ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୦୪/୦୯) : ଆଜି ଆଦିବାସୀ ସଂଘର୍ଷ ମୋର୍ଚ୍ଚା ତରଫରୁ ଶତାଧିକ ପୁରୁଷ ଓ ମହିଳା ଗୁଣପୁର ନୂତନ ବସଷ୍ଟାଣ୍ଡ ଠାରେ ଏକ ବିଶାଳ ଶୋଭାଯାତ୍ରାରେ ବାହାରି ଗୁଣପୁର ତହସିଲ କାର୍ଯ୍ୟାଳୟ ସମ୍ମୁଖରେ ଏକ ପ୍ରତିବାଦ ସଭା ର ଆୟୋଜନ କରାଯାଇଥିଲା ।
ଗୁଣପୁର ତହସିଲ କାର୍ଯ୍ୟାଳୟ କୁ ଯାଇ ୧୨ ଦଫା ଦାବି ସମ୍ବଳିତ ଏକ ସ୍ମାରକପତ୍ର ତହସିଲଦାରଙ୍କୁ ପ୍ରଦାନ କରାଯାଇଥିଲା । ଆଦିବାସୀ ମାନଙ୍କର ହକ ପାଇଁ ବାରମ୍ବାର ପ୍ରତିବାଦ ସଭା, ଗଣ ଧାରଣା ସହ ଦାବି ପତ୍ର ପ୍ରଦାନ କରାଯାଉଥିଲେ ମଧ୍ୟ ସରକାର ଏହାକୁ ଗୁରୁତ୍ୱ ଦେଉନଥିବାରୁ ଆଦିବାସୀ ସଂଘର୍ଷ ମୋର୍ଚ୍ଚା ର କେନ୍ଦ୍ର କମିଟି ସଭ୍ୟ ତ୍ରିପତୀ ଗମାଙ୍ଗ କ୍ଷୋଭ ପ୍ରକାଶ କରିଛନ୍ତି ।
ଦେଶ ସ୍ୱାଧୀନତା ର ୭୫ ବର୍ଷ ବିତିଯାଇଥିଲେ ମଧ୍ୟ ଆଜି ବି ଆଦିବାସୀ ସମ୍ପ୍ରଦାୟ ନିଜ ଅଧିକାର ଜମି, ଜଳ, ଜଙ୍ଗଲ, ଶିକ୍ଷା, ସ୍ୱାସ୍ଥ୍ୟସେବା, ଜୀବନ ଜୀବିକା, ଖାଦ୍ୟ ସୁରକ୍ଷା, ପାନୀୟ ଜଳ ଆଦି ପାଇଁ ସଂଘର୍ଷ କରୁଛନ୍ତି । ସରକାର ଏହାକୁ କର୍ପୋରେଟ ହାତକୁ ଟେକିଦେଇଥିବାରୁ ସେମାନେ ଆଦିବାସୀ ମାନଙ୍କୁ ଜଙ୍ଗଲ ଓ ଜମିରୁ ବେଦଖଲ କରୁଛନ୍ତି । ଫଳରେ ଆଦିବାସୀ ମାନଙ୍କର ଜୀବନ ଜୀବିକା ଅସୁରକ୍ଷିତ ହୋଇଉଠିଛି । ନିଜର ସଂସ୍କୃତି ଓ ପରମ୍ପରାକୁ ବଞ୍ଚାଇ ରଖିବାକୁ ଆଜି ଏହି ଆଦିମ ଆଦିବାସୀ ମାନେ ସଂଘର୍ଷମୟ ଜୀବନ ବିତାଇବାକୁ ବାଧ୍ୟ ହେଉଛନ୍ତି ବୋଲି ଆଦିବାସୀ ସଂଘର୍ଷ ମୋର୍ଚ୍ଚା ର କର୍ମକର୍ତ୍ତା ମାନେ ମତ୍ତ ପ୍ରକାଶ କରିଛନ୍ତି ।
ସରକାରଙ୍କ ନିକଟରେ ରଖିଥିବା ୧୨ ଦଫା ଦାବି ମଧ୍ୟରେ ଗ୍ରାମିଣ ମୁଲିଆ ମାନଙ୍କୁ ଇନ୍ଦିରା ଆବାସ ବାବଦକୁ ଦୁଇ ଲକ୍ଷ ପଚାଶ ହଜାର ଟଙ୍କା ପ୍ରଦାନ, ଏମ ଜି ଏନ୍ ଆର୍ ଜି ଏ ଯୋଜନାରେ ବର୍ଷକୁ ୨୦୦ ଦିନ ର କାମ ଯୋଗାଇବା, ଜଙ୍ଗଲ ସଂରକ୍ଷଣ ନିୟମାବଳୀ ୨୦୨୦ ପ୍ରତ୍ୟାହାର କରିବା, ଗୁଣପୁର ବ୍ଲକର ଚାଲକମ୍ବା ଗ୍ରାମରେ ବେଆଇନ ଭାବେ ସରକାରୀ ଜମିକୁ ଅଣ ଆଦିବାସୀ ମାନଙ୍କ ଦଖଲରୁ ଫେରାଇ ଆଣି ଆଦିବାସୀ ମାନଙ୍କୁ ପ୍ରଦାନ କରିବା, ରେଜିଙ୍ଗତାଲ ଓ ଲୁଙ୍ଗୁରତାଲ ଗ୍ରାମରେ ଭୋଗ ଦଖଲରେ ଥିବା ଘର, ଡଙ୍ଗର ଓ ସରକାରୀ ଜମିକୁ ସେମାନଙ୍କ ନାମରେ ପଟ୍ଟା ପ୍ରଦାନ କରିବା, ପୁଟାସିଙ୍ଗ ନାମରେ ନାମିତ କରାଯାଇଥିବା ସମସ୍ତ କାର୍ଯ୍ୟାଳୟକୁ ପୁଟାସିଙ୍ଗ ସଦର ମହକୁମାରେ ସ୍ଥାପନ କରିବା ଆଦି ମୁଖ୍ୟ ଦାବି ନେଇ ଆଜି ତହସିଲଦାରଙ୍କୁ ଦାବି ପତ୍ର ପ୍ରଦାନ କରାଯାଇଥିଲା ।
ଏହି ଗଣ ପ୍ରତିବାଦ କାର୍ଯ୍ୟକ୍ରମକୁ ଆଦିବାସୀ ସଂଘର୍ଷ ମୋର୍ଚ୍ଚା ର କେନ୍ଦ୍ର କମିଟି ସଭ୍ୟ ତ୍ରିପତୀ ଗମାଙ୍ଗ ପରିଚାଳନା କରିଥିବା ବେଳେ ଅନାସିମ ଶବର, କୈଳାସ ଶବର, ରାଇନା ଶବର, ବୃନ୍ଦାବନ ବିଡିକା, ମଜେଶ ଶବର ପ୍ରମୁଖ ସହଯୋଗ କରିଥିଲେ । ତେବେ ସରକାର, ଆଦିବାସୀ ସଂଘର୍ଷ ମୋର୍ଚ୍ଚା ର ଏହି ଦାବି ଗୁଡ଼ିକୁ କେତେ ଗୁରୁତ୍ୱ ଦେଉଛନ୍ତି ଦେଖିବାକୁ ବାକି ରହିଲା ।