ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ନୂଆଦିଲ୍ଲୀ, (୦୯/୦୮) : ଅମୃତକାଳରେ ନୂଆ ଭାରତର ଆହ୍ବାନ । ୧୯୪୨ରେ ମହାତ୍ମା ଗାନ୍ଧିଙ୍କ ଡାକରାରେ ଭାରତ ଛାଡ଼ ଆନ୍ଦୋଳନ ଆରମ୍ଭ ହୋଇଥିବା ବେଳେ ଏହାର ସ୍ମରଣିକା ସ୍ବରୂପ ବିଜେପି ଆଜିଠୁ ସାରା ଦେଶରେ ଆରମ୍ଭ କରୁଛି ଭ୍ରଷ୍ଟାଚାର ଭାରତ ଛାଡ଼ ଅଭିଯାନ ।
ମହାନ ସ୍ବାଧିନତା ସଂଗ୍ରାମୀଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହ ଭ୍ରଷ୍ଟାଚାର ଭାରତ ଛାଡ଼, ପରିବାରବାଦ ଭାରତ ଛାଡ଼, ତୁଷ୍ଟିକରଣ ଭାରତ ଛାଡ଼ ଆହ୍ବାନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସେତେବେଳେ ସିନା ଇଂରେଜ ଭାରତ ଛାଡ଼ର ନାରା ଦିଆଯାଇଥିଲା, ହେଲେ ଏବେ ଭ୍ରଷ୍ଟାଚାର ଭାରତ ଛାଡ଼, ପରିବାରବାଦ ଭାରତ ଛାଡ଼, ତୁଷ୍ଟିକରଣ ଭାରତ ଛାଡ଼, ପ୍ରତ୍ୟେକଟି ସାମାଜିକ ବାଧା ଭାରତ ଛାଡ଼ିବା ପାଇଁ ଆହ୍ବାନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ବଂଶବାଦ ଏବଂ ତୁଷ୍ଟିକରଣ ମନୋବୃତ୍ତି ଆଧାରିତ ରାଜନୀତି ବିରୋଧରେ ଭାରତ ଛାଡ ଆନ୍ଦୋଳନ କରିବା ଓ ଏଭଳି ରାଜନୀତି କରୁଥିବା ଅପଶକ୍ତି ମାନଙ୍କ ଠାରୁ ଭାରତକୁ ସୁରକ୍ଷିତ ରଖିବା ପାଇଁ ଆଜିର ଦିନରେ ସଂକଳ୍ପ ନେବାକୁ ଭିଡିଓ ବାର୍ତ୍ତା ମାଧ୍ୟରେ ଅନୁରୋଧ କରିଛନ୍ତି ।
ଗତକାଲି ବିଜେପି ସଂସଦୀୟ ଦଳ ବୈଠକରେ ଭ୍ରଷ୍ଟାଚାର, ପରିବାରବାଦ, ତୁଷ୍ଟିକରଣର ରାଜନୀତି କରୁଥିବା ତଥାକଥିତ ବିରୋଧୀ ମେଣ୍ଟ ଇଣ୍ଡିଆ ବିରୋଧରେ କ୍ବିଟ୍ ଇଣ୍ଡିଆ ମୁଭମେଣ୍ଟ ବା ଭାରତ ଛାଡ଼ ଅଭିଯାନ ଚଳାଇବା ପାଇଁ ମୋଦି ଗୁରୁମନ୍ତ୍ର ଦେଇଥିଲେ । ଭାରତ ଛାଡ଼ ଆନ୍ଦୋଳନର ୮୧ ବର୍ଷ ପୂରଣ ଅବସରରେ ବିଜେପିର ସମସ୍ତ ସାଂସଦ ଆଜି ସଂସଦର ଗାନ୍ଧି ପ୍ରତିମା ନିକଟରେ ଏକତ୍ରିତ ହେବେ । ସେହିଠାରୁ ହିଁ ଭାରତ ଛାଡ଼ ଅଭିଯାନର ଶୁଭାରମ୍ଭ ହେବ ।