ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୩/୨) : ଓଡିଆ ଭାଷାର ପ୍ରଚାର ପ୍ରସାର ତଥା ଗବେଷଣାକୁ ପ୍ରାଧାନ୍ୟ ଦେବା ହେଉଛି ପ୍ରଥମ ବିଶ୍ଵ ଓଡ଼ିଆ ଭାଷା ସମ୍ମିଳନୀର ପ୍ରଥମ ଲକ୍ଷ । ଆଜି ଏହି ସମ୍ମିଳନୀ ରାଜ୍ୟ, ଜାତୀୟ ଓ ଅର୍ନ୍ତଜାତୀୟ ସ୍ତରରେ ଆୟୋଜନ କରାଯାଉଛି ।
ଏହି ଅବସରରେ ଆଜି ପ୍ରଥମେ ଗୁଣୁପୁର ଉପଜିଲ୍ଲାପାଳଙ୍କ କାର୍ଯ୍ୟଳୟରେ ବନ୍ଦେ ଉତ୍କଳ ଜନନୀ ଗାନ ପୂର୍ବକ ସମ୍ମୀଳନୀର ଶୁଭାରମ୍ଭ ହୋଇଥିଲା । ତତ୍ ପରେ ଗୁଣୁପୁର ପୌରପରିଷଦ ତରଫରୁ ଟାଉନ ହଲ୍ ଠାରେ ଏକ ଭବ୍ୟ ସଭାର ଆୟୋଜନ କରାଯାଇଥିଲା । ଏହି କାର୍ଯ୍ୟକ୍ରମରେ ମୂଖ୍ୟ ଅତିଥି ଭାବେ ଗୁଣୁପୁର ବିଧାୟକ ରଘୁନାଥ ଗମାଙ୍ଗ ଯୋଗ ଦେଇ ଓଡ଼ିଆ ଭାଷା ଆମ ଐତିହ୍ୟପୂର୍ଣ୍ଣ ଅତୀତର ଅସ୍ତିତ୍ବ ଓ ସୂର୍ଣ୍ଣିମ ଭବିଷ୍ୟତ ବୋଲି କହିବା ସହ ପ୍ରତିଦିନ ଦୁଇ ଧାଡି ଓଡ଼ିଆରେ ଲେଖିବାକୁ ଅନୁରୋଧ କରିଥିଲେ । ସମ୍ମାନୀତ ଅତିଥି ଭାବେ ଗୁଣୁପୁର ଉପଜିଲ୍ଲାପାଳ ସୁଶ୍ରୀ କିରନଦୀପ କୌର ଯୋଗଦେଇ ଓଡ଼ିଆ ଭାଷା ପ୍ରତିଟି ଓଡ଼ିଆଙ୍କ ଗର୍ବ ବୋଲି କହିଥିଲେ । ପୌର ଅଧ୍ୟକ୍ଷା ମମତା ଗୌଡ ପ୍ରଥମ ବିଶ୍ଵ ଓଡ଼ିଆ ଭାଷା ସମ୍ମିଳନୀ ହେଉଛି ପ୍ରତିଟି ଓଡ଼ିଆଙ୍କ ପାଇଁ ଜୀବନର ସବୁଠୁ ଗୌରବ ପୂର୍ଣ୍ଣ ଅଧ୍ୟାୟ ବୋଲି ନିଜ ଅଭିଭାଷଣରେ କହିଥିଲେ ।
ପୌରପରିଷଦର କାର୍ଯ୍ୟନିର୍ବାହୀ ଅଧିକାରୀ ସ୍ଵସ୍ତିକ ଜମାଦାର ନିଜ ଅଭିଭାଷଣରେ କହିଥିଲେ ଯେ , ରାଜ୍ୟ ତଥା ରାଜ୍ୟ ବାହାରେ ରହୁଥିବା ଓଡ଼ିଆ ଯୁଵଵର୍ଗଙ୍କ ମଧ୍ୟରେ ଜାଗରଣ ସୃଷ୍ଟି କରିବା ଉଦ୍ଦେଶ୍ୟରେ ଏହି ସମ୍ମିଳନୀ ଆୟୋଜନ କରାଯାଇଛି, ଭାଷା ହେଉଛି ପରମ୍ପରା ଓ ପ୍ରଗତିର ଏକ ସଂଯୋଜକ ସେତୁ , ବିକାଶକୁ ଯୋଡିଵାର ମୂଖ୍ୟ ମାର୍ଗ । ଏହି ଅବସରରେ କୁନି କୁନି ପିଲାଙ୍କୁ ନେଇ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ଓ ସାହିତ୍ୟ ସାଧକ ଓ ଓଡ଼ିଆ ଭାଷା ପ୍ରେମିଙ୍କୁ ନେଇ କବିତା ପାଠ କରାଯାଇଥିଲା ।
ଶେଷରେ ବରିଷ୍ଠ ସାହିତ୍ୟିକ ମାନଙ୍କୁ ଉପଢୌକନ ଓ ଜଗନ୍ନାଥଙ୍କ ପ୍ରତିକୃତି ଦେଇ ସମ୍ମାନୀତ କରାଯାଇଥିଲା । ବିଶେଷ କରି ଏହି ସମ୍ମିଳନୀର ଆୟୋଜନ ଦ୍ଵାରା ରାଜ୍ୟ , ଜାତୀୟ ଓ ଅନ୍ତର୍ଜାତୀୟ ସ୍ତରରେ ଓଡ଼ିଆ ଭାଷାର ପ୍ରଚାର ପ୍ରସାର ତଥା ଉନ୍ନତି କରାଯାଇପାରିବ ଏଥିରେ ତିଳେ ମାତ୍ର ସନ୍ଦେହ ନାହିଁ ।