ରିପୋର୍ଟ : ଅକ୍ଷୟ କୁମାର ପିଡ଼ିସିକା
କଲ୍ୟାଣସିଂହପୁର, (୭/୨) : ରାୟଗଡା ଜିଲ୍ଲା ବ୍ୟସ୍ତବହୁଳ ବ୍ୟବସାୟୀ ନଗରୀ ମୁନିଗୁଡ଼ାରେ ଜବରଦଖଲ ଉଚ୍ଛେଦ ପ୍ରକ୍ରିୟାର ଦ୍ଵିତୀୟ ପର୍ଯ୍ୟାୟ ଆରମ୍ଭ ହୋଇଯାଇଛି ।
ମୁନିଗୁଡାର ପୂର୍ବତନ ତହସିଲଦାର ତଥା ସେସମୟରେ ମାଜିଷ୍ଟ୍ରେଟ ଦାୟିତ୍ୱରେ ଥିବା ଦେବାଶିଷ ଗୌଡ଼ଙ୍କ ନେତୃତ୍ୱ ଏବଂ ମୁନିଗୁଡା ରାଜସ୍ୱ ବିଭାଗ, ମୁନିଗୁଡା ପୋଲିସ, ମୁନିଗୁଡା ଜିଆରପି ଓ ଆରପିଏଫ ବାହିନୀଙ୍କ ମିଳିତ ସହଯୋଗରେ ଏହି ଉଚ୍ଛେଦ ଚାଲିଥିଲା । ମୁନିଗୁଡା ରେଲୱେର ପ୍ରବେଶ ପଥ ଠାରୁ ମୁନିଗୁଡା ଷ୍ଟେଟବ୍ୟାଙ୍କ ପର୍ଯ୍ୟନ୍ତ ଉଚ୍ଛେଦ ଅଭିଯାନ ମଧ୍ୟରେ ଥିବା ସମସ୍ତ କ୍ଷ୍ୟୁଦ୍ର ଓ ମଧ୍ୟମ ଧରଣର ବ୍ୟବସାୟୀ ଏହି ଉଚ୍ଛେଦକୁ ନେଇ ମର୍ମାହତ ଥିବା ଦେଖିବାକୁ ମିଳିଥିଲା । ପୁରୁଷ ପୁରୁଷ ଧରି ଏହି ସ୍ଥାନରେ ବସବାସ କରି ଏଇଠି ଜନ୍ମ ହୋଇ ଏମାନେ ଛୋଟମୋଟ ବ୍ୟବସାୟ କରି ନିଜ ପରିବାରର ପେଟପୋଷି ଗୁଜୁରାଣ ମେଣ୍ଟାଉଥିଲେ । ଆଜିକାର ଜବରଦସ୍ତ ଉଚ୍ଛେଦକୁ ସେମାନେ ସହଜରେ ଗ୍ରହଣ କରି ପାରୁନଥିଲେ ମଧ୍ୟ ପ୍ରଶାସନ ଆଗରେ ନାଚାର ପଡିଯାଇଥିବା ସେମାନଙ୍କ ହତାସାଭାବରୁ ବାରିହୋଇ ପଡୁଥିଲା ।
ମୁନିଗୁଡା ଭବାନୀପାଟଣା ମୁଖ୍ୟ ସଡ଼କର ବାମପଟ ରେଲୱେ ସାଇଡ଼ରେ ଥିବା ୩୪ ଟି ବ୍ୟବସାୟ ପ୍ରତିଷ୍ଠାନ ମଧ୍ୟରୁ ପ୍ରଥମ ପର୍ଯ୍ୟାୟରେ ଗତ ତା୧୬-୧୧-୨୨ରିଖରେ ୧୮ ଟି ଦୋକାନ ଘରକୁ ମାଟିରେ ମିଶାଇ ଦିଆଯାଇଥିବା ବେଳେ ଅବଶିଷ୍ଠ ୧୬ଜଣ ବ୍ୟବସାୟୀ ସେସମୟରେ ଅନ୍ୟ ଉପାୟ ନପାଇ ଅବୁଝା ପ୍ରଶାସନର ଦବଙ୍ଗଗିରି ନ୍ୟାୟନୀତି ବିରୁଦ୍ଧରେ ମାନ୍ୟବର ଅଦାଲତଙ୍କ ଦ୍ୱାରସ୍ଥ ହେବା ସହିତ ୩ ମାସ ପର୍ଯ୍ୟନ୍ତ ରହିତାଦେଶ ଆଣିଥିଲେ । ସେମାନେ ଭାବିଥିଲେ ଏହି ରହିତାଦେଶ ଅବଧି ମଧ୍ୟରେ ପ୍ରଶାସନ ତରଫରୁ ସେମାନଙ୍କୁ ଅନୁକମ୍ପାମୂଳକ ସହାୟତା ସହିତ ନୂଆଭାବେ ବ୍ୟବସାୟ ଆରମ୍ଭ ପାଇଁ ଉପଯୁକ୍ତ ଥଇଥାନ ମିଳିବ । ହେଲେ ପ୍ରଶାସନ ନିଜ ଜିଦରେ ଅଟଳ।ଥଇଥାନ କିମ୍ବା ସହାୟତା ଦେବା ପରିବର୍ତ୍ତେ ଆଜି ପୁଣି ଉଚ୍ଛେଦ ପ୍ରକ୍ରିୟାକୁ ଜୋରଦାର କରିଛି ।
ରେଲୱେର ତୃତୀୟ ରେଳ ଧାରଣା ପାଇଁ ସମ୍ପ୍ରସାରଣ ଜନିତ କାର୍ଯ୍ୟ ତଥା ଷ୍ଟାପକ୍ବାଟର, କାର୍ଯ୍ୟାଳୟ ଏବଂ ଅନ୍ୟାନ୍ୟ ନିର୍ମାଣ ପାଇଁ ଉଚ୍ଛେଦ ଜରୁରୀ ହୋଇ ପଡ଼ିଥିଲା ବୋଲି ପ୍ରଶାସନ ପ୍ରତିକ୍ରିୟାରେ ସଫେଇ ଦେଉଛି । ଅନ୍ୟପଟେ ନିଜ ନିଜର ଦୀର୍ଘ ଦିନର ବ୍ୟବସାୟ ହରାଇ ବିଚାରା ଛୋଟଛୋଟ ବେପାରୀ ମାନେ ବିକଳରେ ତାଙ୍କ ଭଙ୍ଗା ଘରୁ ଜୀବନ ଆଉ ଜୀବିକାର ଭଗ୍ନାଶେଷକୁ ସାଉଁଟୁ ସାଉଁଟୁ ଆଗାମୀ ଭବିଷ୍ୟତକୁ ନେଇ ଦିଗହରା ହୋଇଯାଉଥିବା ଦେଖିବାକୁ ମିଳୁଥିଲା । ଅନ୍ତତଃପକ୍ଷେ ଏହି ବେପାରିମାନଙ୍କୁ ପ୍ରଶାସନ ତରଫରୁ ଥଇଥାନ ହୋଇଥିଲେ ମଙ୍ଗଳ ହୋଇଥାନ୍ତା ବୋଲି ସାଧାରଣରେ ମତ ପ୍ରକାଶ କରିଛନ୍ତି ।