ରିପୋର୍ଟ : ସନ୍ତୋଷ କୁମାର ନାୟକ
ବଲାଙ୍ଗୀର, ତା(୧୭/୦୯) : ଜାତୀୟ ରାଜପଥ ୫୭ର ସାତମାଇଲ ଛକ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଏଥିରେ ଘଟଣାସ୍ଥଳରେ ଜଣଙ୍କର ଶୋଚନୀୟ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ହୋଇଥିବା ସୂଚନା ମିଳିଛି । ଏହାକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିବା ବେଳେ ପୁଇଁତଲା ପୋଲିସ ଘଟଣା ସ୍ଥଳରେ ପହଞ୍ଚି ଆହତଙ୍କୁ ଜିଲ୍ଲା ମେଡିକାଲ କଲେଜ ଡାକ୍ତରଖାନା କୁ ପଠେଇଥିଲେ ।
ସୂଚନା ଅନୁସାରେ ବାଇକକୁ ଏକ ଟ୍ରକ୍ ଧକ୍କା ଦେବା ଫଳରେ ଏହି ସଡ଼କ ଦୁର୍ଘଟଣା ଘଟିଛି । ମୃତକ କୁଲେରବାହାଲି ଗ୍ରାମର ଅର୍ଜୁନ ବାଗ ବୋଲି ଜଣାପଡିଛି । ଅର୍ଜୁନ ଓ ଲମ୍ବୋଦର ଟିମାପାଲିରୁ ସାତମାଇଲ ଫେରୁଥିଲେ । ବଲାଙ୍ଗୀରରୁ (ଓଆର ୧୫କିଉ ୩୨୩୮ )ନମ୍ବର ବିଶିଷ୍ଟ ଏକ ମାଲବାହୀ ଟ୍ରକ ଦ୍ରୁତ ଗତିରେ ଆସି ଅର୍ଜୁନ ଙ୍କ ବାଇକକୁ ଧକ୍କା ଦେଇଥିଲା । ଘଟଣା ସ୍ଥଳରେ ଅର୍ଜୁନଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଲମ୍ବୋଦର ବଗର୍ତୀ ଗୁରୁତର ଅବସ୍ଥାରେ ଥିଲେ ।
ଉକ୍ତ ବ୍ୟକ୍ତି ଦ୍ୱୟ ବଲାଙ୍ଗୀର ନିକଟସ୍ଥ ଟିମାପାଲି ଗ୍ରାମ ର ବୋଲି ଜଣାଯାଇଥିଲା । ଲମ୍ବୋଦରଙ୍କୁ ଗୁରତର ଅବସ୍ଥାରେ ବଲାଙ୍ଗୀର ଭୀମଭୋଇ ମେଡିକାଲରେ ଭର୍ତ୍ତି କରାଯାଇଛି । ଅର୍ଜୁନ ଓ ଲମ୍ବୋଦର ଦୁହିଜଣ ତାଙ୍କ ଶ୍ୱଶୁର ଘର ଟିମାପାଲିରୁ ସାତମାଇଲ ପଟକୁ ଫେରୁଥିଲେ । ଘଟଣା ସ୍ଥଳରେ ପୁଇଁତଳା ପୋଲିସ ପହଞ୍ଚି ଡ୍ରାଇଭରକୁ ଉଦ୍ଧାର କରି ଟ୍ରକକୁ ଅଟକ ରଖିଛି ।
ଅନ୍ୟ ପଟେ ଉତ୍ତ୍ୟକ୍ତ ଲୋକେ କ୍ଷତିପୂରଣ ଦାବିରେ ରାଜରାସ୍ତା ଅବରୋଧ କରିଥିଲେ । ବଲାଙ୍ଗୀର-ସୋନପୁର ରାଜରାସ୍ତାର ଦୁହି ପାର୍ଶ୍ଵରେ ସହସହ ଗାଡ଼ି ଠିଆହୋଇ ରହିଯାଇ ଥିଲା । ଶେଷରେ ପୁଇଁତଲା ତହସିଲଦାର ଓ ପୋଲିସ ଘଟଣା ସ୍ଥଳରେ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତା ଅବରୋଧ ହଟିଥିଲା ।