ରିପୋର୍ଟ : ଶ୍ୟାମଳେନ୍ଦୁ ପରିଡ଼ା
ରାଇରଙ୍ଗପୁର, ମୟୁରଭଞ୍ଜ, (୧୮/୦୩) : ଆସନ୍ତା ମାର୍ଚ୍ଚ ୨୪ ତାରିଖରୁ ହେବାକୁ ଥିବା ରାଇରଙ୍ଗପୁର ପୌର ପରିଷଦ ର ୫ ଜଣ ଅଧ୍ୟକ୍ଷ ପ୍ରାର୍ଥି ଏବଂ ୫୦ ଜଣ ପ୍ରାର୍ଥୀଙ୍କ ଯାଞ୍ଚ ସରିଛି । ପ୍ରାର୍ଥୀ ପତ୍ର ଯାଞ୍ଚ ସମୟରେ ବିଜେଡ଼ିର ୩ ଜଣ ପ୍ରାର୍ଥୀଙ୍କ ତୃଟି ଥିବା ନେଇ ବିଜେପି ଓ କଂଗ୍ରେସ ଦଳ ତରଫରୁ ରିଟର୍ଣିଂ ଅଫିସର ଓ ଉପଜିଲ୍ଲାପାଳ ସରୋଜ କୁମାର ଦାସଙ୍କୁ ପ୍ରମାଣ ସହ ଲିଖିତ ଅଭିଯୋଗ କରିଥିଲେ ।
ଅଭିଯୋଗକୁ ଗ୍ରହଣ ନ କରି ଉପଜିଲ୍ଲାପାଳ କୋର୍ଟ ର ଆଶ୍ରୟ ନେବାକୁ ପରାମର୍ଶ ଦେଇଥିଲେ ଯାହାକୁ ଉଭୟ ଦଳର ନେତୃବୃନ୍ଦ ବିରୋଧ କରିଥିଲେ । ଏହି ୩ ୱାର୍ଡ ର ପ୍ରାର୍ଥୀଙ୍କ ବିରୋଧରେ ହୋଇଥିବା ଅଭିଯୋଗ ଅନୁସାରେ ୪ ନମ୍ବର ୱାର୍ଡ ର ବିଜେଡି ପ୍ରାର୍ଥିନୀ ଆରତୀ ମାରାଣ୍ଡି ସ୍ୱାମୀ -ଚାନ୍ଦରାଇ ମାରାଣ୍ଡି, ଗ୍ରାମ -କଲରଦା, ଗ୍ରାପ-ପୁରୁଣାପାଣି, ରାଇରଙ୍ଗପୁର ବ୍ଲକ ବାସିନ୍ଦା ଅଟନ୍ତି । ଚଳିତ ପଞ୍ଚାୟତ ନିର୍ବାଚନରେ ତାଙ୍କ ନାମ କଲ୍ୟାଣ, ୭ନଂ ବୁଥ କ୍ରମାଙ୍କ -୨୮୯ରେ ଥିଲା । ସେ ଗତ ୨୨/୦୧/୨୦୨୨ ରୁ ପଞ୍ଚାୟତ ନିର୍ବାଚନରେ ଭୋଟ ଦେଇଥିଲେ । ଅପରପକ୍ଷରେ ଆରତୀ ମାରାଣ୍ଡି, ସ୍ୱାମୀ -ଚାନ୍ଦରାଇ ମାରାଣ୍ଡିଙ୍କ ନାମ ରାଇରଙ୍ଗପୁର ପୌର ପରିଷଦ ଭୋଟର ତାଲିକାରେ ବୁଥ ନଂ ୬,କ୍ରମିକ ସଂଖ୍ୟା ୯୨୬ ରେ ରହିଛି ।
ତେଣୁ ଭୋଟର ନିୟମ ଅନୁସାରେ ଜଣଙ୍କର ଗୋଟିଏ ଜାଗାରେ ନାମ ରହିବା କଥା କିନ୍ତୁ ଆରତୀଙ୍କୁ ନାମ ଉଭୟ ପଞ୍ଚାୟତ ଏବଂ ପୌର ପରିଷଦରେ ନାମ ତାଲିକା ଥିବାରୁ ପ୍ରାର୍ଥୀତ୍ୱ ଖାରଜ ପାଇଁ ବିରୋଧୀ ଦଳ ତରଫରୁ ଦାବି ହୋଇଥିଲା ଯାହାକି ନିର୍ବାଚନ ଅଫିସର ଗ୍ରହଣ କରି ନ ଥିଲେ । ସେହିଭଳି ୱାର୍ଡ ନମ୍ବର ୧୩ ର ପ୍ରାର୍ଥିନୀ ଧୀରା ବେଶ୍ରା ସ୍ୱାମୀ -ସ୍ୱର୍ଗତ ଚୈତନ ବେଶ୍ରାଙ୍କ ଦୁଇରୁ ଅଧିକ ସନ୍ତାନ ଥିବା ନେଇ ଅଭିଯୋଗ ହୋଇଥିଲା ।
ଧୀରାଙ୍କର ପ୍ରଥମ କନ୍ୟା ୧୪/୦୬/୧୯୯୩, ଦିତୀୟ ସନ୍ତାନ ୧୧/୦୪/୧୯୯୭, ଏବଂ ତୃତୀୟ ସନ୍ତାନ ୧୭/୦୭/୧୯୯୯ ରେ ଜନ୍ମ ଗ୍ରହଣ କରିଥିଲେ । ନାମାଙ୍କନ ସତ୍ୟପାଠ ଅନୁସାରେ କୌଣସି ପ୍ରାର୍ଥୀଙ୍କ ୧୯୯୪ ମସିହା ପରଠାରୁ ତୃତୀୟ ସନ୍ତାନ ଜନ୍ମ ନେଇଥିଲେ ସେ ଅଯୋଗ୍ୟ ଘୋଷିତ ହେବେ । ବିରୋଧୀ ଦଳ ଅଭିଯୋଗ ଓ ଦୁଇ ସନ୍ତାନଙ୍କ ଜନ୍ମ ପ୍ରମାଣ ପତ୍ର ର ନକଲ ଦାଖଲ କରାଯିବା ସତ୍ତ୍ୱେ ନିର୍ବାଚନ ଅଫିସର ତାହା ଗ୍ରହଣ କରି ନ ଥିଲେ ।
ସେହିପରି ୯ ନମ୍ବର ୱାର୍ଡ ର ବିଜେଡି ପ୍ରାର୍ଥୀ ମଙ୍ଗଲ ମାରାଣ୍ଡିଙ୍କ ତିନୋଟି ସନ୍ତାନ ଥିବା ନେଇ ପ୍ରମାଣ ସହ ବିରୋଧୀ ଦଳ ଅଭିଯୋଗ କରାଥିଲେ ମଧ୍ୟ ନିର୍ବାଚନ ଅଫିସର ତାହା ଗ୍ରହଣ କରି ନ ଥିଲେ । ଏହାକୁ ୩ଟି ୱାର୍ଡ ର ପ୍ରାର୍ଥୀଙ୍କ ପ୍ରାର୍ଥୀତ୍ୱ ନାକଚ ପାଇଁ ବିଜେପି ତରଫରୁ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ, ଜିଲ୍ଲାପାଳ, ରାଜ୍ୟ ବିଜେପି ସଭାପତିଙ୍କ ନିକଟକୁ ଇ-ମେଲ୍ ଯୋଗେ ପଠାଯାଇଛି ବୋଲି ବିଜେପି ବିଧାୟକ ତଥା ପଶ୍ଚିମ ମୟୁରଭଞ୍ଜ ବିଜେପି ଜିଲ୍ଲା ସଭାପତି ନବ ଚରଣ ମାଝୀ ଗଣମାଧ୍ୟମକୁ ସୂଚନା ଦେଇଥିବା ବେଳେ କଂଗ୍ରେସ ଦଳ ତରଫରୁ ମଧ୍ୟ ରାଜ୍ୟ ନେତୃବୃନ୍ଦ ଏବଂ ରାଜ୍ୟ ନିର୍ବାଚନ ଅଧିକାରୀଙ୍କୁ ଅଭିଯୋଗ ଇ-ମେଲ୍ ଯୋଗେ ପଠାଇଛନ୍ତି ।