ରିପୋର୍ଟ: ସୁଭାସିସ ନାୟକ //
ଭୁବନେଶ୍ୱର(୨୩/୦୭) : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଞ୍ଜାମ ଜିଲ୍ଲାରେ ଥିବା ଗୋପାଳପୁର ଇଣ୍ଡଷ୍ଟ୍ରିଆଲ ପାର୍କଠାରେ ଟାଟା ଟିର ମେଗା ଚା ପ୍ୟାକେଜିଂ ୟୁନିଟର ଉଦଘାଟନ କରିଛନ୍ତି । ପ୍ରାୟ ୧୦୦ କୋଟି ଟଙ୍କା ପୁଞ୍ଜିନିବେଶରେ ନିର୍ମିତ ଏହି ୟୁନିଟକୁ ସମଗ୍ର କେନ୍ଦ୍ରୀୟ ଓ ଦକ୍ଷିଣ ଭାରତର ସର୍ବବୃହତ ଚା’ ପ୍ୟାକେଜିଂ ୟୁନିଟ୍ ଓ ସପ୍ଲାଏ ଚେନ ବୋଲି କମ୍ପାନି ପକ୍ଷରୁୁ କୁହାଯାଇଛି । ପରବର୍ତ୍ତୀ କାଳରେ ଏହାକୁ ଦେଶର ବୃହତ୍ତମ ଚା ପ୍ୟାକେଜିଂ ପ୍ଲାଣ୍ଟରେ ପରିଣତ କରିବାକୁ କମ୍ପାନି ଲକ୍ଷ୍ୟ ରଖିଛି ।
ଗୋପାଳପୁରରେ ‘ଟାଟା ଟି’: ଏହି ପ୍ରକଳ୍ପରେ ପ୍ରାୟ ୯୦୦ ଲୋକଙ୍କି ନିଯୁକ୍ତି ସୁଯୋଗ ମିଳିବ । ଏହି ପ୍ଲାଣ୍ଟ ଓଡ଼ିଶା, ଆନ୍ଧ୍ରପ୍ରଦେଶ, କର୍ଣ୍ଣାଟକ, ତାମିଲନାଡ଼ୁ, ତେଲେଙ୍ଗାନା ଓ କେନ୍ଦ୍ରୀୟ ଭାରତର ଚାହିଦା ପୂରଣ କରିବ । ବର୍ତ୍ତମାନ ଏହାର ଉତ୍ପାଦନ କ୍ଷମତା ବାର୍ଷିକ ୧୫ ନିୟୁତ କିଲୋଗ୍ରାମ ଥିବାବେଳେ ଏହାକୁ ୫୦ ନିୟୁତ କିଲୋଗ୍ରାମକୁ ବୃଦ୍ଧି କରାଯିବ ।
ଏହି ଅବସରରେ ମୁଖ୍ୟମନ୍ତ୍ରୀ ଓଡିଶାରେ ଟାଟା ଗ୍ରୁପର ଭୂମିକାକୁ ପ୍ରଶଂସା କରିବା ସହ ଓଡିଶାର ଶିଳ୍ପ ବିକାଶରେ ଏହା ଏକ ପ୍ରମୁଖ ଭୂମିକା ଗ୍ରହଣ କରୁଥିବା କହିଛନ୍ତି । ଶିକ୍ଷା, ସ୍ୱାସ୍ଥ୍ୟ ଏବଂ ଦକ୍ଷତା ବିକାଶ ଦିଗରେ ଓଡ଼ିଶା ସରକାରଙ୍କ ସହ ସହଭାଗୀତା ମାଧ୍ୟମରେ ସେମାନେ ସାମାଜିକ ବିକାଶକୁ ଅନୁକରଣ କରିବାରେ ମଧ୍ୟ ଆଗେଇ ଆସିଛନ୍ତି ।
ଶିଳ୍ପ ପ୍ରତିଷ୍ଠା କ୍ଷେତ୍ରରେ ରାଜ୍ୟର ଚମତ୍କାର ପ୍ରଦର୍ଶନକୁ ଦର୍ଶାଇ ମୁଖ୍ୟମନ୍ତ୍ରୀ କହିଛନ୍ତି ଯେ ଓଡ଼ିଶା ଭାରତରେ ଶିଳ୍ପ ବିକାଶର ଅଗ୍ରଭାଗରେ ରହିଆସିଛି । ପେଟ୍ରୋ ରାସାୟନିକ, ଖାଦ୍ୟ ପ୍ରକ୍ରିୟାକରଣ, ପୋଷାକ ଏବଂ ବସ୍ତ୍ର ପରି ବିଭିନ୍ନ କ୍ଷେତ୍ରରେ ପୁଞ୍ଜି ବିନିଯୋଗ କରିବାରେ ଓଡିଶାର ପଲିସି ଫ୍ରେମ୍ କାର୍ୟ୍ୟ ଏବଂ ସୁବିଧା ପ୍ରଣାଳୀ ସଫଳ ହୋଇଛି । ଶିଳ୍ପ କ୍ଷେତ୍ରରେ ବିକାଶ ଓଡିଶାରେ ନିଯୁକ୍ତି ସୁଯୋଗକୁ ଆହୁରି ଉନ୍ନତ କରିବ ବୋଲି ସେ କହିଛନ୍ତି ।
ଗୋପାଳପୁରରେ ‘ଟାଟା ଟି’: ଏହି କାର୍ୟ୍ୟକ୍ରମରେ ଶିଳ୍ପମନ୍ତ୍ରୀ ଦିବ୍ୟଶଙ୍କର ମିଶ୍ର, ଫାଇଭ-ଟି ସଚିବ ଭି.କେ.ପାଣ୍ଡିଆନ, ଟାଟା ଷ୍ଟିଲ ଏମଡି ଟି.ଭି.ନରେନ୍ଦ୍ରନ ଯୋଗ ଦେଇଥିଲେ ଶିଳ୍ପ ମନ୍ତ୍ରୀ ଦିବ୍ୟଶଙ୍କର ମିଶ୍ର ଗତ ୨୦ ବର୍ଷ ମଧ୍ୟରେ ଶିଳ୍ପ ବିକାଶରେ ରାଜ୍ୟର ଅଗ୍ରଗତି ବିଷୟରେ ବର୍ଣ୍ଣନା କରିଛନ୍ତି । ସେ କହିଛନ୍ତି ଯେ ଓଡିଶାରେ ସୁସ୍ଥ ଅଭିବୃଦ୍ଧି ପାଇଁ ଶିଳ୍ପ ପାଇଁ ରାଜ୍ୟ ଏକ ସ୍ଥିର ପ୍ଲାଟଫର୍ମ ଯୋଗାଇ ଦେଇଛି ।