ରିପୋର୍ଟ : ଗୋପୀନାଥ ଗୌଡ଼ //
ରାୟଗଡ଼ା, (୨୨/୦୮) : ବୀରନାରାୟଣପୁର ଉଚ୍ଚ ପ୍ରାଥମିକ ବିଦ୍ୟାଳୟ ତରଫରୁ ବନ କୁସୁମ ନାମକ ସ୍ମରଣିକା ଶୁକ୍ରବାର ରାୟଗଡ଼ା ଅତିରିକ୍ତ ଜିଲ୍ଲାପାଳ ଶ୍ରୀ ଧର୍ମାନନ୍ଦ ବେହେରାଙ୍କ କରକମଳରେ ପାଠକା ଅର୍ପଣ ହୋଇଯାଇଛି ।
ଏଥିରେ ଶିକ୍ଷାବିତ୍ ଡ: ଦୁଷ୍ମନ୍ତ କୁମାର ମହାନ୍ତି, ଜିଲ୍ଲା ଶିକ୍ଷାଧିକାରୀ ଶ୍ରୀ ପୂର୍ଣ୍ଣଚନ୍ଦ୍ର ବରିହା, ବରିଷ୍ଠ ସାମ୍ବାଦିକ ଶ୍ରୀ ବାଦଲ କୁମାର ତା, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଶ୍ରୀ ଭଜନଲାଲ ମାଝୀ, ଅବସରପ୍ରାପ୍ତ ପ୍ରଧାନ ଶିକ୍ଷକ ଜୟଦେବ ସୀଠ ଓ ଶିକ୍ଷକ ନିଳାଞ୍ଚଳ ମିଶ୍ର ତଥା ବୀରନାରାୟଣପୁର ଉଚ୍ଚ ପ୍ରାଥମିକ ବିଦ୍ୟାଳୟ ଅଧ୍ୟକ୍ଷ ଶ୍ରୀ ଶିବାରାଓ କଣ୍ଡାଗରି ପ୍ରମୁଖ ଅତିଥି ରୁପେ ଯୋଗଦେଇ ଏହି ଶିଶୁ ପତ୍ରିକା ର ସାର୍ଥକତା ଓ ବିଦ୍ୟାଳୟ ର ଶିକ୍ଷଣ ପରିବେଶ ର ଭୂୟସୀ ପ୍ରଶଂସା କରିଥିଲେ । ବନ କୁସୁମ ଏକ ଶିଶୁ ସାହିତ୍ୟ ପତ୍ରିକା ବିଦ୍ୟାଳୟ ତରଫରୁ ସ୍ମରଣିକା ରୂପରେ ପ୍ରଥମ ଅର୍ଘ୍ୟ ରୂପେ ପ୍ରକାଶିତ ହୋଇଛି । ଏଥିରେ ଆଦିବାସୀ ଅଧ୍ୟୁଷିତ ସରକାରୀ ବିଦ୍ୟାଳୟ ର କୁନି କୁନି ଛାତ୍ର, ଛାତ୍ରୀ ଓ ଶିକ୍ଷକଙ୍କ ଦ୍ୱାରା ଲିଖିତ କବିତା, ଗଳ୍ପ, ହସକଥା ଓ ବିଦ୍ୟାଳୟ ର ସଫଳତା ସମ୍ପର୍କିତ ଘଟଣାବଳୀ ର ଫଟୋ ସ୍ଥାନ ପାଇଛି ।
ଶିକ୍ଷକ ଦ୍ଵିତୀ ଚନ୍ଦ୍ର ସାହୁ, ଜୟଦେବ ସୀଠ ଓ ନିଳାଞ୍ଚଳ ମିଶ୍ରଙ୍କ ପ୍ରେରଣାରେ ଅଷ୍ଟମ ଶ୍ରେଣୀ ଛାତ୍ର ଆର୍ଯ୍ୟ ଶିବ ମାଣ୍ଡଙ୍ଗୀ ସମ୍ପାଦକ ଓ ପ୍ରଧାନ ଶିକ୍ଷକ ଜଗଦୀଶ ଚନ୍ଦ୍ର ଦୋରାଙ୍କ ମୁଖ୍ୟ ସମ୍ପାଦନାରେ ପତ୍ରିକାଟି ପ୍ରସ୍ତୁତ ହୋଇଛି । ଗଣଶିକ୍ଷା ମନ୍ତ୍ରୀ ଶ୍ରୀ ସମୀର ରଞ୍ଜନ ଦାଶ, ମନ୍ତ୍ରୀ ଶ୍ରୀ ଜଗନ୍ନାଥ ସାରକା, ପୂର୍ବତନ ସାଂସଦ ଶ୍ରୀ ଏନ ଭାସ୍କର ରାଓ, ବିଧାୟକ ମକରନ୍ଦ ମୁଦୁଲି, ଏକ ଆଶା ଟ୍ରଷ୍ଟ ର ସମ୍ପାଦକ ସମ୍ବିତ କୁମାର ଦାସ, ଜିଲ୍ଲା ଶିକ୍ଷାଧିକାରୀ ଶ୍ରୀ ପୂର୍ଣ୍ଣଚନ୍ଦ୍ର ବରିହା ରାୟଗଡ଼ା ବି ଡି ଓ ଶ୍ରୀ ଲକ୍ଷ୍ମନାରାୟଣ ସାବତ ଏଵଂ ସର୍ବୋପରି ରାୟଗଡ଼ା ଜିଲ୍ଲାପାଳ ଶ୍ରୀମତୀ ସ୍ୱଧା ଦେବ ସିଂ ପତ୍ରିକାଟି ର ପ୍ରଶଂସା କରିବା ସହିତ ସଫଳତା କାମନା କରିଛନ୍ତି ।
ଶ୍ରୀ ଜଗଦୀଶ ଚନ୍ଦ୍ର ଦୋରା ପ୍ରଧାନ ଶିକ୍ଷକ ଏତାଦୃଶ ପଦକ୍ଷେପ ଦ୍ୱାରା ଜିଲ୍ଲା ଶିକ୍ଷକ ସଂଘ ସମେତ ସର୍ବ ସାଧାରଣ ସାହିତ୍ୟ ପ୍ରେମୀ ଓ ପାଠକଙ୍କ ମହଲରେ ଅନେକ ଶୁଭେଚ୍ଛା ଓ ପ୍ରଶଂସା ସାଉଁଟିଛନ୍ତି । ଏହି ବିଦ୍ୟାଳୟ ଜିଲ୍ଲା ତଥା ରାଜ୍ୟରେ ଏକ ଆଦର୍ଶ ସରକାରୀ ବିଦ୍ୟାଳୟ ର ମାନ୍ୟତା ଲାଭ କରିଥିବା ସହ ଉତ୍ତମ ଶିକ୍ଷଣୀୟ ପରିବେଶ ସୃଷ୍ଟି କରିପାରିଛି ବୋଲି ଅତିରିକ୍ତ ଜିଲ୍ଲାପାଳ ଶ୍ରୀ ଧର୍ମାନନ୍ଦ ବେହେରା ପ୍ରକାଶ କରିଛନ୍ତି ।