ରିପୋର୍ଟ : ରଞ୍ଜିତ ବେହେରା
ଢେଙ୍କାନାଳ, ( ୮/ ୧୨) : ସାରା ଦେଶର ୧ ଲକ୍ଷ ୮୦ ହଜାର ଶିକ୍ଷକ ଶିକ୍ଷୟିତ୍ରୀଙ୍କ ଏନସି ଟ୍ୟାଗ୍ ହଟାଇବା ଦାବିରେ ଏନଆଇଓଅସ ଡିଇଏଲଇଡି ଶିକ୍ଷକ ସଂଘ ର ରାଷ୍ଟ୍ରୀୟ ଅଧ୍ୟକ୍ଷ ଇଂ. ଦେବାଶିଷ ହୋତାଙ୍କ ନେତୃତ୍ୱରେ ଶିକ୍ଷକମାନେ ଆଜି ଢେଙ୍କାନାଳ ରେ ଗଣ ଗିରଫଦାରୀ ଦେଇଛନ୍ତି ।
ତୁରନ୍ତ ଏନସି ଟ୍ୟାଗ୍ ହଟା ନ ଗଲେ ସାରା ଦେଶର ଲକ୍ଷାଧିକ ଶିକ୍ଷକ ନୂଆଦିଲ୍ଲୀରେ ପହଞ୍ଚି ଆଗାମୀ ୧୩ ଜାନୁଆରୀ ୨୦୨୨ ରେ ସଂସଦ ଭବନ ଘେରିବାକୁ ବାଧ୍ୟ ହେବେ ବୋଲି ଶିକ୍ଷକମାନେ ଚେତାବନୀ ଦେଇଛନ୍ତି । ଏହି ପିଡିତ ଶିକ୍ଷକମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଙ୍କ ଉଦ୍ଦେଶ୍ୟରେ ଢେଙ୍କାନାଳ ଜିଲ୍ଲାପାଳ ଙ୍କ ମାଧ୍ୟମରେ ଏକ ଦାବିପତ୍ର ପ୍ରଦାନ କରିଛନ୍ତି ।
ଏଠାରେ ପ୍ରକାଶ ଯୋଗ୍ୟ ଯେ, ୨୯ ନଭେମ୍ବରରୁ ୩ ଡିସେମ୍ବର ଯାଏଁ ୫ ଦିନ ପାଇଁ ନୂଆଦିଲ୍ଲୀ ର ଯନ୍ତ୍ର ମନ୍ତର ଠାରେ ସାରା ଦେଶର ଶିକ୍ଷକ ପ୍ରତିନିଧିମାନେ ଇଂ . ହୋତାଙ୍କ ନେତୃତ୍ୱରେ ଧାରଣା ଦେଇଥିଲେ । ତା ପୂର୍ବରୁ ୧୮ ନଭେମ୍ବର ଦିନ ସାରା ଦେଶ ର ପ୍ରତି ଜିଲ୍ଲାପାଳଙ୍କ ଅଫିସ୍ ଆଗରେ ଏବଂ ତାଳଚେରରେ ଶ୍ରୀ ପ୍ରଧାନ ଙ୍କ ଘର ସାମନାରେ ଧାରଣା ଦେଇଥିଲେ । ତତସହିତ ବାଇକ୍ ଚ୍ୟାଲି ମଧ୍ୟ କରିଥିଲେ ।
୨୦୧୭ ମସିହାରେ କେନ୍ଦ୍ର ଶିକ୍ଷା ମନ୍ତ୍ରଣାଳୟର ଏକ ସଂସ୍ଥା ଏନଆଇଓଅସ୍ ରେ ଏହି ଶିକ୍ଷକମାନେ ୨ ବର୍ଷିଆ ଡିଇଏଲଇଡି କୋର୍ସ କରିଥିଲେ । ସେଥିପାଇଁ ପ୍ରତ୍ୟେକ ଶିକ୍ଷକଙ୍କୁ ୧ ଲକ୍ଷରୁ ଅଧିକ ଟଙ୍କା ଖର୍ଚ୍ଚ କରିବାକୁ ପଡିଥିଲା । ଏମାନେ ପରୀକ୍ଷା ଦେଇ ଡିଇଏଲଇଡି କୋର୍ସ ମଧ୍ୟ ପାସ୍ କରିଗଲେ । କିନ୍ତୁ ଏନଆଇଓଅସ୍ ଏମାନଙ୍କୁ ସାର୍ଟିଫିକେଟ୍ ନ ଦେଇ ଏନସି ଟ୍ୟାଗ୍ ଲଗାଇଦେଲା । ସେଥିପାଇଁ ଏହି ଶିକ୍ଷକମାନଙ୍କ ଚାକିରି ଏବେ ଚାଲିଯିବାର ଭୟ ସୃଷ୍ଟି ହୋଇଛି ।
ଦୀର୍ଘ ୨ ବର୍ଷ ଧରି ଅନ୍ୟାୟ ର ଶୀକାର ହୋଇ ଚାଲିଥିବା ଏହି ଶିକ୍ଷକମାନେ ଯେତେବେଳେ ଏନଆଇଓଅସ୍ ପାଖରେ ଅଭିଯୋଗ କରୁଛନ୍ତି ସେତେବେଳେ ଉକ୍ତ ସଂସ୍ଥା କେନ୍ଦ୍ର ଶିକ୍ଷା ମନ୍ତ୍ରଣାଳୟ ର ଆଉ ଗୋଟିଏ ସଂସ୍ଥା ଏନସିଟିଇ ମୁଣ୍ଡରେ ଦୋଷ ଲଦି ଖସିଯିବାକୁ ଚାହୁଁଛି । ଯେବେ ସେମାନେ ଏନସିଟିଲ ପାଖରେ ଅଭିଯୋଗ କରୁଛନ୍ତି ସେବେ ଉକ୍ତ ସଂସ୍ଥା କେନ୍ଦ୍ର ଶିକ୍ଷା ମନ୍ତ୍ରଣାଳୟ ମୁଣ୍ଡରେ ଦୋଷ ଲଦି ଖସିଯିବାକୁ ଚାହୁଁଛି । ଆଉ ସବୁଠୁ ଦୁଃଖ ର ବିଷୟ ଏମାନେ କେନ୍ଦ୍ର ଶିକ୍ଷା ମନ୍ତ୍ରଣାଳୟ ପାଖରେ ଅଭିଯୋଗ କଲେ ଆରଟିଇ – ୨୦୦୯ ନିୟମ ଯୋଗୁଁ ଏନସି ଟ୍ୟାଗ୍ ଲାଗିଛି ବୋଲି କହି ମନ୍ତ୍ରଣାଳୟ ମଧ୍ୟ ନିଜ ମୁଣ୍ଡରୁ ଦୋଷ ଖସାଇଦେଉଛି ।
କିନ୍ତୁ ଆରଟିଇ – ୨୦୦୯ ନିୟମରେ ଏନସି ଟ୍ୟାଗ୍ ସମ୍ବନ୍ଧରେ କିଛି ବି ଉଲ୍ଲେଖ ନାହିଁ । ତେବେ ସାରା ଭାରତର ୧ ଲକ୍ଷ ୮୦ ହଜାର ଶିକ୍ଷକ ଶିକ୍ଷୟିତ୍ରୀଙ୍କୁ ସେମାନଙ୍କର କୌଣସି ଭୁଲ୍ ନ ଥାଇ ବିନା କାରଣରେ କାହିଁକି ୨ ବର୍ଷ ହେଲା ହଇରାଣ କରାଯାଉଛି ବୋଲି ଇଂ. ହୋତା ପ୍ରଶ୍ନ କରିଛନ୍ତି ? ପ୍ରଧାନମନ୍ତ୍ରୀ ଶ୍ରୀ ମୋଦୀ ଏବଂ କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ପ୍ରଧାନ ଏହି ପ୍ରସଙ୍ଗ କୁ ଗମ୍ଭୀରତାର ସହିତ ବିଚାର କରି ତୁରନ୍ତ ଏହି ପୀଡିତ ଶିକ୍ଷକମାନଙ୍କର ଏନସି ଟ୍ୟାଗ୍ ହଟାଇବାକୁ ଆଦେଶ ଦେବା ନିମନ୍ତେ ମୁଁ ବିନମ୍ରତା ର ସହିତ ନିବେଦନ କରୁଛି ବୋଲି ଇଂ. ହୋତା ପ୍ରକାଶ କରିଛନ୍ତି ।