ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୧୮/୨) : ରାୟଗଡ଼ା ଜିଲ୍ଲା ଗୁଣପୁର ବ୍ଲକ ଅନ୍ତର୍ଗତ ଜଲତାର କସ୍ତୁରବା ଗାନ୍ଧୀ ଉଚ୍ଚ ପ୍ରାଥମିକ ବାଳିକା ବିଦ୍ୟାଳୟର ବାର୍ଷିକ ଉତ୍ସବ ମହା ସମାରୋହରେ ପାଳିତ ହୋଇଯାଇଛି ।
ଆଜି ଛାତ୍ର ଛାତ୍ରୀ ମାନଙ୍କ ପାଇଁ ଦିନଟିଏ । ବର୍ଷସାରା ଶ୍ରେଣୀ ଗୃହରେ ଅଧ୍ୟୟନ କରୁଥିବା ଛାତ୍ରଛାତ୍ରୀଙ୍କୁ ଉତ୍ସାହିତ କରିବା, ବର୍ଷସାରା ଅନୁଷ୍ଠିତ ହୋଇଥିବା ପ୍ରତିଯୋଗିତାର ପୁରସ୍କାର ବିତରଣ ସହ ମନଭରି ନାଚିଗାଇ ନିଜକୁ ହଜାଇ ଦେବାକୁ ପାଳନ କରାଯାଏ ବାର୍ଷିକ ଉତ୍ସବ । ସବୁଜ ବନାନୀ ଓ ପାହାଡ ପାଦଦେଶରେ ଅବସ୍ଥିତ ଜଲତାର କସ୍ତୁରବା ଗାନ୍ଧୀ ଉଚ୍ଚ ପ୍ରାଥମିକ ବାଳିକା ବିଦ୍ୟାଳୟ । କରୋନା କଟକଣା ହଟିବା ପରେ ମହା ସମାରୋହରେ ପାଳିତ ହୋଇଛି ବାର୍ଷିକ ଉତ୍ସବ । ଏହି ଉତ୍ସବରେ ମୁଖ୍ୟ ଅତିଥି ଭାବେ ଶ୍ରୀ ସୁଜନ ମଲ୍ଲିକ (ବି ଇ ଓ ଗୁଣପୁର) , ମୁଖ୍ୟ ବକ୍ତା ଭାବେ ଶ୍ରୀ ଜଗନ୍ନାଥ ପଟ୍ଟନାୟକ (ଅବସରପ୍ରାପ୍ତ ବି ଆର ସି ସି , ଗୁଣପୁର) , ସଭାପତି ଭାବେ ସ୍କୁଲର ପ୍ରଧାନ ଶିକ୍ଷୟତ୍ରୀ ଶ୍ରୀମତୀ ଶୋଭାରାଣୀ ପଟେଲ, ସମ୍ମାନୀତ ଅତିଥି ଭାବେ ଲକ୍ଷ୍ମୀ ବେହେରା (ଏ ଵି ଇ ଓ) , ନୀଳାମ୍ବର ଜାନି (ଆଇ ଆଇ ସି ଗୁଣପୁର) , ସବିତା ଶବର (ଏ ବି ଇ ଓ ), ମାର୍କ ଦଳଵେହେରା (ସରପଞ୍ଚ ଜନତାର) ପ୍ରମୁଖ ମଞ୍ଚାସୀନ ଥିଲେ । ପ୍ରଭୁ ଜଗନ୍ନାଥଙ୍କ ପ୍ରତିମୂର୍ତ୍ତୀରେ ପ୍ରଦିପ ପ୍ରଜ୍ଜ୍ୱଳନ ସହ ମାଲ୍ୟାର୍ପଣ କରି ବାର୍ଷିକ ଉତ୍ସବରେ ଶୁଭାରମ୍ଭ ହୋଇଥିଲା ।
ସ୍କୁଲର ଛାତ୍ରୀ ମାନଙ୍କ ଦ୍ଵାରା ସ୍ୱାଗତ ସଙ୍ଗୀତ ପରିବେଷଣ କରାଯାଇଥିଲା । ପ୍ରଧାନ ଶିକ୍ଷୟତ୍ରୀ ଶ୍ରୀମତୀ ଶୋଭାରାଣୀ ପଟେଲ ପୈାରହିତ୍ୟ କରି ସ୍କୁଲର ବାର୍ଷିକ ବିବରଣୀ ପାଠ କରିଥିଲେ । ମଞ୍ଚାସିନ ଅତିଥି ମାନେ ମଣିଷ ଜୀବନରେ ଶିକ୍ଷାର ଗୁରୁତ୍ୱ ସମ୍ପର୍କରେ ଛାତ୍ରୀ ମାନଙ୍କୁ ବୁଝାଇଥିଲେ । ପ୍ରଧାନ ଶିକ୍ଷୟତ୍ରୀ ଶ୍ରୀମତୀ ଶୋଭାରାଣୀ ପଟେଲ ଶିକ୍ଷା ଦିଗରେ ସରକାରଙ୍କ ବିଭିନ୍ନ ଯୋଜନା ସମ୍ବନ୍ଧରେ ଅବଗତ କରାଇବା ସହ ବର୍ତ୍ତମାନର ଆଶ୍ରମ ବିଦ୍ୟାଳୟ ଗୁରୁକୂଳ ଆଶ୍ରମର ବିକଳ୍ପ ବୋଲି କହିଥିଲେ । ସମସ୍ତ ଅତିଥି ମାନଙ୍କୁ ଉପଢୌକନ ଦେଇ ସମ୍ବର୍ଦ୍ଧିତ କରାଯାଇଥିଲା । ଏହି ଅବସରରେ ବିଭିନ୍ନ କ୍ରୀଡାରେ ପାରଦର୍ଶିତା ଲାଭ କରିଥିବା ଛାତ୍ରୀ ମାନଙ୍କୁ ଅତିଥିଙ୍କ ଦ୍ଵାରା ପ୍ରମାଣପତ୍ର ସହ ଟ୍ରଫି ପ୍ରଦାନ କରାଯାଇଥିଲା । ଏହି ବାର୍ଷିକ ଉତ୍ସବ କାର୍ଯ୍ୟକ୍ରମକୁ ସ୍କୁଲର ସମସ୍ତ ଶିକ୍ଷକ ଶିକ୍ଷୟିତ୍ରୀ ପରିଚାଳନା କରିବା ସହ ପୂର୍ଣ୍ଣ ସହଯୋଗ କରିଥିଲେ । ଶେଷରେ ଛାତ୍ରୀ ମାନଙ୍କ ଦ୍ଵାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।