ରିପୋର୍ଟ : ପ୍ରଶାନ୍ତ ମାଝୀ //
ଝାରସୁଗୁଡା,(୨୪/୦୮) : ଝାରସୁଗୁଡ଼ା ରେ ଘରୋଇ ନର୍ସିଂହୋମରେ ଚିକିତ୍ସା ପାଇଁ ଭର୍ତି ହୋଇଥିବା ଜଣେ ରୋଗୀଙ୍କୁ ଭିନ୍ନ ଗ୍ରୁପର ରକ୍ତ ଦିଆଯିବାରୁ ତାଙ୍କର ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି । ଏନେଇ ସେମାନେ ଝାରସୁଗୁଡା ସଦର ଥାନାରେ ଲିଖିତ ଅଭିଯୋଗ କରଛନ୍ତି ।
ତେବେ ମୃତକଙ୍କ ଭାଇ ତୁଳାରାମ ନାଏକଙ୍କ ଅଭିଯୋଗ ମୁତାବକ ଝାରସୁଗୁଡ଼ା ସହରାଂଚଳ ଦେବାଡିହି ଗ୍ରାମର ରୋହିତ ପାଣ୍ଡେଙ୍କ ପତ୍ନୀ ରମଣୀ ପାଣ୍ଡେ(୬୨)ଙ୍କୁ ରକ୍ତହୀନତା ଜନିତ ଦୁର୍ବଳତା କାରଣାରୁ ଗତ ୨୦ ତାରିଖ ଦିନ ଝାରସୁଗୁଡ଼ା ରେ ଘରୋଇ ନର୍ସିଂହୋମରେ ଭର୍ତି କରାଯାଇଥିଲା ।
ଗତ ୧୮ ତାରିଖ ଦିନ ରୋଗୀଙ୍କ ରକ୍ତ ଗ୍ରୁପ ଚିହ୍ନଟ ହୋଇଥିବା ରିପୋର୍ଟ ଡାକ୍ତରଖାନା କର୍ତୃପକ୍ଷଙ୍କୁ ପରିବାର ଲୋକେ ପ୍ରଦାନ କରିଥିଲେ । ସେଥିରେ ତାଙ୍କର ରକ୍ତ ଗ୍ରୁପ ବି’ ନେଗେଟିଭ ଉଲ୍ଲେଖ ରହିଥିଲା । ମାତ୍ର ଉକ୍ତ ରିପୋର୍ଟକୁ ଅଣଦେଖା କରି ପୁଣି ଏକ ରକ୍ତ ଗ୍ରୁପ ରିପୋର୍ଟ ପ୍ରସ୍ତୁତ ପୂର୍ବକ ଓ’ ନେଗେଟିଭ ବୋଲି ଦର୍ଶାଇଥିଲେ ନର୍ସିଂହୋମ କର୍ତୃପକ୍ଷ । ରୋଗୀଙ୍କୁ ବି\’ ନେଗେଟିଭ ପରିବର୍ତେ ଓ’ ନେଗେଟିଭ ରକ୍ତ ଦିଆଯିବାରୁ ସେ ଅକାଳରେ ପ୍ରାଣ ହରାଇଥିବା ଏତଲାରେ ଉଲ୍ଲେଖ କରାଯାଇଛି । ଡାକ୍ତରଖାନା କର୍ତୃପକ୍ଷ ଏଭଳି ଅବହେଳା କାରଣରୁ ରୋଗୀଙ୍କ ମୃତ୍ୟୁ ହୋଇଥିବା ଦର୍ଶାଇ ଦୃଢ କାର୍ଯ୍ୟାନୁଷ୍ଠାନ ଦାବି କରିଛନ୍ତି ରୋଗୀଙ୍କ ପରିବାର ଲୋକେ ।
ଏନେଇ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ପଚାରିବାରୁ ସିଡଏମଓ ଝାରସୁଗୁଡାଙ୍କ ଅଧ୍ୟକ୍ଷତାରେ ଏକ ଯାଂଚ କମିଟି ଗଠନ କରାଯିବ ।ତେବେ ରୋଗୀଙ୍କ ମୃତ କୁ ନେଇ ପରିବାର ଲୋକେ ନ୍ୟାୟ ପାଇଁ ଗୁହାରି ଲଗାଉଥିବା ବେଳେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।