ରିପୋର୍ଟ : ଭଗବାନ ମହାନ୍ତି
“ମୁରିବାହାଲ, (୯/୪) : ମୁରିବାହାଲ ଥାନା ମାଳିଶିରା ପଞ୍ଚାୟତ ଚିକିନିବାହାଲି ଗ୍ରାମର ଜଣେ ବ୍ୟକ୍ତି ନିଜର ଅଟୋ ସହ ଘରୁ କେଉଁଆଡେ ଫେରାର ହୋଇଯାଇଥିବା ନେଇ ତାଙ୍କ ସ୍ତ୍ରୀ ଥାନାରେ ଏକ ନିଖୋଜ ଅଭିଯୋଗ କରିଛନ୍ତି ।
ଚିକିନିବାହାଲି ଗ୍ରାମର ଗଙ୍ଗା କୁମ୍ଭାର (୩୫) ନାମ୍ନୀ ଜଣେ ବିବାହିତା ମହିଳା ମୁରିବାହାଲ ଥାନାରେ ଦେଇଥିବା ଏତଲା ମୁତାବକ ତାଙ୍କ ସ୍ଵାମୀ ହିରନ କୁମ୍ଭାର(୩୮) ଗତ ୩ ତାରିଖ ଦିନ ସକାଳ ୮ଘଣ୍ଟା ସମୟରେ ତାଙ୍କ ଘରୁ ନିଜର ଅଟୋ ଓଡ଼ି ୩ ଆର୍ ୭୨୦୯ ନେଇ ଟିଟିଲାଗଡ ଯାଇଥିଲେ । କିନ୍ତୁ କିଛି ଦିନ ପରେ ବି ସେ ଆଉ ଘରକୁ ନ ଫେରିବାରୁ ତାଙ୍କ ସ୍ତ୍ରୀ ମୁରିବାହାଲ ଥାନାରେ ଏକ ନିଖୋଜ ଲିଖିତ ଆକାରରେ ଦେଇଛନ୍ତି । ତାଙ୍କ ସ୍ଵାମୀ ଏକ ମୋବାଇଲ ଧରିଥିବା ବେଳେ ଏହାର ନମ୍ବର ମଧ୍ୟ ସେ ଅଭିଯୋଗରେ ଉଲ୍ଲେଖ କରିଛନ୍ତି ।
ସ୍ଵାମୀ ଘରୁ ବାହାରି ଆଉ ଘରକୁ ଫେରି ନ ଥିବାରୁ ସ୍ତ୍ରୀଙ୍କ ସହ ପରିବାର ଲୋକେ ତାଙ୍କୁ ବହୁ ସ୍ଥାନରେ ଖୋଜାଖୋଜି କରି ନିରାଶ ହେବାରୁ ସ୍ଵାମୀଙ୍କ ନିଖୋଜ ନେଇ ସ୍ତ୍ରୀ ଥାନାରେ ଏତଲା ଦେଇଥିଲେ । ଏ ସମ୍ପର୍କରେ ମୁରିବାହାଲ ଥାନା ପୁଲିସ ଏକ ନିଖୋଜ ମାମଲା ରୁଜ୍ଜୁ କରି ଅଧିକ ତଦନ୍ତ ଜାରି ରଖିଛି । ଉଭୟ ସ୍ୱାମୀ ସ୍ତ୍ରୀଙ୍କ ୪ଟି ସନ୍ତାନ ଥିବା ଜଣାପଡିଛି । ତଦନ୍ତ ପରେ ପ୍ରକୃତ ତଥ୍ୟ ଜଣାପଡିବ ବୋଲି ଚର୍ଚ୍ଚା ହେଉଛି ।”