ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ବଲାଙ୍ଗୀର, (୦୨/୦୪) : ଶ୍ରମିକଙ୍କ ମୁଣ୍ଡ ଉପରେ ଚଢିଗଲା ଟ୍ରାକ୍ଟର । ଶ୍ରମିକଙ୍କୁ ଚାପି ଦେଲା ବାଲି ବୋଝେଇ ଟ୍ରାକ୍ଟର । ଫଳରେ ଉକ୍ତ ଶ୍ରମିକ ଜଣଙ୍କର ମୃତ୍ୟୁ ଘଟିଛି । ମୃତକ ଜଣଙ୍କ ହେଉଛନ୍ତି ବଲାଙ୍ଗୀର ଜିଲ୍ଲା ମୁରିବାହାଲ ଥାନା ଗୁଡିଘାଟ ଗ୍ରାମର ବୈଷ୍ଣବ ବାଗ ।
ପରିବାରଙ୍କୁ କ୍ଷତିପୂରଣ ଦାବିରେ ଗ୍ରାମବାସୀ ଗୁଡିଘାଟ ଛକରେ କଣ୍ଟାବାଞ୍ଜି -ମୁରିବାହାଲ -ଟିକ୍ରାପଡ଼ା ରାସ୍ତାକୁ ଅବରୋଧ କରିଥିଲେ । ସୂଚନା ଅନୁସାରେ ,ବୈଷ୍ଣବ ଗୁଡିଘାଟ ଗାଁ’ର ଶାମସନ ମେହେର ଟ୍ରାକ୍ଟରରେ ଶ୍ରମିକ ଭାବେ କାର୍ଯ୍ୟ କରୁଥିଲେ । ଟିକ୍ରା ପଡା ଲାନ୍ଥ ନଦୀରୁ ବାଲି ବୋଝେଇ କରି ଅନ୍ୟ ସାଥି ଶ୍ରମିକଙ୍କ ସହ ଟ୍ରାକ୍ଟର ରେ ବସି ଫେରୁଥିଲେ ।ଯମୁନା ବାହାଲ ସତୀଘାଟ ରାସ୍ତାରେ ସେ ଭାରସାମ୍ୟ ହରାଇ ଗାଡିରୁ ଖସି ପଡ଼ି ଶ୍ରମିକଙ୍କ ମୁଣ୍ଡରେ ଚକ ଚଢି ଯାଇଥିଲା । ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ଘଟଣା ସ୍ଥଳରେ ପରିବାର ଲୋକେ ପହଞ୍ଚିବା ପରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । କ୍ଷତିପୂରଣ ଦାବି କରି ପରିବାର ଲୋକେ ଓ ଗ୍ରାମବାସୀ ରାସ୍ତାରୋକ କରିଥିଲେ । ମୁରିବାହାଲ ତହସିଲଦାର ପହଞ୍ଚି ରେଡକ୍ରସ ପାଣ୍ଠି ରୁ ୧୦ ହଜାର ଓ ହରିଶ୍ଚନ୍ଦ୍ର ଯୋଜନା ରୁ ୨ ହଜାର ଟଙ୍କା ପ୍ରତିଶ୍ରୁତି ଦେବା ପରେ ରାସ୍ତାରୋକ ପ୍ରତ୍ୟାହୃତ ହୋଇଛି ।