ରିପୋର୍ଟ : ରଞ୍ଜୀତ ବେହେରା //
ଢେଙ୍କାନାଳ,(୦୮/୦୯) : ଢେଙ୍କାନାଳ ପ୍ରସିଦ୍ଧ ଯୋରନ୍ଦା ମହିମା ଗାଦି ରେ ନୂଆଖାଇ ପର୍ବ ପାଳିତ ହୋଇଯାଇଛି । ନୂଆ ଧାନରୁ ତିଆରି ହୋଇଥିବା ଚୁଡାରୁ ପ୍ରସ୍ତୁତ ଭୋଗ ମହିମା ଗୋସାଇଁଙ୍କ ନିକଟରେ ଲାଗି କରାଯାଇଥିଲା । ଏହା ପରେ ଏହି ନୂଆ ଚୁଡାରେ ପ୍ରସ୍ତୁତ ଭୋଗ ସାଧୂସନ୍ଥ ଓ ଭକ୍ତ ମାନେ ସେବନ କରିଥିଲେ । ମହିମା ଧର୍ମ ଏକ କୃଷି ପ୍ରଧାନ ଧର୍ମ ।
ତେଣୁ ଚଳିତ ବର୍ଷର ଫସଲର ପ୍ରଥମ ଶସ୍ୟ କୁ ଯୋରନ୍ଦା ମହିମା ଗାଦି ରେ ମହିମା ଗୋସାଇଁଙ୍କ ନିକଟରେ ଅର୍ପଣ କରାଯାଇଥାଏ । ମହିମା ଧର୍ମର ନୂଆଖାଇ ପର୍ବର ସ୍ବତନ୍ତ୍ର ମାହାତ୍ମ୍ୟ ରହିଛି । କୃଷି ଭିତ୍ତିକ ଏହି ବହୁ ପୁରାତନ ପରମ୍ପରା ଅନୁଯାୟ ନୂଆଖାଇ ପର୍ବ ପାଳନ ହୋଇ ଆସୁଅଛି । ପ୍ରତିବର୍ଷ ଭଳି ଏହି ନୂଆଖାଇ ପର୍ବରେ ରାଜ୍ୟ ଓ ରାଜ୍ୟ ବାହାରୁ ହଜାର,ହଜାର ଭକ୍ତ ସମାଗମ ହୋଇଥାଏ । ଚଳିତ ବର୍ଷ ଯୋରନ୍ଦା ମହିମା ଗାଦିରେ କୋଭିଡ଼ ନିୟମ ପାଳନ କରାଯାଇ ଅଳ୍ପ ସଂଖ୍ୟକ ସାଧୁ ,ସନ୍ଥ ଓ ଭକ୍ତ ମାନଙ୍କୁ ନେଇ ଅନୁଷ୍ଠିତ ହୋଇଛି ।
ଚଳିତ ବର୍ଷ ନବାହ୍ନ ଭକ୍ଷଣ ପାଇଁ ମହିମା ଧର୍ମାବଲମ୍ବି ଓ ଶ୍ରଦ୍ଧାଳୁ ଭକ୍ତ ମାନଙ୍କର ସମାଗମ ହୋଇଛି । ଆଜିର ଦିନରେ ସାଧୁ, ସନ୍ଥ ମାନଙ୍କୁ ଦର୍ଶନ କରିବା ସହ ନୂତନ ଧାନର ଚୁଡାର ପ୍ରସାଦ ସେବନ କଲେ ପରିବାରର ସୁଖ, ଶାନ୍ତି ଓ ସମୃଦ୍ଧି ଓ ପରିବାର ମଙ୍ଗଳ ହୋଇଥାଏ ବୋଲି ଭକ୍ତ ମାନଙ୍କର ବିଶ୍ୱାସ ରହିଥିବା ପ୍ରକାଶ କରିଛନ୍ତି । ଜିଲ୍ଲାର କୋଣ ଅନୁକୋଣରେ ଅବଭକ୍ତ ଓ ସାଧୁସନ୍ଥମାନେ ଯୋଗଦେଇ ନୁଆ ଖାଇ ପର୍ବ ପାଳନ କରିଛନ୍ତି ।