ରିପୋର୍ଟ : ସନ୍ତୋଷ କୁମାର ନାୟକ
ବଲାଙ୍ଗୀର/ବେଲପଡା, ତା (୧୪/୦୭) : ବେଲପଡା ଥାନା ଅନ୍ତର୍ଗତ ମଣ୍ଡଳ ଗାଁରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଅର୍ଥ ଲୋଭରେ ଜଣେ ବାପା ନିଜ ଝିଅକୁ ତିରପୁର ଅଞ୍ଚଳ ର ୨ ଜଣ ଦଲାଲଙ୍କ ଠାରେ ବିକ୍ରି କରିଦେଇଥିବା ଅଭିଯୋଗ ହୋଇଛି ।
ଅର୍ଥ ଲୋଭରେ ନିଜଝିଅ କୁ ରାଜ୍ୟ ବାହାର ଦଲାଲ ଙ୍କୁ ବିକ୍ରି କୁ ନେଇ ବେଲପଡା ପୋଲିସ ଘଟଣାସ୍ଥଳକୁ ପହଞ୍ଚି ସମସ୍ତଙ୍କୁ ଥାନାକୁ ନେଇ ଅଧିକ ପଚରା ଉଚରା କରୁଥିବା ଜଣାପଡିଛି । ମିଳିଥିବା ସୂଚନା ଅନୁସାରେ ବେଲପଡା ଥାନା ମଣ୍ଡଳ ଗାଁ ର ଜଣେ ଦାଦନ ଦଲାଲ ସର୍ଦାର ନୀରନ ବାଗକୁ ଆଗୁଆ ଟଙ୍କା ଦେଇ ବାହାର ରାଜ୍ୟକୁ ଦାଦନ ଖଟିବାକୁ ନେଇଥିଲା ।
ସେଠାରେ ନୀରନ ନିଜ ପରିବାର ସହ ୩ ରୁ ୪ ବର୍ଷ ରହିଲା ପରେ କିଛିଦିନ ହେବ ଗାଁକୁ ଫେରିଥିଲେ । ସାଙ୍ଗରେ ୨ ଜଣ ଅଣ ଓଡିଆ ଲୋକେ ମଧ୍ୟ ଆସିଥିଲେ । ଗାଁରେ ସମସ୍ତେ କିଛିଦିନ ରହିବା ପରେ ଝିଅକୁ ଅଣଓଡ଼ିଆମାନେ ନିଜ ସାଥୀରେ ତିରପୁର ନେଇଯିବାକୁ ଯୋଜନା କରୁଥିବା ଗାଁ କିଛି ଲୋକ ଖବର ପାଇଥିଲେ । ଏହି ଖବର ଗାଁରେ ପ୍ରଚାର ହେବା ପରେ ପୋଲିସ ପାଖରେ ଖବର ପହଞ୍ଚିଲା । ଏହାପରେ ଗାଁରେ ପୁଲିସ ମାଁ, ବାପା, ଝିଅ ଏବଂ ୨ ଜଣ ଅଣଓଡିଆଙ୍କୁ ଥାନାକୁ ନେଇ ପଚରା ଉଚରା କରୁଥିବା ଜଣାପଡିଛି ।
ଏ ନେଇ ମାମଲା ରୁଜ୍ଜୁ ହୋଇନଥିବା ବେଳେ ସମସ୍ତଙ୍କୁ ଥାନାରେ ଅଟକ ରଖି ପୋଲିସ ତଦନ୍ତ କରୁଥିବା ଜଣାଯାଇଛି । ପ୍ରକାଶ ଯେ, ଆର୍ଥିକ ଅନଗ୍ରସର ଥିବା ସୁଯୋଗ ନେଇ ଅର୍ଥ ପ୍ରଲୋଭନ ଦେଖାଇ ଆନ୍ତଃ ରାଜ୍ୟକୁ ଏହିପରି ଯୁବତୀ ଚାଲାଣ ସହ ସେଠି ନାନା ପ୍ରକାର ର ନିର୍ଯ୍ୟାତନା ଦିଆଯାଉଥିବା ଘଟଣା ନଜର କୁ କ୍ରମାଗତ ଭାବେ ଆସୁଛି ।