ରିପୋର୍ଟ : ସୁଶାନ୍ତ ବେହେରା //
ବୌଦ୍ଧ,(୨୧/୧୦) : ମା ମହେଶ୍ୱରୀ ଦେବୀଙ୍କ ଷୋହଳ ପୂଜା ଉଦଯାପିତ | ପାର୍ବଣ ଋତୁ ଆସିଲେ ଅନେକ ପର୍ବପର୍ବାଣୀ ସହ ଯାନିଯାତ୍ରା ପାଳିତ ହୋଇଥାଏ | ଗାଁ ଠୁ ସହର ହୋଇଉଠେ ଉତ୍ସବ ମୁଖର | ତାସହ ଭକ୍ତିମୟ ପରିବେଶ ସୃଷ୍ଟି ହୋଇଥାଏ |
ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ଲମ୍ବସରି ଗ୍ରାମପଞ୍ଚାୟତ ଅନ୍ତର୍ଗତ ବେହେରା ପଡ଼ା ଠାରେ ମା ମହେଶ୍ୱରୀ ଦେବୀଙ୍କ ଷୋହଳ ଦିନ ବ୍ୟାପି ପୂଜାର ଆଜି ଉଦଯାପନୀ ଉତ୍ସବ ଅନୁଷ୍ଠିତ ହୋଇ ଯାଇଛି | ଆଜି କୁମାର ପୂର୍ଣ୍ଣିମା ଅବସରରେ ଷୋହଳ ପୂଜାର ଉଦଯାପନୀ ହେଉ ଥିବାରୁ ଆଖପାଖ ଅଞ୍ଚଳର ବହୁତ ଭକ୍ତ ଓ ଶ୍ରଦ୍ଧାଳୁମାନେ ଯୋଗ ଦେଇଥିଲେ | ମାଙ୍କ ଦୈନନ୍ଦିନ ରୀତିନୀତିରେ ପୂଜା ସମ୍ପନ୍ନ ହେବା ପରେ ମାଙ୍କ ପ୍ରତିମୂର୍ତ୍ତି ସହ ଅନେକ ଛତର ଶ୍ରଦ୍ଧାଳୁ ମାନେ ବୋହି ଏକ ଶୋଭାଯାତ୍ରାରେ ଗ୍ରାମ ପରିକ୍ରମା କରିଥିଲେ |
ଗ୍ରାମ ପରିକ୍ରମା ପରେ ମାଙ୍କ ଉଦଯାପନୀ ପୂଜା ପୀଠରେ ଅନୁଷ୍ଠିତ ହୋଇଥିଲା | ବିଶ୍ୱାସ ରହିଛି ମାଙ୍କ ପୀଠରେ ଆସି ନିଜର ଦୁଃଖ ଜଣାଇଲେ ସବୁ ଦୁଃଖ କଷ୍ଟ ଓ ସମସ୍ୟା ଲାଘବ ହୋଇଯାଏ | ଏହି ବିଶ୍ୱାସ ରଖି ଆଖପାଖ ଅଞ୍ଚଳର ବହୁତ ଭକ୍ତ ନିଜର ଦୁଃଖ ଜଣାଇବା ପାଇଁ ପୀଠକୁ ଚାଲି ଆସନ୍ତି | କାଳିଶୀ ରୂପରେ ଦେବୀ ପ୍ରସନ୍ନ ହୋଇ ଲୋକଙ୍କ ଗୁହାରି ଶୁଣି ଥାନ୍ତି | ମାନସିକ ପୂରଣ ହେବା ପରେ ଅନେକ ଭକ୍ତ କୁକୁଡ଼ା ଓ ପଶୁ ବଳି ଦେବାର ପରମ୍ପରା ମଧ୍ୟ ଦେଖିବାକୁ ମିଳିଥିଲା | ପୂଜକ ଭାବରେ ବିଶେଶ୍ୱର ଦେହୁରି ପୂଜା କରୁଥିବା ବେଳେ ତାଙ୍କୁ ସହଯୋଗ କରିଥିଲେ କାର୍ତ୍ତିକ ମେଣ୍ଡିଲି ଓ ମୁକୁନ୍ଦ କର୍ମୀ ସହ ଗ୍ରାମବାସୀ | ଏହି ଉତ୍ସବ ସଭାପତି ଠାକୁର ପାତ୍ର ଓ ସମ୍ପାଦକ ସଂଜିତ ଅମାତଙ୍କ ନେତୃତ୍ୱରେ ସମସ୍ତ ପୂଜାକାର୍ଯ୍ୟ ସମ୍ପନ୍ନ ହୋଇଥିଲା |