ରିପୋର୍ଟ : ରବି ଶଙ୍କର ମହାପାତ୍ର
କୋରାପୁଟ, (୨୦/୪) : ବୋରିଗୁମ୍ମା ବ୍ଳକ୍ ପୋଡ଼ାପଦର ଗ୍ରାମରେ ୨ ଦିନ ଧରି ଦେବୀ ନନ୍ଦପୁରିଆଣିଙ୍କର ଘଟଯାତ୍ରା ସମ୍ପନ୍ନ ହୋଇ ଯାଇଛି ।
ଗତ ମଙ୍ଗଳବାର ରାତ୍ରି ବି.ସିଂହପୁର ଗ୍ରାମରୁ ପୂଜକ ମାନେ ପାରମ୍ପରିକ ବାଜା ସହ ପୋଡ଼ାପଦର ଗ୍ରାମର ହେଣ୍ଡିଆ ପରିବାର ଦ୍ୱାରା ପୂଜିତ, ଯାହା କି ଦେବୀଙ୍କ ମାଆ ଘର ଭାବେ ପରିଚିତ, ଆସି ଆବାହନ କରି ନେଇଥିଲେ । ପରେ ଦେବୀ ପ୍ରତିଦିନ ବି.ସିଂହପୁର ଗ୍ରାମ ପରିକ୍ରମା କରିଥିଲେ । ଆବାହନ କରିବାକୁ ଯିବା ସମୟରେ ଡାଆଣି, ଚିରଗୁଣି, ତାନ୍ତ୍ରିକ, ଅଶୌଚ଼ ଥିବା ସ୍ତ୍ରୀଲୋକ ମାନେ ରାସ୍ତାରୁ ହଟି ଯିବା ପାଇଁ ଗଣ୍ଡା ମାଧ୍ୟମରେ ଘୋଷଣା କରା ଯାଇ ଥିଲା ।ଦୁଇଦିନ ବି.ସିଂହପୁର ଗ୍ରାମ ପରିକ୍ରମା ପରେ ଶୁକ୍ରବାର ଓ ଶନିବାର ବି.ସିଂହପୁର ସହିତ ପୋଡ଼ାପଦର ଗ୍ରାମ ମଧ୍ୟ ପରିକ୍ରମା କରିଥିଲେ ଓ ପ୍ରତି ଘରେ ପୂଜା ପାଇ ଥିଲେ ।ପ୍ରତ୍ୟେକ ଗୃହସ୍ଥ ନିଜ ଘର ସାମନାରେ ଗୋବର ପାଣି ଲିପିବା ସହ ପାହାଡ଼ା ବିଛାଇ ପିଢ଼ା ପାଣି ସହ ଝୁଣା, ଧୂପ, ଦୀପ, ନୈବେଦ୍ୟ ଅର୍ପଣ କରିଥିଲେ ।
ଏହି ୨ ଦିନ ପୋଡ଼ାପଦର ଗ୍ରାମର ପ୍ରତ୍ୟେକ ଘର ତା’ର ସାମନା ଘର ସହ ସଂଯୋଗ କରି ଆମ୍ବ ପତ୍ରରେ ତୋରଣ ତିଆରି କରି ଦେବୀଙ୍କ ଯାତ୍ରା ପଥ ସଜ୍ଜିତ କରିଥା’ନ୍ତି । ଏହି ୨ ଦିନ ଗ୍ରାମରେ ଏକ ପବିତ୍ର ନିର୍ମଳ ଆଧ୍ୟାତ୍ମିକ ପରିବେଶ ସୃଷ୍ଟି ହେବା ସହ ଶନି ବାର ପୋଡ଼ାପଦର ହାଟପଦା ଠାରେ ପୌରାଣିକ ନାଟକ ଅନୁଷ୍ଠିତ ହୋଇଥାଏ । ଅବଶ୍ୟ ଆଧୁନିକତାର ଅନୁକରଣରେ ଆଜିକାଲି ପୌରାଣିକ ନାଟକ ବଦଳରେ କୌଣସି ସେନସର ବୋର୍ଡ ଦ୍ୱାରା ସ୍ଵୀକୃତିପ୍ରାପ୍ତ କରିନ ଥିବା ଆଧୁନିକ ନାଟକ ଅନୁଷ୍ଠିତ ହୋଇ ଆସୁଛି । ଏହି କ୍ରମରେ ପୋଡ଼ାପଦର ଗ୍ରାମରେ ମଧ୍ୟ ନାଟକ ଅନୁଷ୍ଠିତ ହୋଇଥିବା ଜଣାପଡିଛି ।