଲ୍ୟାଣ ବିଭାଗ କାର୍ଯ୍ୟାଳୟରେ ପହଞ୍ଚି ପ୍ରତି ମାସ ପହିଲା ତାରିଖରେ ହେଉଥିବା ଛତୁଆ ବଣ୍ଟନ କାର୍ଯ୍ୟର ସମୀକ୍ଷା କରିଥିଲେ । ପରେ ସେ ଟେଭାଡୁଙ୍ଗୁରି, ଲୁହୁରାପାଲି, ବୁର୍ଡା ଓ ଦୁମଦୁମି ଅଙ୍ଗନବାଡି କେନ୍ଦ୍ର ବୁଲି ଦେଖିବା ସହିତ ଛତୁଆ ବଣ୍ଟନ କରିଥିଲେ । ଏଥିସହିତ ଅଙ୍ଗନବାଡି କେନ୍ଦ୍ର ଗୁଡିକରେ ଉପସ୍ଥିତ ମା ଓ ଶିଶୁ ମାନଙ୍କ ସହିତ ଭାବ ବିନିମୟ କରିବା ସହିତ “ଉପକାରୀ ବଗିଚା” ପରିଦର୍ଶନ କରିଥିଲେ । ଛତୁଆର ସ୍ୱାଦ ପରଖିବା ସହିତ ତାକୁ ଆହୁରି ଉଚ୍ଚମାନର କରାଯିବା ଉପରେ ସେ ଗୁରୁତ୍ୱାରୋପ କରିଥିଲେ ।
ଏଥିସହିତ ବିଭିନ୍ନ ଅଙ୍ଗନବାଡି କେନ୍ଦ୍ରରେ ବିଜୁଳି ସଂଯୋଗ ତଥା ପାନୀୟ ଜଳ ଯୋଗାଣ ଓ ପାଇଖାନାର ବ୍ୟବସ୍ଥା ନ ଥିବାରୁ ଖୁବଶୀଘ୍ର ଏ ଦିଗରେ ପଦକ୍ଷେପ ନେବେ ବୋଲି ମନ୍ତ୍ରୀ ଶ୍ରୀମତୀ ସାହୁ ପ୍ରତିଶ୍ରୁତି ଦେଇଥିଲେ । ତାଙ୍କର ଏହି ଗସ୍ତ ସମୟରେ ସିଡିପିଓ ପ୍ରଜ୍ଞାରାଣୀ ବାରିକଙ୍କ ସମେତ ଅଙ୍ଗନବାଡି ସୁପରଭାଇଜର ମାନେ ଉପସ୍ଥିତ ଥିଲେ ।