ରିପୋର୍ଟ : ରବିଶଙ୍କର ମହାପାତ୍ର
କୋରାପୁଟ, (୬/୫) : ଲୋକେ ଜମି ଦେବାକୁ ପ୍ରସ୍ତୁତ । ବୋରିଗୁମ୍ମା ବ୍ଳକ ରଣସପୁର ପଞ୍ଚାୟତର ଶତାଧିକ ଗ୍ରାମବାସୀ ଆଜି ତହସିଲ ଓ ବ୍ଲକ୍ କାର୍ଯ୍ୟାଳୟକୁ ପହଞ୍ଚି ତହସିଲଦାର ଓ ବି.ଡି.ଓ.ଙ୍କୁ ହାଇ ସ୍କୁଲ ନିର୍ମାଣ ପାଇଁ ଦାବି ପତ୍ର ପ୍ରଦାନ କରିଛନ୍ତି ।
ରଣସପୁର ଗ୍ରାମବାସୀ ସରକାରୀ ହାଇସ୍କୁଲ ପାଇଁ ଲୋକେ ଜମି ଦେବାକୁ ପ୍ରସ୍ତୁତ ଥିବା ଜଣାଯାଇଛି ନିଷ୍ପତ୍ତି ପ୍ରକାରେ ପ୍ରଶାସନକୁ ଆବେଦନ ପ୍ରଦାନ । ଏଥି ପୂର୍ବରୁ ସରପଞ୍ଚ ଟଙ୍କଧର ନାୟକଙ୍କ ନେତୃତ୍ୱରେ ଚଳିତ ମାସ ୩ ତାରିଖରେ ଏକ ବୈଠକ କରାଯାଇ ଗ୍ରାମବାସୀଙ୍କ ନିଷ୍ପତ୍ତି ପ୍ରକାରେ ପ୍ରଶାସନକୁ ଏହି ଆବେଦନ ପ୍ରଦାନ କରିଥିବା ଜଣାପଡିଛି । ଆବେଦନ ପ୍ରକାରେ ରଣସପୁର ପଞ୍ଚାୟତରେ ଏକ ସରକାରୀ ଉଚ୍ଚ ବିଦ୍ୟାଳୟ ଖୋଲିବା ପାଇଁ ସରକାରୀ ସ୍ତରରେ ନିଷ୍ପତ୍ତି ଗ୍ରହଣ କରାଯାଇଛି । କିନ୍ତୁ ପଞ୍ଚାୟତ ସଦର ମହକୁମା ରଣସପୁର ଗ୍ରାମରେ ଆବଶ୍ୟକ ଜମି ନ ଥିବାରୁ ଜାନିଗୁଡା ଗ୍ରାମରେ ସ୍କୁଲ ନିର୍ମାଣ ପାଇଁ ଯୋଜନା ଚାଲିଥିବା ଶୁଣିବାକୁ ମିଳୁଛି । କିନ୍ତୁ ରଣସପୁର ଗ୍ରାମ କେନ୍ଦ୍ର ସ୍ଥଳରେ ଥିବାରୁ ଏଠାରେ ବିଦ୍ୟାଳୟ ନିର୍ମାଣ କଲେ ସମସ୍ତ ଗ୍ରାମର ଛାତ୍ର ଛାତ୍ରୀ ଉପକୃତ ହେବେ । ଏଥିପାଇଁ ସହଦେବ ନାୟକ, ଈଶ୍ୱର ନାୟକ, ସୂର୍ଯ୍ୟ ନାରାୟଣ ନାୟକ ଓ ଲକ୍ଷ୍ମଣ ନାୟକ ନିଜ ନିଜର ସମୁଦାୟ ୨ ଏକର ଜମି ଦାନ କରିବାକୁ ପ୍ରସ୍ତୁତ ଥିବା ବିଷୟ ଆବେଦନରେ ଉଲ୍ଲେଖ କରିଛନ୍ତି ।