ରିପୋର୍ଟ : ରବିଶଙ୍କର ମହାପାତ୍ର
କୋରାପୁଟ, (୨୬/୬) : ଧର୍ମାନ୍ତରିତ ଆଦିବାସୀ ମାନଙ୍କୁ ସଂରକ୍ଷଣ ସୁବିଧା ବାତିଲ କରିବା ସହ ଧର୍ମାନ୍ତରିତଙ୍କୁ ଶୀଘ୍ର ଠାବ କରିବାକୁ ଜନଜାତି ସୁରକ୍ଷା ମଞ୍ଚ ର କର୍ମକର୍ତ୍ତା ମାନେ ଦାବି କରିଛନ୍ତି ।
ଆଜି ଆଦିବାସୀଙ୍କ ଚିରାଚରିତ ଧର୍ମ, ଉପାସନା ପୀଠ, ପରମ୍ପରା, ବେଶ ଭୁଷାକୁ ତ୍ୟାଗ କରି ଅନ୍ୟ ଧର୍ମ ଗ୍ରହଣ କରିଥିବା ଲୋକେ ମଧ୍ୟ ଏହି ସରକାରୀ ସଂରକ୍ଷଣ ଓ ଅନ୍ୟାନ୍ୟ ଆଦିବାସୀଙ୍କ ସୁବିଧା ସୁଯୋଗ ହାତେଇ ଚାଲିଛନ୍ତି । ଏଥିପାଇଁ ପ୍ରଶାସନ ପକ୍ଷରୁ ଯେତିକି ତତ୍ପରତା ପ୍ରକାଶ ପାଇବା କଥା ତାହା ପାଇପାରୁ ନାହିଁ । ସରକାରୀ ଚାକିରି, ସରକାରୀ ଯୋଜନା, ଏପରିକି ଆଇନରେ ମଧ୍ୟ ଆଦିବାସୀଙ୍କ ପାଇଁ ସରକାର ସ୍ୱତନ୍ତ୍ରତା ବଜାୟ ରଖିଛନ୍ତି । କିନ୍ତୁ ଧର୍ମାନ୍ତରିତ ଆଦିବାସୀ ତଥା ଅପେକ୍ଷାକୃତ ଉନ୍ନତ ବ୍ୟକ୍ତି ମାନେ ଏହି ସୁବିଧା ପାଇ ଚାଲିଛନ୍ତି ।
ଅନେକ କ୍ଷେତ୍ରରେ ଆଦିବାସୀଙ୍କ ମୂଳ ପରମ୍ପରା ଓ ପୂଜା ପଦ୍ଧତି ଛାଡି ପାରି ନ ଥିବା ବ୍ୟକ୍ତି ଏଥିପାଇଁ ଅନେକ ପରିମାଣରେ କ୍ଷତିଗ୍ରସ୍ତ ହୋଇଥିବା ପରିଲକ୍ଷିତ ହେଉଛି । ଏହାର ଦୃଢ ବିରୋଧ କରି ଧର୍ମାନ୍ତରିତଙ୍କୁ ସମସ୍ତ ସଂରକ୍ଷଣ ସୁବିଧା ବନ୍ଦ କରିବାକୁ ରବିବାର ଜୟପୁର ସହର ମୂଖ୍ୟ ଟ୍ରାଫିକ୍ ଛକ ଠାରୁ ମୂଖ୍ୟ ରାସ୍ତା, ବକ୍ସି ସାହି ଓ ଜୟନଗର ରାସ୍ତା ଦେଇ ଆଦିବାସୀ ମାନଙ୍କ ଏକ ବିରାଟ ଶୋଭାଯାତ୍ରା ପଞ୍ଚବଟୀ କଲ୍ୟାଣ ମଣ୍ଡପ ଠାରେ ପହଞ୍ଚିଥିଲା ।
ଦୁରୁଆ ନୃତ୍ୟ, ଘୋଡା ନାଚ, ସଂକୀର୍ତ୍ତନ, ବିରଳ ଆଦିବାସୀ ନୃତ୍ୟ ସହ ଏକ ବିଶାଳ ଶୋଭାଯାତ୍ରା ପଞ୍ଚବଟୀ କଲ୍ୟାଣ ମଣ୍ଡପରେ ପହଁଞ୍ଚିବା ପରେ ରୁପ ଭତ୍ରାଙ୍କ ସଭାପତିତ୍ୱରେ ବିରାଟ ସଭା ଅନୁଷ୍ଠିତ ହୋଇଥିଲା । ଉକ୍ତ ସଭାରେ କୁଚିଣ୍ଡା ର ପୂର୍ବତନ ବିଧାୟକ ବୃନ୍ଦାବନ ମାଝି, କ୍ଷେତ୍ରୀୟ ସଂଗଠନ ସଂପାଦକ ବିଜୟ ମହାନ୍ତି, ବିଭାଗ ସଙ୍ଗଠନ ମନ୍ତ୍ରୀ ରତିକାନ୍ତ ସାହୁ, ମୂଖ୍ୟ ବକ୍ତା ଭାବେ ଭୋଜପୁରୀ ଆଶ୍ରମ ର ମଠାଧୀଶ ସ୍ୱାମୀ ଶିବାନନ୍ଦ ଆର୍ଯ୍ୟ ଯୋଗ ଦେଇଥିଲେ ।
ସଭାରେ ଧର୍ମାନ୍ତରଣ କରୁଥିବା ସଂଗଠନ ଗୁଡିକ ଉପରେ ଅଙ୍କୁଶ ଲଗାଇବା ପାଇଁ ଦାବି ଜୋର ଧରିଥିଲା । ନଗର ସଭାପତି ଲକ୍ଷ୍ମୀ ମିଶ୍ର , ଶସି ପଟ୍ଟନାୟକ, ଜିଲ୍ଲା ସଂଗଠନ ମନ୍ତ୍ରୀ ଧନ ଭତ୍ରା, ଶିବା ଗ୍ରୁପ୍, ସାଇ ଗ୍ରୁପ, ଆଶୁତୋଷ ପାଠୀ ମିମୋରିଆଲ ଟ୍ରଷ୍ଟ, ତ୍ରିନାଥ ସେବା ପରିଷଦ ଭଳି ଜିଲ୍ଲା ର ପ୍ରମୁଖ ସମାଜିକ ସଂଗଠନ କାର୍ଯ୍ୟକ୍ରମରେ ସହାୟତା କରିଥିବା ଜଣାପଡିଛି ।