ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୨୪/୨) : ଆସିଗଲା ନିର୍ବାଚନ, ଆରମ୍ଭ ହେଲା ରାଜନୀତି, ରାଜନୈତିକ ପାଣିପାଗ ଦିନକୁ ଦିନ ରଙ୍ଗିନ ହେବାରେ ଲାଗିଛି ।
ଏହି କ୍ରମରେ ଆଜି ଗୁଣପୁର ଟାଉନ ହଲ୍ ଠାରେ କଂଗ୍ରେସ ପକ୍ଷରୁ ବିଜେପି ଓ ବିଜେଡ଼ି ର ପ୍ରତୀକାତ୍ମକ ବିବାହର ଆୟୋଜନ ହୋଇଥିଲା । ସଜା ହୋଇଥିଲା ବେଦୀ ମଣ୍ଡପ, ଶଙ୍ଖ, ହୁଳହୁଳି ସାଙ୍ଗକୁ ପୁରୋହିତଙ୍କ ମନ୍ତ୍ର ଉଚ୍ଚାରଣରେ ଦୁଲୁକି ଉଠୁଥିଲା ଵେଦି ମଣ୍ଡପ । ଡ଼ାକରା ପାଇ ବର ଆସିଗଲେ କନିଆଁ ବି ରେଡି , ଚାଲିଲା ବିଜେପି ଓ ବିଜେଡ଼ି ର କଟାକ୍ଷ ଭରା ବାହାଘର । ହଁ ଆଜ୍ଞା ଇଏ ଏମିତି ସେମିତିକା ବାହାଘର ନୁହେଁ , ଖୋଦ୍ କୋରାପୁଟ ସାଂସଦ ସପ୍ତଗିରି ଉଲ୍ଲାକା ଓ ତାଙ୍କ ଧର୍ମପତ୍ନୀ ପୂଜା ଉଲ୍ଲାକାଙ୍କ ପ୍ରତକ୍ଷ ତତ୍ତ୍ଵାବଧାନରେ ଆୟୋଜିତ ବାହାଘର । ବିଜେଡି ପାଇଁ ପଦ୍ମପୁର ବ୍ଳକ ନୂଆଗଡ ପଞ୍ଚାୟତ ସରପଞ୍ଚ ମମିତା ମାଝି କନ୍ୟା ସାଜିଥିବା ବେଳେ ବିଜେପି ପାଇଁ ତାଙ୍କ ସ୍ବାମୀ ପାଉଲ ମାଝି ବର ସାଜିଥିଲେ ।
ଏହି ଵ୍ୟଙ୍ଗାତ୍ମକ ବିବାହ ଉତ୍ସବରେ କଂଗ୍ରେସ ଦଳର ବହୁ ଛାମୁଆଁ ନେତା ଓ ଶହଶହ କର୍ମୀ ଯୋଗ ଦେଇଥିଲେ । ଯୁବନେତା ତଥା ବିଧାୟକ ଆଶାୟୀ ପ୍ରାର୍ଥୀ ସତ୍ୟଜିତ ଗମାଙ୍ଗଙ୍କ ନେତୃତ୍ବରେ ଏହି ନିଆରା ବିବାହକୁ ନେଇ ଯେତିକି ଚର୍ଚ୍ଚା ହେଉଛି ତାଠାରୁ ଜିଲ୍ଲା ସଭାପତି ବିଜୟ ଗମାଙ୍ଗଙ୍କ ଅନୁପସ୍ଥିତି କୁ ନେଇ ଅଧିକ ଆଲୋଚନା ହେଉଥିବା ଦେଖିବାକୁ ମିଳିଛି । ରାଜ୍ୟ ଓ କେନ୍ଦ୍ରର ଶାସକ ଦଳଙ୍କ ମଧ୍ୟରେ ଭିତିରିଆ ମେଣ୍ଟ ଅଭିଯୋଗ କରି କଂଗ୍ରେସ ପକ୍ଷରୁ ଏଭଳି ବିବାହର ଆୟୋଜନ କରାଯାଇଥିବା ବେଳେ ଦୀର୍ଘ ଦୁଇଵର୍ଷ ବ୍ୟବଧାନ ପରେ ସାଂସଦଙ୍କ ଗୁଣପୁର ଗସ୍ତକୁ, ରାଜନୈତିକ ସମାଲୋଚକ ଙ୍କୁ ଖୁରାକ ଯୋଗାଇଛି ।