ରିପୋର୍ଟ : ସନ୍ତୋଷ କୁମାର ନାୟକ
ସୁବର୍ଣ୍ଣପୁର, (୦୯/୦୫) : ଶିତଳେଇ ମନ୍ଦିର କଲ୍ୟାଣ ମଣ୍ଡପରେ ଅଶି ଘର ଶବର ଜାତି ପକ୍ଷରୁ କର୍ମଶାଳା ଅନୁଷ୍ଠିତ ।
ଆଦିମ କାଳରୁ ଶବର ଜନଜାତି ରହିଥିବାବେଳ ପ୍ରକୃତିକୁ ପୂଜା କରି ଜୀବନ ଅତିବାହିତ କରିଥାନ୍ତି । ତେବେ ବର୍ତ୍ତମାନ ସମୟରେ ଶବର ଜନଜାତି ଅନେକ କ୍ଷେତ୍ରରେ ଅବହେଳିତ । ପିଣ୍ଡ ଓ ବ୍ରହ୍ମାଣ୍ଡକୁ ଏକତ୍ରିତ କରିବାରେ କେବଳ ଶବର ଜନଜାତି ହିଁ ସକ୍ଷମ ହୋଇଥିଲେ । ଏହି ଜନଜାତି ସର୍ବଦା ଦେଇଥାନ୍ତି କିନ୍ତୁ କାହା ଠାରୁ ନେଇ ନଥାନ୍ତି ଶବର ନିଜେ ନିଜ ଦେବତାଙ୍କୁ ପୂଜା କରିଥାନ୍ତି, କାହାରି ମାଧ୍ୟମରେ ନୁହେଁ । ଜନ୍ମ, ବଂଶ ଓ ରକ୍ତଗତ ସମ୍ପର୍କ କେବଳ ଶବର ମାନଙ୍କ ନିକଟରେ ରହିଛି । ଜନଜାତିର ପୂଜାବିଧି ସମ୍ପର୍କିତ ଜିଲ୍ଲା ସ୍ତରୀୟ କର୍ମଶାଳାରେ ବକ୍ତାମାନେ ଏଭଳି ମତ ପ୍ରକାଶ କରିଛନ୍ତି । ସୋନପୁର ସହରର ଶିତଳେଇ ମନ୍ଦିର କଲ୍ୟାଣ ମଣ୍ଡପରେ ଅଶି ଘର ଶବର (ସହରା) ଜାତିଭାଇଙ୍କ ପକ୍ଷରୁ ଆୟୋଜିତ କର୍ମଶାଳାରେ ଅତିଥି ଭାବେ ଯୋଗ ଦେଇ ସମାଜର ନେତୃମଣ୍ଡଳୀ ମତ ବ୍ୟକ୍ତ କରିଛନ୍ତି ।
କର୍ମଶାଳାରେ ସାମ୍ପ୍ରତିକ ସମାଜରେ ଆମ ଅଞ୍ଚଳର ଶବର (ସହରା) ଜନଜାତିର ସ୍ଥିତି ଶବର ଜନଜାତିର ଦୈନନ୍ଦିନ ପାରମ୍ପରିକ ପୂଜାବିଧ ଓ ପର୍ବପର୍ବାଣୀ, ଶବର ଜନଜାତିର ପୂଜାବିଧିରେ ପୂଜକ ମାନଙ୍କ ଭୁମିକା, ଦୈନନ୍ଦିନ ପୂଜାବିଧିରେ ଯୁବକ ଯୁବତୀଙ୍କ ଭୁମିକା, ଏହି ଜନଜାତି ପ୍ରତି ଥିବା ସରକାରୀ ଓ ବେସରକାରୀ ଅନୁଦାନ ଆଦି ବିଷୟରେ ବ୍ୟାପକ ଆଲୋଚନା ହୋଇଛି । କର୍ମଶାଳାରେ ସୁବର୍ଣ୍ଣପୁର ଜିଲ୍ଲା ସମେତ ପଡୋଶୀ ବଲାଙ୍ଗୀର, ବୌଦ୍ଧ, ବରଗଡ, କନ୍ଧମାଳ ଆଦି ଜିଲ୍ଲା ରୁ ଶତାଧିକ ପ୍ରତିନିଧି ଯୋଗଦେଇ ଆଲୋଚନାରେ ଅଂଶ ଗ୍ରହଣ କରିଥିଲେ l