ରିପୋର୍ଟ : ସୁଭାସିସ ନାୟକ
ମୁମ୍ବାଇ,(୨୧/୧୦) : ମୁମ୍ବାଇ ଡ୍ରଗସ୍ କାରବାରରେ ଗିରଫ ହୋଇ ଜେଲରେ ଥିବା ଶାହାରୁଖ୍ ଖାନଙ୍କ ପୁଅ ଆର୍ଯ୍ୟନ୍ ଖାନଙ୍କ ଜାମିନ ଆଜି ପୁଣି ଖାରଜ ହୋଇଯାଇଛି । ଆର୍ଯ୍ୟନ୍ ସମେତ ତାଙ୍କ ବାନ୍ଧବୀ ମୁନ୍ ମୁନ୍ ଧମେଚା ଏବଂ ଅରବାଜ୍ ମର୍ଚାଣ୍ଟଙ୍କ ଜାମିନ ମଧ୍ୟ ଖାରଜ ହୋଇଯାଇଛି । ତେବେ କୋର୍ଟଙ୍କ ରାୟ ପରେ ଏନ୍ସିବି ଜୋନାଲ ନିର୍ଦ୍ଦେଶକ ସମୀର ୱାଙ୍ଖଡେ଼ କିଛି ପ୍ରତିକ୍ରିୟା ଦେବାକୁ ମନା କରିଦେଇଥିବା ବେଳେ କେବଳ ‘ସତ୍ୟମେବ ଜୟତେ’ ବୋଲି କହିଛନ୍ତି ।
ମୁମ୍ବାଇ କ୍ରୁଜ୍ ଡ୍ରଗ୍ସ ମାମଲାରେ ମୁମ୍ବାଇର ସ୍ୱତନ୍ତ୍ର ଏନଡିପିଏସ୍ କୋର୍ଟ ବୁଧବାର ଆର୍ଯ୍ୟନ୍ ଖାନଙ୍କ ଜାମିନ ଆବେଦନକୁ ଅଗ୍ରାହ୍ୟ କରିଦେଇଛନ୍ତି । ଏହି ମାମଲାରେ ଅନ୍ୟ ଦୁଇ ଅଭିଯୁକ୍ତ ଅରବାଜ ମର୍ଚାଣ୍ଟ ଏବଂ ମୁନ୍ମୁନ୍ ଧମେଚାଙ୍କ ଜାମିନ ଆବେଦନ ମଧ୍ୟ ପ୍ରତ୍ୟାଖ୍ୟାନ ହୋଇଛି । ଆଜି ଶୁଣାଣି ବେଳେ ବରିଷ୍ଠ ଆଡଭୋକେଟ ଅମିତ ଦେଶାଇଙ୍କ ସହ ଆଡଭୋକେଟ ସତୀଶ ମନସିନେ୍ଧ ଆର୍ଯ୍ୟନ୍ ଙ୍କ ପକ୍ଷରୁ ଦସ୍ତାବେଜ୍ ଉପସ୍ଥାପନ କରିଥିଲେ ।
ଆର୍ଯ୍ୟନ୍ ଙ୍କ ସମେତ ସମ୍ପୃକ୍ତ ୩ ଅଭିଯୁକ୍ତଙ୍କ ପକ୍ଷରୁ ଦାଖଲ ହୋଇଥିବା ଜାମିନ ଆବେଦନକୁ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି) ବିରୋଧ କରିଥିଲା । ନାର୍କୋଟିକ୍ ଡ୍ରଗ୍ସ ଏବଂ ସାଇକୋଟ୍ରୋପିକ୍ ପଦାର୍ଥ ଅଧିନିୟମ ଅନୁଯାୟୀ ଅଭିଯୁକ୍ତଙ୍କ ବିରୋଧରେ ଡ୍ରଗସ୍ ଏବଂ ଅପରାଧିକ ଷଡ଼ଯନ୍ତ୍ର ମାମଲା ରୁଜୁ ରାକଯାଇଛି । ଏହା ପୂର୍ବରୁ ଆର୍ଯ୍ୟନ୍, ଅରବାଜ୍ ମର୍ଚାଣ୍ଟ ଏବଂ ମୁନ୍ମୁନ୍ ଧମେଚାଙ୍କ ମାଜିଷ୍ଟ୍ରେଟ୍ କୋର୍ଟ ଜାମିନ ନାମଞ୍ଜୁର କରିଥିଲେ । ପରେ ସ୍ୱତନ୍ତ୍ର ଏନଡିପିଏସ୍ କୋର୍ଟରେ ବେଲ ପିଟିସନ୍ ଦାୟର କରାଯାଇଥିଲା ।
ଗତ ଅକ୍ଟୋବର ୨ ରେ ମୁମ୍ବାଇ ଉପକୂଳରୁ ଏକ କ୍ରୁଜ୍ ଜାହାଜରୁ ଡ୍ରଗ୍ସ ଜବତ ହେବା ସହ ସମ୍ପୃକ୍ତ ଅଭିଯୁକ୍ତମାନଙ୍କୁ ଗିରଫ କରାଯାଇଥିଲା । ବର୍ତ୍ତମାନ ଅଭିଯୁକ୍ତ ମାନେ ଆର୍ଥର ରୋଡ ଜେଲରେ ଅଛନ୍ତି ।