ରିପୋର୍ଟ : ଅକ୍ଷୟ କୁମାର ପିଡ଼ିସିକା
କଲ୍ୟାଣସିଂହପୁର, (୨୯/୧୨) : ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସୁନାଖଣ୍ଡି ସଦରପଞ୍ଚାୟତରେ ଟ୍ରାକ୍ଟର ଧକ୍କା ଦେବାରୁ ବାଇକ ଚାଳକ ମହେନ୍ଦ୍ର ଲୁହା (୨୩) ଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିବା ସୂଚନା ମିଳିଛି ।
ପୁଲିସ ସୂଚନା ଅନୁଯାୟୀ ଆଜି ସୁନାଖଣ୍ଡି ପଞ୍ଚାୟତର ପ୍ରଧାନୀଗୁଡା ଗାଁ’ର କିଛି ଯୁବକ ମିଶି ନିକଟସ୍ଥ ଝରଣାରେ ଭୋଜି କରି ଫେରୁଥିବା ବେଳେ ସୁନାଖଣ୍ଡି ଗାଁ ନିକଟସ୍ଥ ଆମ୍ବତୋଟା ନିକଟରେ ଟ୍ରାକ୍ଟର ଧକ୍କା ଦେବାରୁ ବାଇକ ଚାଳକ ମହେନ୍ଦ୍ର ଲୁହା (୨୩) ର ଘଟଣା ସ୍ଥଳରେ ମୃତ୍ୟୁ ହୋଇଛି । ଉକ୍ତ ଯୁବକଟି ପ୍ରଧାନୀଗୁଡା ଗାଁ’ର କାନୁଶି ଲୁହାଙ୍କ ପୁଅ ବୋଲି ଜଣାପଡିଛି । ଉକ୍ତ ଖବର ପାଇ ଥାନା ଅଧିକାରୀ ମୁକୁନ୍ଦ ଦେବ ନାୟକ ପହଞ୍ଚି ଘଟଣା ସମ୍ପର୍କରେ ଅନୁଧ୍ୟାନ କରିଥିଲେ । ପ୍ରାଥମିକ ତଦନ୍ତ କରିବାରୁ ଟ୍ରାକ୍ଟର ଧକ୍କା ମାରିଥିବା ଜାଣି ପାରି ଟ୍ରାକ୍ଟରକୁ ଖୋଜିଥିଲେ ।
ଦୁର୍ଘଟଣା କରିଥିବା ଟ୍ରାକ୍ଟର ଟି ପଲିଗାଁ ରେ ଛାଡି ଦେଇ ଚାଳକ ଫେରାର ରହିଛି । ପୁଲିସ ଟ୍ରାକ୍ଟର ନମ୍ବର ଓଡ଼ି୧୮ ୭୫୯୪ ଓ ବାଇକ ନମ୍ବର ଓଡ଼ି୧୮ ଏ ୪୮୬୫ ଜବତ କରିବା ସହିତ ଶବ ଜବତ କରିଥିଲେ । ସନ୍ଧ୍ୟା ହୋଇ ଯାଇଥିବାରୁ ଶବ ଆସନ୍ତା କାଲି ବ୍ୟବଚ୍ଛେଦ କରି ପରିବାରକୁ ହସ୍ତାନ୍ତର କରାଯିବ ବୋଲି କହିଛନ୍ତି । ଟ୍ରାକ୍ଟର ଚାଳକ କୁ ତୁରନ୍ତ ଖୋଜି ବାହାର କରାଯିବ ବୋଲି ଥାନା ଅଧିକାରୀ ସୂଚନା ଦେଇଛନ୍ତି । ଟ୍ରାକ୍ଟରରେ ଡାଲା ରେ ଯୁବକର ମାଂସ ଖଣ୍ଡ ଲାଗିଥିବାରୁ ସନ୍ଦେହ କରି ଟ୍ରାକ୍ଟରକୁ ଜବତ କରିଥିବା କହିଛନ୍ତି ।