ଭୁବନେଶ୍ୱର, (୨୯/୦୩) : ଆ.ପ୍ର. : ବହୁ ଚର୍ଚ୍ଚିତ IAS ଅଫିସର ସୁଜାତା ଆର କାର୍ତ୍ତିକେୟନ ଚାକିରିରୁ ବିଦାୟ ନେଇଛନ୍ତି ।
ଭି.କେ ପାଣ୍ଡିଆନଙ୍କ ପତ୍ନୀ ସୁଜାତାଙ୍କ ଦ୍ୱାରା ଦାଖଲ ହୋଇଥିବା VRS (ଅଗ୍ରିମ ଅବସର) ଅନୁରୋଧକୁ କେନ୍ଦ୍ର ସରକାର ମଞ୍ଜୁରି ଦେଇଛି । ଖୁବଶୀଘ୍ର ଏନେଇ ସରକାରୀ ଘୋଷଣା ପ୍ରକାଶିତ ହେବ । ସାଧାରଣ ନିର୍ବାଚନ ପରେ ସୁଜାତା ୬ ମାସ ଛୁଟିରେ ଥିଲେ, ପରେ ଆଉ ୬ ମାସ ଛୁଟି ବଢ଼ାଇବାକୁ ଆବେଦନ କରିଥିଲେ । କିନ୍ତୁ ରାଜ୍ୟ ସରକାର ତାଙ୍କ ଦ୍ୱିତୀୟ ଛୁଟି ଅନୁରୋଧ ଅସ୍ୱୀକାର କରିଦେଇଥିଲା। ଏହି ପରିସ୍ଥିତିରେ ସେ ଚାକିରିରୁ ଅବସର ନେବାକୁ ବାଧ୍ୟ ହୋଇଥିଲେ ।
ପୂର୍ବରୁ ଭି.କେ ପାଣ୍ଡିଆନ ମଧ୍ୟ ନିର୍ବାଚନ ପୂର୍ବରୁ VRS ନେଇଥିଲେ ଏବଂ ବିଜେଡି ଦଳରେ ଯୋଗ ଦେଇଥିଲେ । ଏବେ ତାଙ୍କ ସ୍ତ୍ରୀ ସୁଜାତା ମଧ୍ୟ ଚାକିରି ଛାଡି ଦେଇଥିବା ଖବର ଆସିଛି । ଏହାପରେ ସେ କଣ କରିବେ ଏବଂ ତାଙ୍କ ଭବିଷ୍ୟତ ଯୋଜନା କ’ଣ, ଏନେଇ ଦୃଷ୍ଟି ରଖିଛି ରାଜନୈତିକ ଓ ପ୍ରଶାସନିକ ମହଳ ।
