ରିପୋର୍ଟ : ବିମଳେନ୍ଦୁ ସାହୁ
ଲୋଇସିଂହା,(୨୫/୦୮) : ଲୋଇସିଂହା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଜନୈକା ରୋଗୀଙ୍କୁ ୬ ମାସ ତଳର ଏକ୍ସପାଏରି ସାଲାଇନ ଦିଆଯାଇଥିବା ଅଭିଯୋଗ ହୋଇଛି । ସଂପୃକ୍ତ ରୋଗୀଙ୍କ ଅବସ୍ଥା ବର୍ତ୍ତମାନ ସ୍ଥିର ଥିବା ବେଳେ ହସ୍ପିଟାଲ କର୍ତ୍ତୃପକ୍ଷଙ୍କ ଖାମଖିଆଲି ମନୋଭାବ ଯୋଗୁଁ ଏଭଳି ଘଟଣା ଘଟିଥିବା ଜଣାଯାଇଛି ।
ଲୋଇସିଂହା ବ୍ଲକ କନ୍ଦାଜୁରୀ ଗ୍ରାମର ମକୁନ୍ଦ ପଧାନଙ୍କ ଭଉଣୀ ସନ୍ତୋସିନୀ (୧୮) ଙ୍କ ଦେହ ଅସୁସ୍ଥ ହେବାରୁ ଗତ ୨୨ ତାରିଖରେ ସେ ଲୋଇସିଂହା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ । ତା ପରଦିନ ଅର୍ଥାତ ୨୩ ତାରିଖ ରାତିରେ ତାଙ୍କୁ D5 ନାମକ ଏକ ସାଲାଇନ ଦିଆଯାଇଥିଲା । ତେବେ ସାଲାଇନ ନେବାର କିଛି ସମୟ ପରେ ସନ୍ତୋସିନୀଙ୍କ ମୁଣ୍ଡ ବୁଲାଇବା ସହିତ ବାନ୍ତି ହୋଇଥିବା ନେଇ ତାଙ୍କ ବଡ଼ ଭାଇ ମକୁନ୍ଦ ଅଭିଯୋଗ କରିଛନ୍ତି ।
ସାଲାଇନର ଅବଧି ମାର୍ଚ୍ଚ ୨୦୨୧ ରେ ଶେଷ ହୋଇ ଯାଇଥିବା ବେଳେ କିଭଳି ରୋଗୀଙ୍କୁ ଏକ୍ସପାଏରି ସାଲାଇନ ଦିଆଗଲା, ସେ ନେଇ ରୋଗୀଙ୍କ ବଡ଼ଭାଇ ମକୁନ୍ଦ ପ୍ରଶ୍ନ ଉଠାଇଛନ୍ତି । ଏ ନେଇ ଲୋଇସିଂହା ହସ୍ପିଟାଲର ମେଡିକାଲ ଅଫିସର ଡା ପ୍ରତିମା ସୋରେନଙ୍କୁ ପଚାରିବାରେ ସେ ଘଟଣାକୁ ସ୍ୱୀକାର କରିବା ସହିତ ଏ ନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇବେ ବୋଲି ପ୍ରକାଶ କରିଥିଲେ ।
ତେବେ ଗତ ମାର୍ଚ୍ଚ ମାସରୁ ପ୍ରାୟ ୨୫ ଟି D5 ସାଲାଇନ ଷ୍ଟୋରରୁମରୁ ରୋଗୀଙ୍କ ପାଇଁ ଦିଆଯାଇ ଥିବାବେଳେ ସେଥିରୁ ଭୁଲ ବଶତଃ ଗୋଟିଏ ରହିଯାଇଥିବା ନେଇ ଫାର୍ମାସିଷ୍ଟ ମହାଦେବ ରଣା ସଫେଇ ଦେଇଛନ୍ତି । ବଲାଙ୍ଗୀର ସିଡିଏମଓ ଏଥିପ୍ରତି ଦୃଷ୍ଟିଦେଇ ଏହି ଘଟଣାରେ ଦାୟୀ ବ୍ୟକ୍ତିବିଶେଷଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ସକାଶେ ଦାବି ହେଉଛି ।