ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ନୂଆଦିଲ୍ଲୀ, (୦୯/୧୨) : ବୁଧବାର ଦିନ ଗନ୍ତବ୍ୟସ୍ଥଳରେ ପହଞ୍ଚିବାର କିଛି କ୍ଷଣ ପୂର୍ବରୁ ବାୟୁସେନାର ‘ଏମ୍ଆଇ-୧୭ଭି୫’ ହେଲିକପ୍ଟର୍ ଦୁର୍ଘଟଣାରେ ପ୍ରାଣ ହରାଇଥିବା ୧୩ ଜଣଙ୍କ ମଧ୍ୟରୁ ଜଣେ ଥିଲେ ସିଡିଏସ୍ ଜେନେରାଲ୍ ବିପିନ ରାୱତ୍ଙ୍କ ପତ୍ନୀ ମଧୁଲିକା ।
ୱେଲିଙ୍ଗ୍ଟନ୍ସ୍ଥିତ ‘ଡିଫେନ୍ସ୍ ସର୍ଭିସ୍ ଷ୍ଟାଫ୍ କଲେଜ୍’ ରେ ଉଦ୍ବୋଧନ ଦେବାକୁ ଯାଉଥିବା ସିଡିଏସ୍ ଜେନେରାଲ୍ ବିପିନ ରାୱତ୍ଙ୍କ ସହ ଥିଲେ ତାଙ୍କ ପତ୍ନୀ ‘ଆର୍ମି ୱାଇଭ୍ସ୍ ୱେଲ୍ଫେୟାର୍ ଆସୋସିଏସନ୍’ ର ଅଧ୍ୟକ୍ଷା ମଧୁଲିକା । ଅଧ୍ୟକ୍ଷତାରେ ଉପରୋକ୍ତ ସଂଗଠନ ସମାଜ ସେବାରେ ସକ୍ରିୟ ହୋଇ କାର୍ଯ୍ୟ କରୁଥିଲା । ତାଙ୍କ ନେତୃତ୍ୱରେ ସେନା ବିଧବାମାନଙ୍କ ପାଇଁ ଅନେକ କଲ୍ୟାଣମୂଳକ କାର୍ଯ୍ୟ କରାଯାଇଥିଲା ।
୧୯୮୬ ମସିହାରେ ମଧ୍ୟପ୍ରଦେଶ ର ଶାହଦୋଲ୍ବାସିନୀ ମଧୁଲିକା ବିପିନ ରାୱତ୍ଙ୍କୁ ବାହା ହୋଇଥିଲେ । ସେତେବେଳେ ବିପିନ ଥିଲେ ସେନାର ଜଣେ କପ୍ତାନ୍ । ସେମାନଙ୍କର ଦୁଇଟି ଝିଅ ଅଛନ୍ତି । ଦୁଇ ଝିଅଙ୍କ ମଧ୍ୟରୁ ଜଣେ ମୁମ୍ବାଇରେ ରହୁଥିବା ବେଳେ ଅନ୍ୟ ଜଣେ ସେମାନଙ୍କ ସହିତ ରହୁଥିଲେ ।
ଗ୍ବାଲିଅର୍ସ୍ଥିତ ‘ସିନ୍ଧିଆ କନ୍ୟା ବିଦ୍ୟାଳୟ’ ରୁ ସ୍କୁଲ୍ ପାଠ ଶେଷ କରିବା ପରେ ମଧୁଲିକା ଦିଲ୍ଲୀ ବିଶ୍ୱବିଦ୍ୟାଳୟରେ ମନସ୍ତତ୍ତ୍ୱ ଅଧ୍ୟୟନ କରିଥିଲେ । ସମ୍ପ୍ରତି ମଧୁଲିକାଙ୍କ ପରିବାର ଶାହଦୋଲ୍ ଜିଲ୍ଲା ମୁଖ୍ୟାଳୟରେ ଥିବା ତାଙ୍କ ପୂର୍ବଜ ଙ୍କ ବାସଭବନ ‘ରାଜାବାଗ୍’ ରେ ବସବାସ କରୁଛନ୍ତି ।
ତାଙ୍କର ପିତା ମୃଗେନ୍ଦ୍ର ସିଂହ ଥିଲେ ଶାହଦୋଲ୍ ଜିଲ୍ଲା ର ସୋହାଗପୁର ରିୟାସତ୍ ର ରିୟାସତ୍ଦାର୍ । ସେ ମଧ୍ୟରୁ କଂଗ୍ରେସ ପାର୍ଟି ର ଟିକେଟ୍ରେ ଉକ୍ତ ଜିଲ୍ଲା ରୁ ୧୯୬୭ ଏବଂ ୧୯୭୨ରେ ବିଧାୟକ ଭାବେ ବିଜୟ ଲାଭ କରିଥିଲେ । ଛତିଶଗଡ଼ର ମନ୍ତ୍ରୀ ଟିଏସ୍ ସିଂହଦେଓ କହନ୍ତି, ସ୍ୱର୍ଗତ ଜେନେରାଲ୍ ବିପିନ ରାୱତ୍ଙ୍କ ପତ୍ନୀ ମଧୁଲିକା ଜୀ ଥିଲେ ଆମ ପରିବାର ର ବନ୍ଧୁ ଏବଂ ଭୋପାଳରେ ସବୁବେଳେ ଆମକୁ ଭେଟୁଥିଲେ ।
ମଧୁଲିକାଙ୍କ ଭାଇ ଯଶୋଧନ ସିଂହ କହନ୍ତି, ଦିଲ୍ଲୀରେ ଦଶହରା ଅବସରରେ ସେ ବିପିନଙ୍କ ସହ ତାଙ୍କର ଶେଷ ଭେଟ ହୋଇଥିଲା । ମଧୁଲିକାଙ୍କ ପୂର୍ବଜ ଙ୍କ ଗ୍ରାମ ଶାହଦୋଲ୍ ଗସ୍ତ କରିବା ସହ ସେଠାରେ ସୈନିକ ସ୍କୁଲ୍ଟିଏ ସ୍ଥାପନ ପାଇଁ ସହାୟତା ଯୋଗାଇ ଦେବେ ବୋଲି ସେ ପ୍ରତିଶ୍ରୁତି ଦେଇଥିଲେ ।