ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ମୁମ୍ବାଇ, (୨୪/୦୪) : ଅଫିସ୍ ର ଆକାର ଘର ଶୌଚାଳୟ ଠାରୁ ବି ଛୋଟ କିନ୍ତୁ କାରବାର ୧,୭୬୪ କୋଟି ର । ଏହା ଆଶ୍ଚର୍ଯ୍ୟ ଲାଗୁଥିଲେ ବି ମହାରାଷ୍ଟ୍ରରେ ଏଭଳି ଏକ ଅଫିସ୍କୁ ଠାବ କରିଛି ଜିଏସ୍ଟି ଡିପାର୍ଟମେଣ୍ଟ ।
ଶୌଚାଳୟ ଠାରୁ ଛୋଟ ମାତ୍ର ୩୫ ବର୍ଗ ଫୁଟ୍ର ଏହି କାର୍ଯ୍ୟାଳୟ ରେ ଚଢ଼ାଉ କରି ଅଧିକାରୀ ମାନେ ପ୍ରାୟ ୧୦ କୋଟି ନଗତ ଟଙ୍କା ଜବତ କରିଛନ୍ତି । ସୂଚନା ଅନୁସାରେ, ଜିଏସ୍ଟି ଡିପାର୍ଟମେଣ୍ଟ ଗତ ୧୬ ତାରିଖରେ ଚାମୁଣ୍ଡା ବୁଲିୟନ ନାମ୍ନୀ ଜଣେ ବ୍ୟକ୍ତିଙ୍କ ସାଉଥ୍ ମୁମ୍ବାଇ ର ଜାଭେରି ବଜାର ଓ ଅନ୍ୟ ସ୍ଥାନରେ ଥିବା ଘର ଏବଂ ଅଫିସ୍ରେ ଚଢ଼ାଉ କରିଥିଲେ ।
ରାଜ୍ୟ ଜିଏସ୍ଟି ଡିପାର୍ଟମେଣ୍ଟ ସହ କରିଥିବା ପଞ୍ଜୀକରଣରେ ସେ ଅନେକ କାର୍ଯ୍ୟାଳୟ ଓ ବ୍ୟବସାୟକୁ ଦର୍ଶାଇ ନ ଥିଲେ । ଗତ ୨୦ ତାରିଖରେ ଜିଏସ୍ଟି ଡିପାର୍ଟମେଣ୍ଟ ଅଧିକାରୀ ଶୌଚାଳୟଠାରୁ ଛୋଟ ଆକାରର ଉକ୍ତ ଅଫିସ୍ରେ ଚଢ଼ାଉବେଳେ ୯.୭୮ କୋଟି ନଗଦ ଟଙ୍କା, ପ୍ରାୟ ୧୩ ଲକ୍ଷ ଟଙ୍କା ମୂଲ୍ୟ ର ୧୯ କେ.ଜି. ରୂପା ଇଟା ଏବଂ ଅଫିସ୍ କାନ୍ଥରୁ ଅନେକ ମୂଲ୍ୟବାନ୍ ସମ୍ପତ୍ତି ଜବତ କରିଛନ୍ତି ।
୨୦୧୯-୨୦ରେ କମ୍ପାନୀ ର ମୋଟ କାରବାର ୨୨.୮୩ ଲକ୍ଷ ଥିବାବେଳେ, ୨୦୨୦-୨୧ ରେ ୬୫୨ କୋଟି ଏବଂ ୨୦୨୧-୨୨ ରେ ୧,୭୬୪ କୋଟି ଟଙ୍କା ଥିବା ଜିଏସ୍ଟି ଟିମ୍ ଜାଣିବାକୁ ପାଇଛନ୍ତି । ଜବତ ଟଙ୍କା କୁ ୬ ଘଣ୍ଟା ଧରି ଗଣାଯାଇଥିଲା ।