ରିପୋର୍ଟ : ନରତ୍ତମ ପାଢ଼ୀ
ହାଟମୁନିଗୁଡା, (୨୮/୯) : ରାୟଗଡ଼ା ଜିଲ୍ଲା ବିଷମକଟକ ବ୍ଲକ ର ହାଟମୁନିଗୁଡା ପଞ୍ଚାୟତ ଟି ଭୌଗୋଳିକ ଦୃଷ୍ଟି କୋଣରୁ ବୃହତ ଥିବାରୁ ଅନେକ ଗ୍ରାମବାସୀ କୌଣସି ସମସ୍ୟା ର ଅଭିଯୋଗ ପାଇଁ ଗ୍ରାମ ପଞ୍ଚାୟତ କାର୍ଯାଳୟକୁ ଆସିବା ହେଉ ବା ସାଧାରଣ ବଣ୍ଟନରେ ଦିଆଯାଉଥିବା ଚାଉଳ ନେବା ପାଇଁ ରେଳ ଲାଇନ ଡେଇଁ ବହୁ ଦୁର ଦୁରାନ୍ତ ଦେଇ ଆସିବାକୁ ପଡୁଥିଲା ।
ତେଣୁ ଆଜକୁ ୫ ବର୍ଷ ତଳେ ଏହି ପଞ୍ଚାୟତ କୁ ବିଭାଜନ କରି ଦୁଇ ଭାଗ କରାଗଲା । ନୂତନ ଭାବରେ ଗଢା ଯାଇଥିବା ଡାଲିଆକୁଜି ଗ୍ରାମ ପଞ୍ଚାୟତ ଟି ଅସ୍ଥାୟୀ ଭାବେ ଚାଲୁଥିବା ବେଳେ ନୂତନ କୋଠା କାମ ସରିବା ପରେ ପଞ୍ଚାୟତ ର କାର୍ଯ୍ୟାଳୟ ଆରମ୍ଭ ହୋଇଥିଲେ ସୁଦ୍ଧା ସେହି ପଞ୍ଚାୟତ ର ହିତାଧିକାରୀ ମାନେ ହାଟମୁନିଗୁଡା ପଞ୍ଚାୟତ ରୁ ଚାଉଳ ନେଉଥିବାରୁ, ନିଜ ପଞ୍ଚାୟତରେ ଚାଉଳ ଯୋଗାଇ ଦେବାକୁ ପଞ୍ଚାୟତ ବାସୀ ବହୁବାର ବିଡିଓ ଙ୍କୁ ଅନୁରୋଧ କରି ଆସୁଥିଲେ । ବିଷମକଟକ ବ୍ଲକରେ ନୂତନ ଭାବରେ କାର୍ଯ୍ୟରେ ଯୋଗ ଦେଇଥିବା ବିଡିଓ ଶ୍ରୀ ସଦାଶିବ ନାୟକଙ୍କୁ ପଞ୍ଚାୟତବାସୀ ଜଣାଇବା ପରେ ଆଜି ପ୍ରଥମ ଥର କରି ଡାଲିଆକୁଜି ପଞ୍ଚାୟତରେ ଚାଉଳ ବଣ୍ଟନ କରାଯାଇଛି ।
ଯାହାକୁ ନେଇ ହିତାଧିକାରୀ ମାନେ ଖୁସିବ୍ୟକ୍ତ କରିବା ସହ ବିଡିଓ, ସରପଞ୍ଚ ଓ ସମିତି ସଭ୍ୟଙ୍କୁ ଧନ୍ୟବାଦ ଦେଇଛନ୍ତି । ଏହି କାର୍ଯ୍ୟକ୍ରମରେ ବିଷମକଟକ ବିଡ଼ିଓ ଶ୍ରୀ ସଦାଶିବ ନାୟକ, ପଞ୍ଚାୟତ ନିର୍ବାହୀ ଅଧିକାରୀ ମଳୟ ନାୟକ, ବିଷମକଟକ ବ୍ଲକ ଚ୍ୟାରମେନ, ଜି ଆର ଏସ୍ ପୁରୁଷୋତ୍ତମ ବିଭାର, ଜ୍ୟୋତି ପ୍ରସାଦ ସାହୁ, ଦେବୀ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ ।