ରିପୋର୍ଟ : ସୁଭାସିସ ନାୟକ
ନୂଆଦିଲ୍ଲୀ, (୦୭/୦୨) : ସୋଶିଆଲ ମିଡିଆ ରେ ପୋଷ୍ଟ ହେଉଥିବା ଆପତ୍ତିଜନକ ବିଷୟ ବସ୍ତୁ ଉପରେ ଲାଗିବ ରୋକ । ଅପପ୍ରଚାର ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କେନ୍ଦ୍ର ସରକାର କଡା ନିୟମ ଆଣିବା ସପକ୍ଷରେ ରହିଛନ୍ତି । ଏ ନେଇ ସଂସଦରେ ବିରୋଧୀଙ୍କ ସହମତ ଲୋଡାଯାଇଛି, ସହମତି ମିଳିଲେ ଆଇନକୁ କାର୍ଯ୍ୟକାରୀ କରାଯିବ ବୋଲି କହିଛନ୍ତି ରେଳ ତଥା ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ ।
ଶ୍ରୀ ବୈଷ୍ଣବ କହିଛନ୍ତି, ସୋଶିଆଲ ମିଡିଆ କୁ ଅଧିକ ଉତ୍ତରଦାୟୀ କରିବାକୁ ସରକାର କଠୋର ଆଣିବା ସପକ୍ଷରେ ରହିଛନ୍ତି । ଯଦି ସଂସଦରେ ରାଜନୀତିକ ସହମତି ରହିବ, ତା’ହେଲେ ଆଇନ ଆସିବ । ସରକାର କେବେ ହେଲେ ବି ମହିଳାଙ୍କ ସମ୍ମାନରେ ବୁଝାମଣା କରିବେ ନାହିଁ । ନିକଟରେ ମୁସଲିମ ମହିଳାଙ୍କ ନିଲାମ ଡାକିବା ଭଳି କାମ ଚଳାଇଥିବା ‘ବୁଲ୍ଲି ବାଈ’ ଓ ‘ସୁଲ୍ଲି ଡିଲ୍ସ’ ବିରୋଧରେ ସରକାର ଖବର ମିଳିବା ମାତ୍ରେ କଠୋର କାର୍ଯ୍ୟାନୁଷ୍ଠାନ ନେଇଥିବା ସେ ସୂଚନା ଦେଇଛନ୍ତି ।
ବୈଷ୍ଣବ ଆହୁରୀ କହିଛନ୍ତି, ଧର୍ମ ନିର୍ବିଶେଷରେ ସମସ୍ତ ମହିଳାଙ୍କ ଆତ୍ମସମ୍ମାନ ର ସୁରକ୍ଷା ସରକାରଙ୍କ ମୂଳ ଲକ୍ଷ୍ୟ । ଆମେ ଯେତେବେଳେ ବି ସୋଶିଆଲ ମିଡିଆକୁ ରେଗୁଲେଟ କରିବାକୁ ପ୍ରୟାସ କରୁଛୁ ସେତେବେଳେ ବିରୋଧୀ ଆମେ ବାକ୍ ସ୍ୱାଧୀନତା ଉପରେ ହମଲା କରୁଛୁ ବୋଲି କହୁଛନ୍ତି । ହେଲେ ଆଦୌ ଠିକ୍ ନୁହେଁ । ଆମେ ସବୁଥିରେ ସମତୁଲ ନୀତି ଆପଣାଇବାକୁ ଚାହୁଁଛୁ ବୋଲି ସେ କହିଛନ୍ତି ।
କଂଗ୍ରେସ ସାଂସଦ ଆନନ୍ଦ ଶର୍ମା ସୋଶାଲ ମିଡିଆରେ ଆସୁଥିବା ଆପତ୍ତିଜନକ ମେସେଜ ବିରୋଧରେ କ’ଣ ସବୁ ପଦକ୍ଷେପ ନିଆଯାଇଛି ବୋଲି ପ୍ରଶ୍ନ କରିଥିଲେ । ଏହାର ଉତ୍ତରରେ କେନ୍ଦ୍ରମନ୍ତ୍ରୀ ବୈଷ୍ଣବ କହିଛନ୍ତି, ସୋଶିଆଲ ମିଡିଆକୁ ଉତ୍ତରଦାୟୀ କରିବା ପାଇଁ ଅନେକ ପ୍ରକାର ର ପଦକ୍ଷେପ ପୂର୍ବରୁ ନିଆଯାଇଥିଲା । ବର୍ତ୍ତମାନ ସରକାର ସାମ୍ବିଧାନିକ ନୀତିନିୟମ ମଧ୍ୟରେ କାମ କରୁଛନ୍ତି ।
ଯଦି ଗୃହ ର ସଦସ୍ୟମାନେ ଚାହିଁବେ, ତା’ହେଲେ ଆମେ ସୋଶିଆଲ ମିଡିଆ ପାଇଁ ଆହୁରି କଠୋର ଆଇନ ଆଣିବୁ । ଆମକୁ ଉତ୍ତରଦାୟୀ ଗ୍ରହଣ କରୁଥିବା ସୋଶାଲ ମିଡିଆ ତିଆରି କରିବାକୁ ହେବ । ଏଥିପାଇଁ ସମସ୍ତଙ୍କ ସହଯୋଗ ଆବଶ୍ୟକ । ବିଭିନ୍ନ ରାଜ୍ୟ ର ତଦନ୍ତକାରୀ ସଂସ୍ଥା କେନ୍ଦ୍ର ର ସୂଚନା ଆଧାରରେ ପଦକ୍ଷେପ ଗ୍ରହଣ କରୁଛନ୍ତି ।