ରିପୋର୍ଟ : ଧ୍ରୁବରାଜ ମିଶ୍ର
ବିନିକା, (୧୪/୮) : ଗତ କିଛି ଦିନ ଧରି ପ୍ରବଳ ବର୍ଷା ଓ ଗତକାଲି ହୀରାକୁଦ ଜଳଭଣ୍ଡାରରୁ ୩୪ ଟି ଗେଟ ଯୋଗେ ଜଳ ନିଷ୍କାସନ ହେବା ପରେ ବିନିକା ଦେଇ ପ୍ରବାହିତ ମହାନଦୀରେ ବନ୍ୟା ପାଣି ଯୋଗୁଁ ଦୁଇ କୂଳ ଫୁଲି ଉଠିଛି ।
ମହାନଦୀକୁ ସଂଯୋଗ କରୁଥିବା ନଦୀ, ନାଲ, ନାଲିଆ, ଜୋରରେ ପ୍ରଭାହୀତ ଭରପୁର ପାଣି ଯୋଗୁଁ ମହାନଦୀରେ ବନ୍ୟା ପାଣି ଆହୁରି ବଡ଼ିବାରେ ଲାଗିଛି । ଫଳରେ ନଦୀ କୁଳିଆ ଲୋକେ ଆତଙ୍କିତ ଅବସ୍ଥାରେ ଜୀବନ ବିତାଉଥିବା ଜଣାପଡିଛି । ସୂଚନା ଯୋଗ୍ୟ ଯେ, ୧୦/୧୧ ବର୍ଷ ଆଗରୁ ମହାନଦୀରେ ପ୍ରଳୟଙ୍କରୀ ବନ୍ୟା ଆସିଛି । ବନ୍ୟା ସମୟରେ ବର୍ଷା ପାଣି ନିଷ୍କାସନ ହୋଇ ନ ପାରିବା ଓ ମହାନଦୀ ର ବନ୍ୟାପାଣି ବିନିକା ବିଜ୍ଞାପିତ ପରିଷଦ ଅଧିନସ୍ତ ଗାଁ ମାନଙ୍କରେ ଓ ସହରର ବିଭିନ୍ନ ତଳିଆ ସ୍ଥାନକୁ ମାଡି ଆସିବା ଯୋଗୁଁ ଅଭାବନୀୟ ପରିସ୍ଥିତି ସୃଷ୍ଟି ହୋଇଛି ।
ବିନିକା ର ପର୍ଯ୍ୟଟନ ସ୍ଥଳୀ ପାପକ୍ଷୟ ଘାଟ, ରହିଲା, ଭମରପାଲି, ଗୋଲାପଡ଼ା ଓ ବ୍ଲକ ଅଞ୍ଚଳ ର ଅରିଗାଁ, ମନିଗାଁ, ଝରାପଡ଼ା, ଗଣେଶ ପୁର, ସେଲେଡି, ତୁଲୁଣ୍ଡୁପାଲି, ଗରିଆପାଲି, କରତଙ୍ଗ, ଘୋଡ଼ାଧର, ପଣ୍ଡକିତାଳ ପ୍ରଭୃତି ଗାଁ ମାନଙ୍କରେ ବନ୍ୟା ପାଣି ପଶି ବ୍ୟାପକ କ୍ଷୟକ୍ଷତି ଘଟିଛି । ଏଥର ବି ଆଗଭଳି ପରିସ୍ଥିତି ଆଶଙ୍କା ଥିବାରୁ ନଦୀ କୂଳିଆ ଗାଁ ଲୋକେ ଭୟଭୀତ ହୋଇ ପଡିଛନ୍ତି । ନଦୀ କୂଳିଆ ଗାଁ ମାନଙ୍କରେ ପଥର ଆଡ଼ିବନ୍ଧ ନିର୍ମାଣ କରାଯିବାକୁ ଦାବି ହୋଇ ଆସୁଥିଲେ ମଧ୍ୟ ଏଥିପ୍ରତି ପଦଷେପ ନିଆ ଯାଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି ।
ବିଶେଷ କରି ଅଙ୍ଗନଦୀ ଓ ମହାନଦୀ ମୁହାଣରେ ରହୁଥିବା ଗ୍ରାମବାସୀ ବିପଦକୁ ବାଜି ଲଗାଇ ବନ୍ୟା ର ସମ୍ମୁଖୀନ ହେଉଥିବାର ନଜିର ରହିଛି । ପକ୍ଷରେ ମହାନଦୀରେ ବନ୍ୟା ପାଣି ପ୍ରବାହିତ ହୋଇ ଗୋଲାପଡା ଗ୍ରାମ ର ତଳିଅଞ୍ଚଳ, ସିନ୍ଦୂରପୁର ଗ୍ରାମ ପଞ୍ଚାୟତ ର ଝରାପଡ଼ା, ସେଳେଡି ର ଝରାପଡ଼ା ଆଦି ଅଞ୍ଚଳରେ ପାଣି ମାଡି ଯାଇଥିବାରୁ ଶହଶହ ହେକ୍ଟର ଚାଷ ଜମି ପାଣିରେ ବୁଡି ରହିଛି । ଯଦି ବର୍ଷା ଲାଗି ରୁହେ ଓ ହୀରାକୁଦ ଜଳଭଣ୍ଡାରରୁ ଅଧିକ ଗେଟ ଖୋଲାଯାଏ ତେବେ ବିନିକା ଅଞ୍ଚଳରେ ବନ୍ୟା ପରିସ୍ଥିତି ଆହୁରି ଭୟଙ୍କର ହେବାର ଆଶଙ୍କା ରହିଛି ।
ସନ୍ଧ୍ୟାରେ ବୀରମହାରାଜପୁର ବିଧାୟକ ପଦ୍ମନାଭ ବେହେରା ବିନିକା ଗସ୍ତରେ ଅଚାନକ ଆସି ବନ୍ୟା ଅଞ୍ଚଳ ର ୨/୩ନଂ ୱାର୍ଡ ପରିଦର୍ଶନ କରି ଲୋକଙ୍କ ସହିତ କଥାବାର୍ତ୍ତା ହେବା ସହ ତୁରନ୍ତ ସେମାନଙ୍କ ସମସ୍ୟା ର ସମାଧାନ ପ୍ରତି ପ୍ରଶାସନିକ ଅଧିକାରୀ ଙ୍କୁ ନିର୍ଦ୍ଦେଶ ଦେଇଛନ୍ତି । ବିଧାୟକଙ୍କ ସହ ଏନଏସି ନଗରପାଲ ସୁବାସ ଚନ୍ଦ୍ର ଭୋଇ, ଉପ ନଗରପାଳ ତପସ୍ୱୀନୀ ମେହେର, କାର୍ଯ୍ୟ ନିର୍ବାହୀ ଅଧିକାରୀ ଶ୍ରୀକୁମାର ରଥ, ନଗର ସଭାପତି ସୋମନାଥ ମିଶ୍ର, ହଲୟୁଧ ମିଶ୍ର, କାଉନସିଲର, କର୍ମଚାରୀ ପ୍ରମୁଖ ଉପସ୍ଥିତ ଥିଲେ ।