ରିପୋର୍ଟ : ଦେବଦତ୍ତ ରଥ
କଳାହାଣ୍ଡି, ତା.(୨୮/୦୫) : କଳାହାଣ୍ଡି ଜିଲ୍ଲାରେ ପ୍ରୋଜେକ୍ଟ ଅଞ୍ଚଳରେ ବ୍ୟାପକ ଭାବେ ଅଣ-ଓଡିଆ ମାନେ ଜମିବାଡି କିଣି ଚାଷବାସ କରି ଦୀର୍ଘ ଦିନରୁ ରହିଆସୁଥିବା ବେଳେ ଜମି ମାଫିଆ ମାନେ ସକ୍ରୀୟ ଥିବା ଅଭିଯୋଗ ହେଉଛି ।
ନିକଟ ଅତୀତରେ ଲାଞ୍ଜିଗଡ଼ ଅଞ୍ଚଳରେ ଏହି ଅଣ-ଓଡିଆ ମାନେ ସ୍ଥାନୀୟ ନୀରିହ ଗରିବ ଆଦିବାସୀ ମାନଙ୍କ ଜମି ଜବରଦଖଲ କରିବା ସହିତ ସରକାରୀ ଜମିକୁ ମଧ୍ୟ କବଜା କରି ଥିବା ସମଗ୍ର ଜିଲ୍ଲାରେ ଚର୍ଚ୍ଚା ହେଉଥିଲା । ପଡୋଶୀ ରାଜ୍ୟରେ ଜମି ମୂଲ୍ୟ ଓଡିଶା ର ଜମି ମୂଲ୍ୟ ଠାରୁ ବହୁ ଗୁଣରେ ଅଧିକ ଥିବା ବେଳେ ସେଠାକାର ମୂଲ୍ୟବାନ ଜମିକୁ କୋଟୀ କୋଟୀ ଟଙ୍କା ରେ ବିକ୍ରୀ କରିଦେଇ ଏହି ଅଣ-ଓଡିଆ ମାନେ ଓଡିଶାର ଉପାନ୍ତ ଅଞ୍ଚଳକୁ ଆସି ସେହି ଟଙ୍କାରେ ଶାଗ ମାଛ ଦରରେ ଅନେକ ଜମି ନିଜ ପରିବାର ଲୋକଙ୍କ ନାମରେ କିଣି ଆସ୍ଥାନ ଜମାଉଥିବା ଦେଖା ଯାଉଛି ।
ବିଶେଷ କରି ଇନ୍ଦ୍ରାବତୀ ଆୟାକଟ ଅଞ୍ଚଳରେ ଏହି ଅଣ ଓଡିଆ ମାନେ ସ୍ଥାନୀୟ ଲୋକଙ୍କ ଠାରୁ ଶାଗମାଛ ଦରରେ ଅନେକ ଜମି କିଣି ନିଜ ନିଜ ସଂପର୍କୀୟ ମାନଙ୍କ ନାମରେ ରଖିଥିବା ଆଲୋଚନା ହେଉଛି । ଏପରିକି ଏହି ଅଣ-ଓଡିଆ ମାନଙ୍କ ଦ୍ୱାରା ବିଭିନ୍ନ ଶସ୍ୟ ତଥା ବିହନ, ଔଷଧ, ଖତସାର ଇତ୍ୟାଦି ସରକାରୀ ବ୍ୟବସ୍ଥା ଅଗୋଚରରେ ଅନେକ କାରବାର ହେଉଥିବା ମଧ୍ୟ ଅଭିଯୋଗ ହେଉଛି ।
ଲାଞ୍ଜିଗଡ଼ ବ୍ୟତୀତ ମୋଟେର-ଜୟପାଟଣା ରାସ୍ତା ଉପରେ ବଡକୁଟ୍ରୁଛକରେ, ଲଡୁଗାଁ ରାସ୍ତାରେ ବିମଳା ଗ୍ରାମରେ, ଗୁନଗୁନିଆ ରାସ୍ତାରେ ରେଙ୍ଗାଲପାଲି ଗ୍ରାମରେ, ବୁଢୀଦର ରାସ୍ତାରେ ତେତେଲପଡା ଗ୍ରାମରେ ବିଶେଷ କରି ଏହି ଅଣ-ଓଡିଆ ମାନେ ବହୁମାତ୍ରା ରେ ବସତି ସ୍ଥାପନ କରୁଥିବା ଏବଂ ଚାଷ ବାସ ସହିତ ବିଭିନ୍ନ କାରବାର କରୁଥିବା ଦେଖାଯାଉଛି ।
ବିମଳା ଗ୍ରାମ ର କେନାଲ ହୁଡା ପାଶ୍ୱର୍ରେ ରହୁଥିବା ଜନୈକ ଅଣ ଓଡିଆ ପ୍ରାୟ ୨୭ ଗୋଟି କମ୍ବାଇନ ହାରଭେଷ୍ଟର ବିଭିନ୍ନ ଆଦିବାସୀ ଲୋକଙ୍କ ନାମରେ ସବସିଡି ମାଧ୍ୟମରେ କିଣି ସେସବୁକୁ ଭଡାରେ ଲଗାଉଥିବା ଅଭିଯୋଗ ହୋଇଛି । ଜୁନାଗଡ ଓ ବନମାଳିପୁର ଠାରେ ଜନୈକ ଅଣ-ଓଡିଆ ୟାନମାର କମ୍ପାନୀ ର କମ୍ବାଇନ ହାରଭେଷ୍ଟର ଡିଲରସିପ କରି ଅନେକ ଆଦିବାସୀ ଲୋକଙ୍କ ନାମରେ ସବସିଡି ଉଠାଇ ଥିବା ଅଭିଯୋଗ ହୋଇଛି ।
ନିକଟ ଅତୀତରେ ଧର୍ମଗଡ ଉପଖଣ୍ଡରେ ଶିଳ୍ପ ପ୍ରତିଷ୍ଠା ପାଇଁ ସରକାର ଯୋଗାଇ ଦେଇଥିବା ଜମିକୁ ଅଣ-ଓଡିଆ ଲୋକେ ସଂପୃକ୍ତ କମ୍ପାନୀ ଠାରୁ କୌଣସି ଉପାୟରେ କିଣି ନେଇ ଚାଷ କରୁଥିବା ମଧ୍ୟ ଜଣାପଡିଛି । ସୂଚନା ଯୋଗ୍ୟ ଯେ ସ୍ଥାନୀୟ ଲୋକେ ସରଳ ନୀରିହ ବିଶ୍ୱାସୀ ହୋଇଥିବା ବେଳେ ବିଭିନ୍ନ ପ୍ରାକୃତିକ ବିପର୍ଯ୍ୟୟ କାରଣରୁ ସ୍ୱଳ୍ପ ଆୟ ହେତୁ ଗରିବ ମଧ୍ୟ ହୋଇଥାନ୍ତି ।
ଏଠାକାର ଜମିବାଡି ର ମୂଲ୍ୟ ସେଭଲି ଚଢାଦାମରେ ମଧ୍ୟ ବିକ୍ରୀ ହୋଇପାରି ନଥାଏ । ଯାହା ଫଳରେ ପଡୋଶୀ ରାଜ୍ୟରେ ଏକର ପିଛା ଲକ୍ଷ ଲକ୍ଷ ଟଙ୍କାରେ ଜମି ବିକି ଦେଇ କଳାହାଣ୍ଡିରେ ବହୁ ପରିମାଣରେ ଜମି କିଣୁଥିବା ଜଣାପଡିଛି । ଅନ୍ୟପକ୍ଷରେ କଳାହାଣ୍ଡି ର ନୀରିହ ଲୋକେ ବିଶେଷ କରି ସ୍ୱାସ୍ଥ୍ୟ ସେବା ପାଇଁ ପଡୋଶୀ ରାଜ୍ୟ ଉପରେ ଭରସା କରୁଥିବାରୁ ସେଠାରେ ଏହି ଅଣ-ଓଡିଆ ଦଲାଲ ମାନେ ହୁଏତ ହଇରାଣ ହରକତ କରିପାରନ୍ତି ବୋଲି ଆଶଙ୍କା କରି ନୀରିହ ଲୋକେ ଅଣ-ଓଡିଆ ମାନଙ୍କୁ ପ୍ରତିବାଦ କରୁ ନଥିବା ଜଣାପଡିଛି ।
ଜୟପାଟଣା ବ୍ଲକ ଅଞ୍ଚଳର ଅଫସାନୀ ଲକ୍ଷ୍ମଣ ରାଓ ଓରଫ ଲଛମନ ବାବୁ ନାମକ ଜନୈକ ଅଣ-ଓଡିଆ ଙ୍କ ସଂପର୍କୀୟ ଲାଲବାହାଦୁର ଶାସ୍ତ୍ରୀ ଏକାଡେମୀ ଅଫ ଏଡମିନିଷ୍ଟ୍ରେସନରେ ପଦସ୍ଥ ପଦାଧିକାରୀ ରହିଥିବା ପ୍ରଚାର କରି ବିଭିନ୍ନ ପଦାଧିକାରୀ ମାନଙ୍କୁ ଚାପ ପକାଉଥିବା ଏବଂ ପ୍ରଶାସନିକ ବ୍ୟବସ୍ଥାରେ ଅଣ-ଓଡିଆ ମାନଙ୍କୁ ସୁହାଇବା ଭଲି ଫାଇଦା ନେଉଥିବା ବିଷୟ ମଧ୍ୟ ସାଧାରଣରେ ଆଲୋଚନା ହେଉଛି । ପଦାଧିକାରୀ ମାନଙ୍କୁ ଚାପ ପକାଇ ଅଣ-ଓଡିଆ ମାନଙ୍କ ବିଭିନ୍ନ କାର୍ଯ୍ୟ ପାଇଁ ଏହି ଲଛମନ ବାବୁ ଦଲାଲି କରୁଥିବା ଅଭିଯୋଗ ହେଉଛି ।
ଏହାଯଦି ସତ୍ୟ ହୋଇଥାଏ ତେବେ ଏ ସମ୍ପର୍କରେ ଏକ ଉଚ୍ଚ ସ୍ତରୀୟ ତଦନ୍ତ କରାଯାଇ ସଂପୃକ୍ତ ଦଲାଲଗିରି ବନ୍ଦ କରାଯିବାକୁ ବୁଦ୍ଧିଜୀବି ମହଲରେ ଦାବୀ ହେଉଛି । ସ୍ଥାନୀୟ ସାଧାରଣ ଲୋକେ ବିଭିନ୍ନ ସ୍ତରରେ ଉଚିତ ନ୍ୟାୟ ପାଇପାରୁ ନଥିବା ବେଳେ ପ୍ରଶାସନିକ ଟ୍ରେନିଂ ଏକାଡେମୀରେ ସମ୍ପର୍କୀୟ ଥିବାର ପ୍ରକାଶ କରି ବିଭିନ୍ନ ସ୍ତରରେ ଚାପ ପକାଇ ଫାଇଦା ଉଠାଉଥିବା ଏଭଲି କାରବାର ସଂପର୍କରେ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଦାବୀ ହେଉଛି ।