ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୧୮/୭) : ଉପର ମୁଣ୍ଡରେ ଲଗାଣ ବର୍ଷା ତାଣ୍ଡବ ରଚିଛି ଆଦିବାସୀ ଅଧ୍ୟୁଷିତ ପାହାଡିଆ ଇଲାକାରେ । ବଂଶଧାରା ନଦୀ ର ଜଳ ସ୍ତର ବିପଦ ସଙ୍କେତ ଉପରେ ପ୍ରବାହିତ ହେଉଛି । ସ୍ଥାନୀୟ ପ୍ରଶାସନ, କେନ୍ଦ୍ରୀୟ ଜଳ ଆୟୋଗ କମିଶନ କତ୍ତୃପକ୍ଷ ବଂଶଧାରା ନଦୀ ର ଜଳ ସ୍ତର ଉପରେ ସତର୍କ ଦୃଷ୍ଟି ରଖିଛନ୍ତି ।
ବିଶେଷ କରି ଗଜପତି ଜିଲ୍ଲାର ମୋହନା, ଅଡବା ଅଞ୍ଚଳରେ ଉପର ମୁଣ୍ଡରେ ପ୍ରବଳ ବର୍ଷା ଯୋଗୁଁ ସାନନଦୀ (ମହେନ୍ଦ୍ରତନୟା) ରେ ଜଳସ୍ତର ବୃଦ୍ଧି ପାଇଛି । ଏହି ବନ୍ୟା ଜଳରେ ଫୁଲଫୁଟି ଅଞ୍ଚଳରେ ରହୁଥିବା ଛଅ ଟିକିଆ ହାତୀପଲ ଭାସି ଯାଇଥିଲେ । ବହୁ ସଂଘର୍ଷ ପରେ ଭରା ନଈରୁ ଉଦ୍ଧାର ପାଇ ଜଙ୍ଗଲକୁ ଚାଲିଯାଇଛନ୍ତି ।
ପାହାଡିଆ ପାଣି ଓ ନାଳ ଗୁଡିକର ଜଳସ୍ରୋତରେ ଭୀମପୁର ହାଇସ୍କୁଲ ପାଚେରୀ ଭାଙ୍ଗି ପାଣି ସ୍କୁଲ ମଧ୍ୟରେ ପ୍ରବେଶ କରିଛି । ଫଳରେ ସ୍କୁଲ ଅନ୍ତେବାସୀ ମାନଙ୍କୁ ସୁରକ୍ଷିତ ସ୍ଥାନକୁ ନିଆଯାଇଛି । ଗୋଦାମ ଗୃହରେ ପାଣି ପଶି ଯାଇ ମଧ୍ୟାହ୍ନ ଭୋଜନ ପାଇଁ ଥିବା ଚାଉଳ ନଷ୍ଟ ହୋଇଯାଇଛି । ପାହାଡ଼ ଧସିଯିବା ଓ ପ୍ରଵଳ ପାଣି ସ୍ରୋତରେ ଭିମପୁର, ପୁଟାସିଙ୍ଗ, ଶଗଡା, ଟିଟିମିରି, ଗୁଡେଡା, ଅଙ୍ଗେରା, ତାରବେଲ, କେରେବା, ଅଡବା ଆଦି ପାହାଡିଆ ଇଲାକାର ଚାଷଜମିରେ ବାଲି, ମାଟି ଓ ପଥର ମାଡିଯାଇ ଚାଷ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଶହ ଶହ ଏକର ଚାଷଜମି ଉପରେ ବର୍ଷା ଜଳ ପ୍ରବାହିତ ହୋଇ ରୁଆ ଯାଇଥିବା ଧାନ ଫସଲ ନଷ୍ଟ ହୋଇଯାଇଥିବା ଗୁଣପୁର ତହସିଲଦାର ଶରତ ଚନ୍ଦ୍ର ନାୟକ ସୂଚନା ଦେଇଛନ୍ତି ।
ଗୁଣପୁର ବିଡ଼ିଓ ଶାନ୍ତିପ୍ରଭା ପ୍ରଧାନ, ତହସିଲଦାର ଶରତ ଚନ୍ଦ୍ର ନାୟକ, ପିଇଓ ଶିବ ପ୍ରସାଦ ରଥ, ଆଇ ଟି ଡି ଏ ପ୍ରକଳ୍ପ ଅଧିକାରୀ, କୃଷି ବିଭାଗ ଅଧିକାରୀ ସନ୍ତୋଷ ରଥ, ଲାଞ୍ଜିଆ ସଉରା ଉନ୍ନୟନ ସଂସ୍ଥା ର କର୍ମଚାରୀ ପ୍ରମୁଖ କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ କରିଛନ୍ତି । ଆଜି ରାଜସ୍ୱ ବିଭାଗ ର ଏକ ସ୍ୱତନ୍ତ୍ର ଟିମ କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ କରି କ୍ଷୟକ୍ଷତି ର ଆକଳନ କରିବ ବୋଲି ଗୁଣପୁର ତହସିଲଦାର ଶରତ ଚନ୍ଦ୍ର ନାୟକ ସୂଚନା ଦେଇଛନ୍ତି ।
ତେବେ ରାଜ୍ୟରେ କରୋନା ସଂକ୍ରମଣ ହୁ ହୁ ହୋଇ ବଢ଼ି ଚାଲିଥିବାବେଳେ ପ୍ରକୃତି ର ଏପରି ତାଣ୍ଡବଲୀଳାରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି । କେବେ ପରିସ୍ଥିତି ସୁଧୁରିବ ଓ ଅଞ୍ଚଳବାସୀଙ୍କ କ୍ଷୟକ୍ଷତି ର ଆକଳନ ହୋଇ ପ୍ରଶାସନ କ୍ଷତିପୂରଣ ପ୍ରଦାନ କରିବା ଦେଖିବାକୁ ବାକି ରହିଲା ।