ରିପୋର୍ଟ : ସନ୍ତୋଷ କୁମାର ନାୟକ
ଟିଟିଲାଗଡ଼,(୧୧/୧୦) : ଭୁଲ ଟ୍ରେନ ରେ ଚଢ଼ି ଯାଇଥିବା ଜାଣି ଅଧର୍ଯ୍ୟ ହୋଇ ଚଳନ୍ତା ଟ୍ରେନ୍ରୁ ଡେଇଁ ପଡ଼ିଥିବା ଜଣେ ଯୁବକଙ୍କୁ ଗୁରୁତର ଅବସ୍ଥାରେ ଜିଆରପି ପୋଲିସ ଉଦ୍ଧାର କରିଥିବା ସୂଚନା ମିଳିଛି । ଭୋର ସକାଳ ୫ ଟାରେ ବଲାଙ୍ଗୀର ଜିଲ୍ଲା ଟିଟିଲାଗଡ଼ ରେଳ ଷ୍ଟେସନ ରୁ କିଛି ଦୂର ରେଳ ଅଣ୍ଡରବ୍ରିଜ ନିକଟରେ ଏହି ଅଘଟଣ ଘଟିଥିବା ବେଳେ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି ।
ସୂଚନା ଅନୁସାରେ ବରଗଡ଼ ଜିଲ୍ଲା ଅତାବିରା ଥାନା ଅଧିନସ୍ଥ ଟୁବାପଡା ଗାଁର ଶିବ ଶଙ୍କର ନିଜ ମାନସିକ ବ୍ରତ ପାଇଁ ଆନ୍ଧ୍ରପ୍ରଦେଶର ତିରୁପତି ଯାଇଥିଲେ । ସେଠାରୁ ସେ ଆଜି ଟ୍ରେନ ଯୋଗେ ଫେରି ଟିଟିଲାଗଡ଼ ଷ୍ଟେସନ୍ରେ ପହଞ୍ଚିଥିଲେ । ତାଙ୍କୁ ଟିଟିଲାଗଡ଼ରୁ ପୁଣି ଅନ୍ୟ ଏକ ଟ୍ରେନ ଯୋଗେ ନିଜ ଗାଁକୁ ଯିବାର ଥିଲା । ସେଥିପାଇଁ ସେ ଟିଟିଲାଗଡ଼-ହାଓ୍ଵଡ଼ା ସ୍ୱତନ୍ତ୍ର ଏକ୍ସପ୍ରେସ୍ ଟ୍ରେନ୍କୁ ଅପେକ୍ଷା କରିଥିଲେ । ଶିବ ଶଙ୍କର କିନ୍ତୁ ଭୁଲବଶତଃ ସମ୍ବଲପୁର ବିଶାଖାପଟ୍ଟନମ-କୋରବା ସ୍ୱତନ୍ତ୍ର ଏକ୍ସପ୍ରେସ୍ ଟ୍ରେନ୍ରେ ଚଢ଼ି ଯାଇଥିଲେ । ତେବେ ଟିଟିଲାଗଡ଼ ଓଭରବ୍ରିଜ ନିକଟରେ ପହଞ୍ଚିବା ପରେ ସେ ଜାଣିବାକୁ ପାଇଥିଲେ ଯେ ଟ୍ରେନ ଟି ରାୟପୁର ପଟକୁ ଯାଉଛି । ତେଣୁ ଭୁଲ ଟ୍ରେନ ରେ ଚଢ଼ି ଯାଇଥିବା ଜାଣି ସେ ହାଟପଦାପଡ଼ା ନିକଟରେ ଚଳନ୍ତା ଟ୍ରେନରୁ ତଳକୁ ଡ଼େଇଁ ପଡ଼ିଥିଲେ ।
ଫଳରେ ତାଙ୍କ ବାମ ଗୋଡ଼ ଟ୍ରେନ ଚକ ତଲେ ପଡ଼ିଯିବାରୁ ସେ ଗୁରୁତର ଆହତ ହୋଇଥିଲେ । ଟିଟିଲାଗଡ଼ ଜିଆରପି ପୋଲିସ ଅଧିକାରୀ ଅବନୀ ସାହୁ ଘଟଣାସ୍ଥଳ ରେ ପହଞ୍ଚି ତାଙ୍କୁ ଉଦ୍ଧାର କରି ସ୍ଥାନୀୟ ଉପଖଣ୍ଡ ଡାକ୍ତରଖାନା ରେ ପହଞ୍ଚେଇଥିଲେ । ହେଲେ ଡାକ୍ତର ତାଙ୍କ ଅବସ୍ଥା ଗୁରୁତର ଥିବାରୁ ବଲାଙ୍ଗୀର ଭୀମ ଭୋଇ ମେଡିକାଲକୁ ସ୍ଥାନାନ୍ତର କରିଥିବା ଜଣାଇଛନ୍ତି ।