ରିପୋର୍ଟ : ଗୋପୀନାଥ ଗୌଡ଼
ରାୟଗଡା, (୧୧/୫) : ଆଜ୍ଞା ପଇସା ପଠେଇଥିଲି । ତତେ ମଳିଲାକି ? ଅଫିସର ଆଜ୍ଞା କହିଲା ବୋଲି ସେ ନାଲା ଆଉ ସଦବ ମାଗିଆସିଥିଲା ।
କହିଲା ଅଫିସର ଆଜ୍ଞାମାନଙ୍କ ସହ ବାଣ୍ଟିକି ଖାଇବୁ । ଟଙ୍କା ଦେ ବୋଲି ମାଗିବାରୁ ଦେଇଛି । ତତେ ମିଳିଲା ନା ନାହିଁ ବୋଲି ରାୟଗଡା ଅତିରିକ୍ତ ଜିଲ୍ଲାପାଳଙ୍କୁ ଟିମି ପୁଷିକା ନାମ୍ନୀ ଜଣେ ଡଙ୍ଗରିଆ ଝିଅ ପ୍ରଶ୍ନ କରିଛି । ସୁଦୂର ନିୟମଗିରି ପାହାଡରୁ ଆସି ଟିମିର ଏଭଳି ପ୍ରଶ୍ନ ସଭିଙ୍କୁ ଚକିତ କରିଦେଇଛି । ଡିକେଡିଏ, ଓପିଲିପିର ନାଁକୁ ନେଇ ଗୁରବାର ସକାଳୁ ସକାଳୁ ପ୍ରଶାସନକୁ ଆକ୍ଷେପ କରିଛି ସେ । ଡ଼ଙ୍ଗରିଆ ବସ୍ତିମାନଙ୍କରେ ବିକାଶ ପାଣ୍ଠି କେତେଯେ ହରିଲୁଟ ହେଉଛି ତାହା ସ୍ପଷ୍ଟ ହୋଇଯାଇଛି ।
ନିୟମଗିରି ପାର୍ବତ୍ୟ ମାଳାରେ ରହୁଥିବା ଆଦିମ ଜନଜାତିଙ୍କ କୃଷିର ବିକାଶ ନାରାଦେଇ ଚାଟିକଣା ଠାରେ ଓପିଲିପି ଅଧିନରେ କାର୍ଯ୍ୟ କରୁଥିବା ଓଡ଼ିଶା ଆଦିବାସୀ ଜନଜାତି ସଶକ୍ତିକରଣ ଓ ଜୀବିକା ଉନ୍ନତିକରଣ (ଓପିଲିପି) କରୁଛି ପ୍ରତାରଣା । ପ୍ରବେଶ ଦ୍ୱାରରେ ଓଡିଶା ସରକାର, ଆଇଫାଡ ଓ ଓପିଲିପିର ବଡବଡ ସୁଚନା ଫଳକ ଲଗାଇ ପାହାଡ ଭିତରେ ନିରୀହ ଆଦିବାସୀଙ୍କ ପାଇଁ ଆସୁଥିବା ଟଙ୍କାକୁ ବାଟମାରଣା କରୁଛନ୍ତି ଏହି ବିଭାଗର ତଳ ଠାରୁ ଉପର କର୍ମଚାରୀମାନେ । ଆଉ ଋତୁଭିତ୍ତିକ ଚାଷ ବ୍ୟବସାୟ ନାମରେ ୨୭ହଜାର ଟଙ୍କା ଦେଇ ସେଥିରୁ ୬ହଜାର ୫ଶହ ଟଙ୍କା କିଭଳି ବାଟମାରଣା କରିନେଇଛନ୍ତି ଏହି ବାବୁମାନେ ତାହା ଅଭିଯୋଗ କରିବାକୁ ପାହାଡରୁ ଓଲ୍ହାଇ ଆସିଥିବା ଡଙ୍ଗରିଆ ମହିଳା ଟିମି ପୁଷିକା ପହଞ୍ଚିଛି ଜିଲ୍ଲାପାଳଙ୍କ କାର୍ଜ୍ୟାଳୟରେ । ଅଭିଯୋଗ କରିବା ପରେ ଏହାର ପର୍ଦ୍ଦାଫାସ ହୋଇଛି ।
ବିରଳ ପ୍ରଜାତିର ଜନଜାତି ଡଙ୍ଗରିଆ ମହିଳା ଟିମି ପୁଷିକା ଗୁରବାର ଜିଲାପାଳଙ୍କ କାର୍ଯ୍ୟାଳୟରେ ଆସି ପହଞ୍ଚିଥିଲା । ଆଉ ବ୍ୟବସାୟ ନାମରେ ଦିଆଯାଇଥିବା ୨୭ହଜାର ଟଙ୍କାରୁ ୬୫୦୦ ଟଙ୍କା କିପରି ଡିକେଡିଏ ଅଧିନରେ କାର୍ଯ୍ୟ କରୁଥିବା ଓପିଲିପିର ବାବୁମାନେ ବାଟମାରଣା କରିଛନ୍ତି ସେ ସମ୍ପର୍କରେ ଅଧିକାରୀଙ୍କୁ ଅନର୍ଗଳ କହିଚାଲିଥିଲା । ନିୟମଗରି ପାର୍ବତ୍ୟମାଳାରେ ରହୁଥିବା ଡଙ୍ଗରିଆ କନ୍ଧଙ୍କ କୃଷି କ୍ଷେତ୍ରରେ ବିକାଶ ପାଇଁ ଓଡିଶା ସରକାରଙ୍କ ସହ ହାତ ମିଶାଇ ଆନ୍ତର୍ଜାତୀୟ ସଂସ୍ଥା ଆଇଫାଡ ଶହ ଶହ କୋଟି ଟଙ୍କା ବିନିଯୋଗ କରିଆସୁଛି । ଆଉ ଓଡ଼ିଶା ଆଦିବାସୀ ଜନଜାତି ସଶକ୍ତିକରଣ ଓ ଜୀବିକା ଉନ୍ନତିକରଣ (ଓପିଲିପି) ସହିତ ଆକୁସୁସ ନାମକ ଏକ ଏନଜିଓ ଦ୍ୱାରା ଏହି ଯୋଜନାକୁ ସାକାର କରିବା କାର୍ଯ୍ୟ ତୁଲାଇ ଆସୁଛି । ତେବେ ଏହି ସମସ୍ତ ବିଭାଗର ବାବୁମାନେ କିଭଳି ଟଙ୍କା ମାଗିନେଇଛନ୍ତି ଆଉ ନିଜର ପ୍ରାପ୍ୟ ପାଇବା ପାଇଁ ପାହାଡ ଛାଡି ଅସିଥିବା ଜଣେ ଡଙ୍ଗରିଆ ମହିଳାଙ୍କ କଥା ଶୁଣିବା ପରେ ଉପସ୍ଥିତ ଲୋକେ ଚକିତ ହୋଇଯାଇଛନ୍ତି ।
ବିଷମକଟକ ବ୍ଲକର ଚାଞ୍ଚଡାଗୁଡା ଗ୍ରାମ ପଞ୍ଚାୟତ ଅନ୍ତର୍ଗତ ନିୟମଗିରି ପାହାଡ ପାଦଦେଶରେ ବାଲାପାଇ ଗାଁ । ବ୍ୟବସାୟ କରିବା ପାଇଁ ଗ୍ରାମର ଟିମି ପୁଷିକାଙ୍କୁ ୨୭ ହଜାର ଟଙ୍କା ଦିଆଯାଇଥିଲା । ଏହି ଟଙ୍କା ଟିମିଙ୍କ ଜମା ଖାତାକୁ ଆସିବା ପରେ ବାବୁମାନେ ଟିମିଙ୍କ ଘର ଦାଣ୍ଡରେ ଆସି ପହଞ୍ଚିଥିଲେ । ଆଉ ଓଜନ କରିବା ପାଇଁ ଡିଜିଟାଲ ନିକିତି ଯାହାର ଦାମ ୭ହଜାର ୯ଶହ ଟଙ୍କା, ସେହିପରି ୫ହଜାର ୫ଶହ ଟଙ୍କା ମୂଲ୍ୟର ଗେଟିଏ ସାଇକେଲ ଏବଂ ୮ଶହ ଟଙ୍କା ଦେଇ ଦୁଇଟି ଚୌକି କିଣିଦେଇଥିଲ । ପରେ ଆସି ତା ଜମା ଖାତରେ ଥିବା ଟଙ୍କାରୁ ୬୫୦୦ ଟଙ୍କା ମାଗି ନେଇଯାଇଥିବା ଟିମି ପୁଷିକା ଅଧିକାରୀଙ୍କ ଆଗରେ ଅଭିଯୋଗ କରିଛନ୍ତି । ଅଧିକାରୀଙ୍କ ଆଗରେ ରମେଶ ନାଲା, ସହଦେବ ଭଳି କିଛି ବ୍ୟକ୍ତିବିଶେଷଙ୍କ ନାମ ଟିମିଙ୍କ ମୁହଁରୁ ବାରମ୍ବାର କହୁଥିବା ଶୁଣିବାକୁ ମିଳିଥିଲା । ଅଫିସରମାନେ ସବୁ ଏ ଟଙ୍କା ନେବେ ବୋଲି ରମେଶ ଓ ସହଦେବ ତାକୁ ଭିଡିଓ କଲ ମାଧ୍ୟମରେ କହିଥିଲେ ବୋଲି ସେ କହିଥିଲା । ତା ପାଖରେ ମୂଳଧନ ନାହିନ ବୋଲି ସେ କହିଥିଲା । ଆଉ ସେଥିପାଇଁ ସେ ଅତିରିକ୍ତ ଜିଲ୍ଲାପାଳଙ୍କୁ ଜୋର କରି ପଚାରିଥିଲା, “ଆଜ୍ଞା ପଇସା ପଠେଇଥିଲି । ତତେ ମଳିଲାକି ?”
ସେହିପରି ଗ୍ରାମର ଶିଶୁମାନଙ୍କ ଖାଇବା ପାଇଁ ମଜୁରି ବାବଦରେ ରନ୍ଧା ଟଙ୍କା ମଧ୍ୟ ଗତ ୧୪ ମାସ ଧରି ମିଳିନଥିବା ସେ ଅଭିଯୋଗ କରିଛନ୍ତି । ବାଲାପାଇ ଗାଁର ଶିଶୁଙ୍କ ପୁଷ୍ଟି ସାଧନ ନିମନ୍ତେ ରୋଷେଇ କରି ଯୋଗାଇବା ପାଇଁ ଟିମିକୁ ପ୍ରକଳ୍ପ ତରଫରୁ ନିୟୋଜିତ କରାଯାଇଛି । ମାସିକ ୩ ହଜାର ଟଙ୍କା ଦିଆଯିବ ବୋଲି କୁହାଯାଇଥିଲେ ମଧ୍ୟ ଟଙ୍କାଟିଏ ବି ମଜୁରି ମିଳିନାହିଁ । ଓପେଲିପ ଅଧିକାରୀ ମାନଙ୍କୁ ବାରମ୍ବାର ଅଭିଯୋଗ କରିବା ପରେ ସେମାନେ ନଶୁଣିବାରୁ ଅଭିଯୋଗ କରିବା ପାଇଁ ନିଜ ଭାଇକୁ ସାଥିରେ ଧରି ଜଙ୍ଗଲ ପାହାଡ ଛାଡି ସହରକୁ ଆସିଥିବା ସେ କହିଛି ।
ପାହାଡ ଭିତରର ମାତ୍ର ଗୋଟିଏ ଗାଁ ବାଲାପାଇର ଏହା ହେଉଛି ବିକଳ ଚିତ୍ର । କେବଳ ୬୫୦୦ ଟଙ୍କା ବାବୁମାନେ ଛାଡିଲେ ନାହିଁ । ବାବୁମାନେ ବାଣ୍ଟିନେବେ କହି ନିରୀହ ଡଙ୍ଗରିଆ ମହିଳାଙ୍କ ଠାରୁ ଠକି ନେଇଗଲେ । ତେବେ ପ୍ରଶ୍ନ ଉଠୁଛି ଯେ ଡିକେଡିଏ ଚାଟିକଣା ଅଧିନରେ ଆସୁଥିବା ବିଷମକଟକ ଓ ମୁନିଗୁଡା ବ୍ଲକର ୧୦୦ ରୁ ଅଧିକ ଗାଁମାନଙ୍କରେ ଆଦିମ ଜନଜାତିଙ୍କ ବିକାଶର ଅର୍ଥ କେତେ ସୁରକ୍ଷିତ ? ନିୟମଗିରି ପାହାଡରେ ଡିକେଡିଏ ଦ୍ଵାରା ୧୧କୋଟି ୧୧ଲକ୍ଷ ଟଙ୍କା କେବଳ ୨୦୨୨-୨୦୨୩ ବର୍ଷ ପାଇଁ ପ୍ରକଳ୍ପ ଅଟକଳ କରି ଖର୍ଚ୍ଚ କରାଯାଇଛି । ଏହି ଅର୍ଥକୁ ଠିକ ଭାବରେ ବିନିଯୋଗ କରିବା ପାଇଁ ଲୋକଙ୍କ ଟିକସରୁ ବେତନ ଦେଇ ସରକାର ଜଣେ ସ୍ୱତନ୍ତ୍ର ଅଧିକାରୀ, ପ୍ରକଳ୍ପ ପରିଚାଳକଙ୍କ ସମେତ ୧୨ଜଣ କର୍ମଚାରୀ ନିୟୋଜିତ କରିଛନ୍ତି ।
ଏହାର ସଫଳ ରୁପାୟନ ପାଇଁ ଆକସୁସ ନାମକ ଏକ ବେସରକାରୀ ଅନୁଷ୍ଠାନର ସହାୟତା ନିଆଯାଇଛି । ସେମାନେ ମଧ୍ୟ ୩୦ରୁ ଅଧିକା କର୍ମଚାରୀ ନିୟୋଜନ କରିଛନ୍ତି । ତେବେ ବାଡ ଯଦି ଫସଲ ଖାଇଯିବ, ତେବେ ଗୁହାରି କରିବା କାହାକୁ ? ଟିମି ପୁଷିକାର ଅଭିଯୋଗ ପରେ ଏହା ଏକ ବଡ ପ୍ରଶ୍ନ ହୋଇ ଠିଆହୋଇଛି । ଡଙ୍ଗରିଆ ଝିଅଟିର ବିକଳ ସ୍ୱର ଶୁଣିବା ପରେ ଅତିରିକ୍ତ ଜିଲାପାଳ ଧର୍ମାନନ୍ଦ ବେହେରା ବିଷମକଟକ ବ୍ଲକ ଗୋଷ୍ଠୀ ଉନ୍ନୟନ ଅଧିକାରୀଙ୍କୁ ତୁରନ୍ତ ତଦନ୍ତ ଭାର ଦିଆଯିବ ବୋଲି କହିଛନ୍ତି । ସମ୍ପୃକ୍ତ ଝିଅର ଘରକୁ ଯାଇ ସମସ୍ତ ବିଷୟ ତଦନ୍ତ କରି ଆସିବାକୁ ନିର୍ଦ୍ଦେଶ ଦିଆଯିବ ବୋଲି ସେ ମତବ୍ୟକ୍ତ କରିଛନ୍ତି ।