ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୨୪/୪) : ଆଜି ରାୟଗଡ଼ା ଜିଲ୍ଲା ଗୁଣପୁର ନିର୍ବାଚନ ମଣ୍ଡଳୀ ପାଇଁ ବିଜେଡି ବିଧାୟକ ପ୍ରାର୍ଥୀ ଭାବେ ରଘୁନାଥ ଗମାଙ୍ଗ ନିଜ ନାମାଙ୍କନ ପତ୍ର ଗୁଣପୁର ଉପଜିଲ୍ଲାପାଳଙ୍କ ନିକଟରେ ଦାଖଲ କରିଛନ୍ତି ।
ରଘୁନାଥ ଗମାଙ୍ଗଙ୍କ ନେତୃତ୍ବରେ ନୂତନ ବସଷ୍ଟାଣ୍ଡ ଠାରେ ବିଜୁ ବାବୁଙ୍କ ପ୍ରତିମୂର୍ତ୍ତୀରେ ମାଲ୍ୟାର୍ପଣ କରି ଏକ ବିଶାଳ ଶୋଭାଯାତ୍ରା ଉପଜିଲ୍ଲାପାଳଙ୍କ କାର୍ଯ୍ୟାଳୟ ଅଭିମୁଖେ ବାହାରିଥିଲା । ଗୁଣପୁର ନିର୍ବାଚନ ମଣ୍ଡଳୀର ପ୍ରତି ବ୍ଲକ ଓ ପଞ୍ଚାୟତର ହଜାର ହଜାର ସଂଖ୍ୟାରେ ବିଜେଡି କର୍ମୀ ଓ ନେତା ଶୋଭାଯାତ୍ରାରେ ଯୋଗ ଦେବା ସହ, ବିଜେଡି ଜିନ୍ଦାବାଦ ନାରାବାଜି ଦେଇଥିଲେ । ନାରାବାଜି ସାଙ୍ଗକୁ ଆଦିବାସୀ ନୃତ୍ୟ ରେ ଗୁଣପୁର ସହର ଦୁଲୁକି ଉଠୁଥିଲା । ଏହି କାର୍ଯ୍ୟକ୍ରମରେ ଜିଲ୍ଲା ବିଜେଡି ସଭାପତି ଏନ୍ ଭାଷ୍କର ରାଓ , ରାଜ୍ୟ ସାଧାରଣ ସମ୍ପାଦକ ସୁଧୀର ଦାସ , ରାଜ୍ୟ ଛାତ୍ର ଜନତାଦଳର ଉପସଭାପତି ବିଷ୍ଣୁ ପଣ୍ଡା , ବ୍ଲକ ଜୁବ ସଭାପତି ଭାଷା ଶତପଥୀ , ଗୁଣପୁର ନଗର ସଭାପତି ରାମ ପଣ୍ଡା , ଦେଵୀ ଆଚାର୍ଯ୍ୟ , ଭାଗିରଥି ବିଷୋୟୀ ଓ ସମସ୍ତ କାଉନସିଲର ଓ କର୍ମୀମାନେ ଯୋଗ ଦେଇଥିଲେ ।
ଏହି ଅବସରରେ ଗୁଣପୁର ନିର୍ବାଚନ ମଣ୍ଡଳୀରେ ପୁଣି ଥରେ ଶଙ୍ଖକୁ ବିଜୟୀ କରାଇବାକୁ କର୍ମୀ ମାନେ ସଙ୍କଳ୍ପ ନେଇଥିଲେ । ଚଳିତ ନିର୍ବାଚନରେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ମଳ ଭାବମୂର୍ତ୍ତି , ଓଡ଼ିଶାର ବିକାଶ, ଜନ୍ମରୁ ମୃତ୍ୟୁ ପର୍ଯ୍ୟନ୍ତ ଯୋଜନା ଓ ବିକଶିତ ଓଡ଼ିଶା ଗଠନର ସ୍ବପ୍ନକୁ ନେଇ ଜନସାଧାରଣ ନିକଟରେ ପହଞ୍ଚିଵେ ବୋଲି ବିଧାୟକ ପ୍ରାର୍ଥୀ ରଘୁନାଥ ଗମାଙ୍ଗ କହିଛନ୍ତି ।