ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ଭଦ୍ରକ, (୦୪/୦୭) : ଭଦ୍ରକ ଜିଲ୍ଲା ବାସୁଦେବପୁର ଥାନା ଅଞ୍ଚଳର ରଥପଦା ଗାଁରେ ଏକ ଅଭାବନୀୟ ଘଟଣା ଘଟିଛି । ଦୁଇ ମାସ ପୂର୍ବରୁ ବିବାହ ବନ୍ଧନରେ ବାନ୍ଧିହୋଇଥିବା ନବବଧୂର ମୃତ୍ୟୁ ହୋଇଛି । ମୃତ ନବବଧୂ ମାନସୀ ବୋଲି ପରିଚୟ ମିଳିଛି ।
ସୂଚନା ଅନୁସାରେ, ଦୁଇ ମାସ ପୂର୍ବରୁ ବିରୁପାକ୍ଷ ଦାସ ବେହେରାଙ୍କୁ ମାନସୀକୁ ବିବାହ କରିଥିଲେ । ବିବାହର କିଛି ଦିନ ପରେ ବିରୁପାକ୍ଷ କାମ କରିବା ପାଇଁ ବାହାରକୁ ଯାଇଥିଲେ । ନବବଧୂକୁ ନେଇ ପରିବାର ହସଖୁସିରେ ଚାଲିଥିଲା । କିନ୍ତୁ ଗତ ମଙ୍ଗଳବାର ମାନସୀ କୌଣସି କାରଣରୁ ପରିବାର ଲୋକଙ୍କ ସହ କଥା ନ ହୋଇ ନିଜ ଶୋଇବା ଘରେ ପଶି କବାଟ ଦେଇଥିଲେ । ବହୁ ବିଳମ୍ବ ପରେ ପରିବାର ଲୋକ ବୋହୂକୁ ନ ପାଇବାରୁ ଘରେ ଖୋଜିଥିଲେ । ପରେ ଦେଖିଥିଲେ ଯେ, ମାନସୀ ନିଜ ଶୋଇବା ଘରେ କବାଟ ଦେଇ ଅଛନ୍ତି । ପରିବାର ଲୋକେ, ମାନସୀଙ୍କୁ ବହୁ ଡାକିଥିଲେ ମଧ୍ୟ ସେ କୌଣସି ଉତ୍ତର ଦେଇନଥିଲେ । ପରିବାର ଲୋକେ, କବାଟ ଭାଙ୍ଗି ଦେଖିଥିଲେ ଯେ ବୋହୂ ନିଜ ଜୀବନ ହାରିଛି ।
ପରିବାର ଲୋକେ ତାଙ୍କୁ ତୁରନ୍ତ ଉଦ୍ଧାର କରି ବାସୁଦେବପୁର ଡାକ୍ତରଖାନା ଭର୍ତ୍ତି କରିଥିଲେ । କିନ୍ତୁ ଡାକ୍ତର ସେଟରେ ତାଙ୍କୁ ମୃତ ବୋଲି ଘୋଷଣା କରିଥିଲେ । ଏହି ଘଟଣା ପରେ ମାନସୀଙ୍କ ବାପା ଘର ଲୋକେ ଯୌତୁକ ପାଇଁ ଶାଶୁ ଘର ଲୋକେ ମାନସୀଙ୍କୁ ହତ୍ୟା କରିଥିବା ଅଭିଯୋଗ କରିଥିଲେ । ଏହା ହତ୍ୟା ନା ଆତ୍ମହତ୍ୟା ବର୍ତ୍ତମାନ ସନ୍ଦେହ ଘେରରେ । ପୋଲିସ ଏହି ଘଟଣାର ତଦନ୍ତ ଜାରି କରିଛି । ଏହି ଘଟଣା ପରେ ପରିବାରରେ ଶୋକର ଛାୟା ଖେଳିଯାଇଛି ।
