ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ଭୁବନେଶ୍ୱର, (୨୦/୦୩) : ମେଂଟକୁ ନେଇ ପାଣ୍ଡିଆନଙ୍କ ବଡ଼ ବିସ୍ଫୋରକ ବୟାନ । କହିଲେ କେନ୍ଦ୍ରରେ ମୋଦି ଓ ରାଜ୍ୟରେ ନବୀନ ହିଁ ବିଜୟୀ ହେବେ ।
ଏମିତି ସ୍ଥିତିରେ ଉଭୟ ଦଳକୁ ମେଂଟର ଆବଶ୍ୟକତା ନାହିଁ । ଆଗାମୀ ଦିନରେ ଉଭୟ ଦଳ କଣ ନିଷ୍ପତ୍ତି ନେବେ ଖୁବଶୀଘ୍ର ଜଣାପଡ଼ିବ ବୋଲି କହିଲେ ପାଣ୍ଡିଆନ । ହେଲେ ମେଂଟ ଚର୍ଚ୍ଚା ଭିତରେ ପାଣ୍ଡିଆନ ଯେମିତି ବିସ୍ଫୋରକ ବୟାନ ଦେଲେ ତାହାକୁ ନେଇ ଏବେ ଚର୍ଚ୍ଚା ଜୋର । ପାଣ୍ଡିଆନଙ୍କ ମନ୍ତବ୍ୟ ବଢାଇଲା ଚର୍ଚ୍ଚା । ରାଜ୍ୟରେ ୧୫ ଦିନ ହେଲାଣି ବିଜେପି-ବିଜେଡି ଭିତରେ ମେଂଟକୁ ନେଇ ବଡ଼ ଚର୍ଚ୍ଚା ଚାଲିଛି । କାରଣ ବାରମ୍ବାର ଦିଲ୍ଲୀ ଗସ୍ତରେ ଯାଉଛନ୍ତି ରାଜ୍ୟ ସଭାପତିଙ୍କ ସହ ଅନେକ ନେତା । ଖାଲି ବିଜେପି ନେତା ନୁହେଁ ବରଂ ମଝିରେ ମଝିରେ ଦିଲ୍ଲୀ ଗସ୍ତରେ ଯାଉଛନ୍ତି ବିଜେଡି ନେତା । ଏମିତିକି କେନ୍ଦ୍ରୀୟ ବିଜେପି ନେତୃତ୍ଵଙ୍କ ସହ ପାଣ୍ଡିଆନ ଓ ବବି ଆଲୋଚନା କରିଥିବା ନେଇ ଚର୍ଚ୍ଚା ହୋଇଛି । ହେଲେ ଆଜି ଯେମିତି ରୋକଠୋକ ପାଣ୍ଡିଆନ କହିଲେ ମେଂଟ ହେବନାହିଁ ତାହାକୁ ନେଇ ଚର୍ଚ୍ଚା ଜୋର ଧରିଛି ।
ନିର୍ବାଚନ ଯେତିକି ଯେତିକି ପାଖେଇ ଆସୁଛି, ମେଂଟ ଚର୍ଚ୍ଚା ସେତିକି ସେତିକି ବଢୁଛି । କେବେ ଘୋଷଣା ହେବ ମେଂଟ ସେନେଇ ନେତା ଓ କର୍ମୀ ଦ୍ଵନ୍ଦ୍ଵରେ ଥିବା ବେଳେ ପାଣ୍ଡିଆନଙ୍କ ମନ୍ତବ୍ୟକୁ ନେଇ ଏବେ ଚର୍ଚ୍ଚା ବଢିଛି । କୁହାଯାଉଛି କି, ବିଜେଡି ସୁପ୍ରିମୋଙ୍କ ସହ ସେ ଆଲୋଚନା କରିବା ପରେ ଘରୋଇ ସଂସ୍ଥାର କାର୍ଯ୍ୟକ୍ରମରେ କିଛି ଏମିତି କହିଛନ୍ତି ଫାଇଭ-ଟି ଚେୟାମ୍ୟାନ ।
ଏପଟେ, ରାଜ୍ୟରେ ଏକାକୀ ଲଢିବ ବିଜେପି । କିଛି ଏମିତି ଚର୍ଚ୍ଚା ଏବେ ଦିଲ୍ଲୀରୁ ପଲ୍ଲୀ ପର୍ଯ୍ୟନ୍ତ ହେଉଛି । କାରଣ ଗତକାଲି ରାଜ୍ୟ ସଭାପତି ମନମୋହନ ସାମଲ ସମ୍ଭାବ୍ୟ ପ୍ରାର୍ଥୀ ତାଲିକା ନେଇ କେନ୍ଦ୍ର ନେତୃତ୍ଵଙ୍କୁ ଦେଇଛନ୍ତି । ଏ ସବୁ ଦେଖିବା ପରେ ଗୋଟିଏ କଥା ସ୍ପଷ୍ଟ ଜଣାପଡୁଛି କି ଦିଲ୍ଲୀରେ ଓଡ଼ିଶାକୁ ନେଇ ଚାଲିଛି ଗୁରୁତ୍ଵପୂର୍ଣ୍ଣ ବୈଠକ । ଅବଶ୍ୟ ମେଣ୍ଟ ନେଇ ଦ୍ୱନ୍ଦ୍ୱ ଦୂର ହୋଇନି, ହେଲେ ଦଳର ନିର୍ବାଚନୀ କାର୍ଯ୍ୟକ୍ରମ ଦେଖିଲେ ଲାଗୁଛି ଏକାକୀ ଲଢିବା ପାଇଁ ଫୁଲ କନ୍ଫିଡେଣ୍ଟରେ ରାଜ୍ୟ ବିଜେପି ଟିମ୍ ଅଛି ।