ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୧୨/୬) : ଆବାସ ଯୋଜନାରୁ ବଞ୍ଚିତ ଗୋବର୍ଦ୍ଧନ । ମଣିଷ ଜୀବନରେ ଅନେକ ସ୍ବପ୍ନ ଦେଖେ, କିନ୍ତୁ ସମାଜରେ ମୁଣ୍ଡଟେକି ବଞ୍ଚିବାକୁ ଖାଦ୍ୟ, ପୋଷାକ ଓ ବାସଗୃହ ଏହି ତିନୋଟିର ଆବଶ୍ୟକତା ରହିଛି ।
ଏଥିପାଇଁ ସରକାର ସମୟାନୁକ୍ରମେ ଅନେକ ଯୋଜନା ପ୍ରଣୟନ କରିବା ସହ ଗରିବ ଲୋକଙ୍କ ପାଇଁ ଅନେକ ସୁବିଧା କରୁଥିବାର ଡିଣ୍ଡିମ ପିଟୁଥିବା ବେଳେ ବାସ୍ତବରେ ଚିତ୍ର କିଛି ଅଲଗା । ଦୁଃଖୀ, ଦରିଦ୍ର ଓ ନିରାଶ୍ରୟ ମାନଙ୍କ ପାଇଁ ସରକାର ବିଭିନ୍ନ ଯୋଜନା ମାଧ୍ୟମରେ କୋଟି କୋଟି ଟଙ୍କା ବ୍ୟୟ କରି ସେମାନଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିବାର ବାହାସ୍ଫଟ ମାରୁଥିବା ବେଳେ ଆଜି ବି ଲୋକେ ଛିଣ୍ଡା ପାଲ ତଳେ ଓ ଭଙ୍ଗା କୁଡ଼ିଆରେ ଅତି ଦୟନୀୟ ଅବସ୍ଥାରେ ଜୀବନ ବିତାଉଛନ୍ତି । ଏଭଳି ଏକ ହୃଦୟସ୍ପର୍ଶି ଦୃଶ୍ୟ ଦେଖିବାକୁ ମିଳିଛି ରାୟଗଡ଼ା ଜିଲ୍ଲା ପଦ୍ମପୁର ବ୍ଲକ ଜାତିଲି ପଞ୍ଚାୟତ ଅଧିନସ୍ଥ ଜଗନ୍ନାଥପୁର ଗ୍ରାମରେ । ଦିର୍ଘ ୪୦ ବର୍ଷ ହେଲା ଜଗନ୍ନାଥପୁର ଗ୍ରାମରେ ପତ୍ନୀ ଓ ତିନି ଝିଅଙ୍କ ସହ ବାସ କରନ୍ତି ଗୋବର୍ଦ୍ଧନ ଶବର । ଗତ ପାଞ୍ଚ ବର୍ଷ ତଳେ ରୋଗରେ ପଡି ପତ୍ନୀ ଙ୍କ ଦେହାନ୍ତ ହେଇଯାଇଥିଲା । ଯାହା ଜମି ଖଣ୍ଡିଏ ଥିଲା ସରକାରୀ କେନାଲରେ ଅଧା ଚାଲିଗଲା ଯାହା ବାକି ଥିଲା ସ୍ତ୍ରୀର ଚିକିତ୍ସା ପାଇଁ ବିକ୍ରି ହୋଇଗଲା । ଦୁଃଖ କଷ୍ଟ ଓ ଧାର ଉଧାର କରି ଦୁଇ ଝିଅଙ୍କ ବାହାଘର କରିଛନ୍ତି । ବର୍ତ୍ତମାନ ଅସହାୟ ଗୋବର୍ଦ୍ଧନ ସାନ ଝିଅ ସହ ଭଙ୍ଗା କୁଡ଼ିଆରେ ପଡିରହିଛନ୍ତି । ସରପଞ୍ଚ ଠାରୁ ପ୍ରଶାସନିକ ଅଧିକାରୀ ସମସ୍ତଙ୍କୁ ଗୁହାରି କରିଛନ୍ତି ଘର ଖଣ୍ଡିଏ ପାଇଁ କିନ୍ତୁ ଆଜି ଯାଏଁ ଘର ମିଳିଲା ନାହିଁ । ଆବାସ ଯୋଜନାରୁ ବଞ୍ଚିତ ଅଛନ୍ତି ଗୋବର୍ଦ୍ଧନ । ପୂର୍ବରୁ ଥରେ କାଳବୈଶାଖୀ ବର୍ଷା ଯୋଗୁଁ ଘରର ଛାତ ସମ୍ପୁର୍ଣ୍ଣ ଉଡ଼ି ପ୍ରାୟ ୧୦୦ ମିଟର ଦୂରରେ ପଡ଼ିଥିଲା ।
୮ ଦିନ କାଳ ବିନା ଛାତରେ ପୁରା ପରିବାର ଖରା ବର୍ଷାରେ ବିତାଇଥିଲେ, କିନ୍ତୁ ସରକାରଙ୍କ କୌଣସି ସହାୟତା ମିଳିପାରିନଥିଲା । ଶେଷରେ ଧାର କରଜ କରି ଘର ଛାତ ସଜାଡି ଥିଲେ । ଏହି ଦୃଶ୍ୟ ଆମେ ଦେଖାଇବାର ମୂଖ୍ୟ କାରଣ ହେଲା ସରକାର ଓ ପ୍ରଶାସନିକ ଅଧିକାରୀଙ୍କ ନିଦ ଯଦି ଭାଙ୍ଗି ଯାଆନ୍ତା ତେବେ ଏଭଳି ଅସହାୟ ଗୋବର୍ଦ୍ଧନଙ୍କ ପରି ଆହୁରି ଅନେକ ଲୋକ ସରକାରଙ୍କ ଯୋଜନା ଅନୁସାରେ ଘର ଖଣ୍ଡେ ପାଇ ପାରନ୍ତେ । ଫଳରେ ବାକି ଜୀବନ ଖରା ବର୍ଷାରୁ ରକ୍ଷା ପାଇ ପାରନ୍ତେ ।
ଯେତେବେଳେ ସରକାରଙ୍କ ଆବାସ ଯୋଜନା ଆସେ ବାରମ୍ବାର ଅଭିଯୋଗ ହୁଏ କି ରାଜନୈତିକ ଦଲାଲ ମାନେ ଏହାର ସୁବିଧା ନିଜ ଦଳୀୟ ଲୋକଙ୍କୁ ଦେଇଥାନ୍ତି । ଗୋଟିଏ ଘରେ ବାପା ପୁଅ ଝିଅ ପାଉଥିବା ବେଳେ ପ୍ରକୃତ ହିତାଧିକାରୀ ଏହି ସୁବିଧାରୁ ବଞ୍ଚିତ ରହୁଛନ୍ତି । ଅନେକ ସମୟରେ ଲାଞ୍ଚ ଦେଇ ନପାରିବାରୁ ମଧ୍ୟ ପ୍ରକୃତ ହିତାଧିକାରୀ ଏହି ସୁବିଧା ପାଉନାହାଁନ୍ତି । ଏଭଳି ଅଭିଯୋଗ ବାରମ୍ବାର ହେଊଥିଲେ ମଧ୍ୟ ସମସ୍ତେ ନିରବ । କେବେ ଏହି ପରିସ୍ଥିତି ବଦଳିବ ତାହା ସମୟ କହିବ । କେବେ ଗରିବଟିଏ ନିଜ ଅଧିକାର ପାଇବ ତାହା ଦେଖିବାକୁ ବାକି ରହିଲା ।